Санзараевтер иң чахсылар санында
10.07.2024
Хабарлар
Александр паза Людмила Санзараевтер фестиваль тузында
Фестиваль. Калугада Сӧбiре, кӧӧленiс паза киртiнiс кӱнiне чарыдылған алғым фестиваль ирткен
Анда Россияның прай федеральнай округтарындағы аймах чоннарның 10 ирепчiзі араласхан.
Сибирьдегі федеральнай округ ӱчӱн Александр паза Людмила Санзараевтер сӧбiрезi турысхан. Олар Сорығ городтаңнар. Александр хакас полча, Людмила – тува хызы. Ирепчi iкi пала ӧскiрче. Сӧбiре музыкаа хынча, республика марығларында сыбыра араласча, ол санда «От ырында» паза «Айтыста».
– Санзараевтер «Сӧбiре чуртазы хыныста паза киртiнiсте» фестивальда араласхан сылтаанда, театрда 2400 паза паркта 5000 кӧрiгҷi чатхан хоостыра толдырылчатхан хакас кӧӧн истiп алған, хайзы кӧрiгҷiлернi ле нимес, iдӧк концерт тӧстегҷiлерiн чапсытхан. Пiстiң Ӱстӱнзархы Сибирь паза iкi харындас чон ӱчӱн турысчатхан сӧбiре чоннар ынағласчатханын, пiлiсчеткенiн паза улуғласчатханын чахсы кӧзiтче.
Хайди мағаа искiргеннер фестиваль тӧстегҷiлерi, Россия чоннары Ассамблеязының кiзiлерi ирепчiнiң чайаачы узын пӧзiк паалааннар, сӧбiренi «чазағлығ паза айдас» адап салғаннар. Пiстiң сӧбiре фестивальда араласханы Хакас Республиканы хазна синiнде сабландырарына хозым иткен, – таныхтаан «Россия чоннарының Ассамблеязы» халых хазна организациязының регион пӧлиинiң кнезi Любовь Аёшина.
Фестиваль араласчыларына алғым программа тимнел парған: Москвадағы Национальностьтар туразында тегiлек стол, Хызыл площадьча чорых, теплоходнаң экскурсия паза «Сӧбiре чуртазы хыныста паза киртiнiсте» пайрам.
Фестивальда тиксi сӧбiрее теелчеткен аймах сурығларға чарыдылған площадкалар тоғынғаннар. Ӧӧнi сӧбiрелер парады полған. «Краш» барабаннар шоузының артисттерiнең хада сӧбiрелер кӧрiгҷiлер площадказынаң пасти ӧӧн аллеядаң сығара Калуганың ӧӧн тигiрибi, Троицкай тигiриб, хыринда орныхчатхан сценаа теере парғаннар. Анаң олар чахайахтар паза хорбылар одырт салғаннар.
Фестиваль гала-концертнең тоозылған. Анда Россияның чон артизi Олег Погудин, Алексей Губаревтiң ансамбльы, Вalkanimansвant оркестр, «Ӱн» проекттiң финализi Алиса Игнатьева, Беларусиядағы «Партизан FM» фольклор ӧмезi, Гедиминас Таранданың устаанынаң Орыс император баледi араласханнар.
Фестивальның тӧстегҷiзi «Россия чоннарының Ассамблеязы» халых хазна организациязы полча. Фестиваль Национальностьтар киреенҷе федеральнай агентствозы паза Калуга облазы правительствозы хабазиинаң иртiрiлген. Россияның иң чахсы он сӧбiрезi санында пол парған Санзараевтерге «Россия чоннарының Ассамблеязы» халых хазна организациязының региондағы пӧлиинiң кнезi Любовь Аёшина фестивальда аралазарға сурыныс пічиин тимнирге полыс пирген. Регион пӧлии iдӧк чайаачы номерлер тимнирге хабас пирген.
Сом Хакасияның национальнай паза территориальнай политика министерствозыни
Автор :
Светлана Астанаева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде