Спорт чазыттарын асханнар
17.07.2024
Хабарлар
Михаил Болганов (оң саринаң) азых тренировка тузында
Чайғыдағы тынағ. Ағбанның тынағ паркында аймах оңдайлығ харбазығларҷа (СБЕ ММА) азых тренировка ирткен
Пістің республикада Хакасияның физическай культура паза спорт министерствозы пастаанынаң ӱзінҷі чылы «Спорт пятницазы» проект чуртасха кирілче. Ол хазых чуртасха тартылчатхан улусха республикада тиліпчеткен спорт кӧрімнерінең танызар оңдай пирче. Чӧрімде прай федерациялар араласчалар. От айының 12-ҷі кӱнінде чонны аймах оңдайлығ харбазығларның (СБЕ ММА) пірігізі ӱтерткен.
Хакасияда пу спорт кӧрімі 2019 чылда тиліп пастаан. Хысхаҷах тус аразына пістің ооллар улуғ марығларда чиңістер тут сыхханнар. Вадим Феалковскийнең Николай Карамашев Россияның спорт узы нормативін толдырыбысханнар. Михаил Болганов марығларда тӧреміл сыйыхтығ орынға сыхча. Спортсменнер чидіглерге тренер Станислав Челтыгмашевтің устаанынаң читкеннер.
Мастер-класс скейт-паркта 18.00 часта пасталған. Чыылған улуссар спорт ведомствозының спорт пӧлиинің пастығы Дмитрий Сафронов айланған. Хайди таныхтаан Дмитрий Валентинович, аймах оңдайлығ харбазығларның пірігізі иң чахсы тоғынчатхан федерацияларның санына кірче. Ооллар турнирлердең медальлар чох айланминчалар. ММА cекцияларында олғаннар саны кӧп. Оларның піреезі, Фёдор Емельяненко алай Пётр Ян чіли, чоннар аразындағы марығларда чиңіс тударына ізеніс пар.
Мероприятие сыйыхтаснаң узарадылған. 2023-2024 чылларда чидіглерге читкен ӱчӱн, Хакасияның спорт министерствозының алғыстас пічиин Вадим Феалковскийге, Михаил Болгановха, Николай Карамашевке паза Егор Боргояковха читіргеннер.
Тренировкадаңар чоохтаза, ММА-да спортсменнің миизі паза иді-сӧӧгі тоғынчаттыр. Мында табырах сағыстығ, чапчаң, кӱстіг поларға киректелче. Пір саринаң пу спорт кӧрімі боксха тӧӧй, олох туста кӧп ниме кӱрестең алып алғаннар.
Тренер Станислав Челтыгмашевнең чоохтасханда, халғанҷы туста ол ӱгренҷілерінең хада ММА-да ла нимес, ідӧк панкратионда паза национальнай спорт кӧрімнерінде кӱстерін сынапча. Панкратион оңдайынаң ММА-ға тӧӧй. Ол пурунғы Грецияда тӧстелген. Араласчылар правилоларға тудынмин харбасчаңнар. Амғы панкратион пурунғыдағызынаң пасхалалча. Пӱӱл сілкер айында чир-суғҷыларыбыс панкратионҷа Россия чемпионадында кӱстерін сынааннар. Хазыр харбазығларда Михаил Болганов кӱмӱс медаль холға кирген, Егор Боргояков – хола медаль. Боргояков Асхыс аймаандағы Кызлас аалдаң. Саарбах тузында олаңай кӱрес секциязына чӧрген. Тренерлері – Алексей Шулбаев паза Станислав Майнагашев. Аймах оңдайлығ харбазығларнаң толдыра кӱзінең 2021 чылдаң айғас парир. 26 частығ спортсмен менеджер полып істенче. Егор 57 кг кӧдірімде тудысчаттыр. Чиит кізі, профессионаллар санына кіріп, ахча тоғынарға пӧгінче. Чир-суғҷыбыс, сағынған сағызын толдырып, тренировкаларға неделяда 8 хати чӧрчеттір. Спортта чидіглерге пасха оңдайнаң чит полбассың.
2024 чыл Михаил Болгановтың чылы тирге чарир. Ол Тун пайрамда абсолюткада прайзын чиңіп алған. Ағаа хоза хапсагайҷа (якут чонның кӱрезі) турнирде аралазып, сигізінҷі орынға сыхтыр. Анзы ағаа хапсагайҷа пастағы тилекей чемпионадында кӱс сынир оңдай пирче. Арға-мӧрій Киргизияда 24 – 26 орғахта иртер. Болганов 1992 чылдаң, ол Росгвардияда служба иртче. Сӧбіреліг, ӱс паланың часкалығ пабазы полча. Кізілер спортнаң айғазарға тус читпинче, оңдай чоғыл тіп чоохтанарға хынадырлар. Сынында хынчатхан кирекке тус хаҷан даа табылча.
От айының 20-ҷі кӱнінде Асхыс аймаа 100 чылын таныхтир. Пайрам тузында кӱресче Хакасияның чемпионады паза первенствозы иртірілері кӧрілче. ММА секциязына чӧрчеткен ооллар анда пазох чиңіc тударға пӧгінчелер.
«Спорт пятницазы» проекттің тоғызы аннаң андар узарадылар. Пу неделяда хайдағ cпорт кӧрімінҷе тренировка иртерін cпорт министерствозының сайтында піліп аларға чарир. Спортсменнер олох орында 18.00 часта чыылызарлар.
Cом авторни
Автор :
Майя Кильчичакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
