Сағыстары чуртасха кирілзін
19.07.2024
Хабарлар
Станислав Тюмереков Роман Ковтунға сыбы хайағын хайнатчатхан оборудованиені кӧзітче
Тоғыс чорығы. Таштып аймаанзар Хакасияның экономика тилiзi министрi Роман Ковтун кил парған
Аннаң хада орынҷылары Ольга Кузьмина, Наталья Дворяк паза инвестиция тилiзi агентствозының устағҷызы Римма Мальчикова полғаннар. Оларны Таштып аймаа устағ-пастаанда удурлааннар. Аймах пазы Николай Чебодаевнең чоохтазығ апарылған. Анда араласханнар Ағбаннаң килген идiнҷектер Евгений паза Денис Дударевтер, олар «Индустрия развлечений» ӧменең устапчалар. Таштып аймаанда глэмпинг оңдайынаң ибiҷектер пӱдiрерге сағыс тутчалар. Глэмпинг – ол ниик, палаткаларға тӧӧй пӱдiрiглер, табырах кӧдiрiлчелер. Идiнҷектерге 22 млн салковай киректелче, аны субсидия алай грант чiли алып аларға чарир, че прай пічіктер азынада тимде поларға, 10 млн салковай пости поларға кирек. Роман Ковтун теен: «Иң пастағызын, мин чӧп пирерҷiкпін, чарытхы суриин ӱзӱрiбiзерге. Чарытхы тартырыбысса ла, киректерiң пастирға чарир. Анзы сидiксiнiстернең палғалыстығ, пiрееде чарытхыны най ӱр тартчалар, пiр идiнҷекке пис чыл иткеннер. Кирек iди сӧӧ тартылчатса, пос ахчазын чiдiрiбiзерiнең паза грант айландырарынаң хорғыс пар...»
Чоохтазығ соонаң пастыхтар чорыхха сығыбысханнар, Таштып аал аразынҷа паза «Сюгеш» турбазазар чӧргеннер. Чорыхтың пӧгiнi – инвестиция площадкаларын паалиры, пу чорыхтың пастағҷызы позы Николай Чебодаев полған.
Таштыптағы чоллар тыхтаҷаң устаныcха (хазна унитарнай предприятие полча) пу чыл сидiк иртче. Республикада ахча чидiспинчеткенде, ӧдiстерiн чаап полбинчалар, счеттары чабых, аның ӱчӱн улуғ сидiксiнiстер. Амғы туста устаныс тоғынар оңдайын алыстырча, анаң аның тӧcтегҷізі Хакасияның правительствозы пол парар. Устағҷызы Николай Тюгаев холларын тӱзiрбинче, киректер чахсылан парарына iзенче. Экономика министрiнең ол бетон заводын пӱдiрер сағызынаң ӱлескен. Амғы тусха ӱзӱрiлбеен сурығлар (гравий аныҷаң карьер, участок паза лицензия чоғыл) пӧгiлзе, прай пічіктерні чыып алза, проект чуртасха кирiлер.
Анаң ағас пилорамазынзар (идінҷек Ирина Митина) парғаннар, ээлерi наа тирiглер алып аларға сағыс тутчалар. Пiр пилорамада ӱс идiнҷек хада тоғынча: постары ағас пилетепчелер, кисчелер, анаң ол ағастаң Ағбанда туралар пӱдiрчелер.
Пар Таштыпта кiзiлер, хайзылары сыбы хайағын итчелер, оларнаң пастыхтар тоғасханохтар. Станислав Тюмереков позының цеғын кӧзiт пирген, анда тирiглер турчалар, ӧтiре кӧрiнчеткен iдiстерге ур салған сыбы хайағын аалҷыларға сыйлаан. Министр Римма Мальчиковаа чахығ пирген, идiнҷектi республикадағы «Мой бизнес» кiннең таныстырып, оларға постарының брендтерiн сағынып аларға полыс пирерге. Паза Станислав вездеход кирек тiп чоохтаан, анзын грант алай субсидия хоостыра алып алар оңдай табарға кирек.
Регина Тен «Ах хус» аалҷы туразының ээзi полча, пастыхтарға чарытхы хомай тоғынча тiп хоптанған паза ниме идерге халғанынаңар чоохтаан. Гостиница ікінҷi ле чылы тоғынча, ибiркізін чахсыландырарға, улуғ хакас ибін пӱдiрерге сағыс тутча. Тастында хакас ибін турғыс салза, анда тойлар, ӱлӱкӱннер иртiрерге чарир.
Iдӧк министр аймах пазынаң Валерий Кулумаевтiң наа, чоон гаражында пол килгеннер, идiнҷек анда СТО азыбызарға пӧгiнче, iстiндегi тоғыстарны тоозыбызарға паза автомашиналар тыхтаҷаң тирiглер алып аларға халған.
«Сюгеш» турбазаның ээлерi (Сарагашевтер пабазы паза хыстары) наа трасса (1200 м) азарынаңар чоох апарғаннар, бугельнай подъемник ал салтырлар, че пасха хорадығлар поларох.
Экономика тилiзi министерствозы кiзiлерiнең тоғазығда идiнҷектер проекттерiнең ӱлескенде, пастыхтар кирек чӧптер пиргеннер, паза, хабазығ сӧлеп, сағынған сағыстары толар тiп iзенiс ағылғаннар.
Cом авторни
Автор :
Тарина Бутонаева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
