Хара хустың хазыр кӧрізі
19.07.2024
Хабарлар
Республиканың олған библиотеказында полған на сай чапсых паза тузалығ мероприятиелер иртірілчелер. Оолағастар паза хызыҷахтар оларда хынып араласчалар
Хоос кӧрiс. Ӱр ниместе мағаа республиканың олған библиотеказында поларға килiскен. Анда кӧріп алғам пу хынығ ойыннарны паза марығларны. Кічіг частығ хығырығҷылар постарын оңнығ ла ӧткін тудынминчалар
Аймах-пасха сілiг ӧңнерінең хайығ тартчатхан улуғ сом. Арығ идеензер чағын арах пӧзік обаа тас турча. Аның ӱстӱнде ханаттарын час салған хара хус. Таң, ол хайдар-да учуғарға тимненче, таң, ам на одырыбысты.
Олох арада хустарның хан-пигі ырах ниместегі хыраңассар хазыр кӧрче. Анда ниме ле полча ни?
Хара хустың хайиин пойли чӱгӱріс чӧрчеткен ікі кӱҷӱгес тартчатхан осхас. Оларға ундар хынығ. Iҷезі, тізең, хой хадарчатхан иренге полысча, ӧӧрні ибірче. Олох арада кӱҷӱгестерін харахтаң позытпинча. Палалары, ойназып-ойназып, ырах таа чӱгӱрізе халарлар. Позы даа андағ полған, аар-пеер ле ойли хал турҷаң. Iҷезі, аны таап алып, матап ніткелеҷең. Хатығлааны полбас па за.
– Оолағастар, сірер хыйғаҷахсар. Пазл ниме полчатханын чахсы пілчезер. Аннаңар сірерге алныңарда чатчатхан пазллардаң пу сіліг сомны чыып аларға кирек. Утхан кізее улуғ нимес сыйығас полар, – кӧӧктірче iкi нанҷыны Ольга Наумова.
Ольга Викторовна республикадағы олған библиотеказының краеведение паза национальнай литература пӧлиинің устағҷызы. Кічіг частығ хығырығҷыларнаң ол чибіргі чыл артиинаң тоғын парир. Хайдағ даа паланаң ол табырах пір тіл таап алча, ӱр ниместiң не аразына иң чағын нанҷызы полыбысча. Сах андох хынығ паза тузалығ чоохтазығ пастапча.
– Мағаа ниме полҷаң ол. Амох пiр-iкi ле тимнеп тастабызарбын. Кӧр, Саша, ӱгрен. Сыйых мини полар, – хайди-да най тың пойли тудын сыхты нанҷызының алнында Альберт Дорин.
– Анзы марығ тузында кӧрінер. Мағаа даа тың на сидік пiлдiрбинче, – амыр ла чоохтан салды Александр Карамашев.
Ольга Викторовнаа ол ла кирек полчатпас па. Че улуғ опыттығ библиотека тоғынҷызы сах андох кічіг частығ хығырығҷыларзар маңзырабинча. Постарының хыринҷа иртiсчеткен пасха оолағастарзар сыныхти кӧр салча, че сағам пірдеезін марығда аралазарға хығырбинча. Мағаа сым-туйуххан ӱс салаазын кӧзітче. Арға-мӧрійде ӱc пала аралазарға кирек одыр.
– Пасхалары сірернең хада марығлазарға хорыхчатхан одырлар. Аңдағ полза, ікӧлең ойнап кӧріңер. Арса, піреезі марығлазарға ынабызар, – чалахай чоохтанча библиотека тоғынҷызы.
Анаң оолағастарның алнында азынада тимнелген тӧп-тӧӧй пазллар сал салған. Сағам оларға теңерге, тутхлирға чарабас тіпче. Позы, тiзең, хайдар-да ӱр нимеске чіде халған. Мына ол ікі чалбах чардыҷах тудын килді. Оларны пірci пірсінің ӱстӱне килістіре піріктiрібісті, палалар аразында ипти салыбысты. Амды Саша даа, Альберт тее ол чардылар азыра пахлап полбастар, хонҷии пазлларны хайди чыыпчатханын кӧрбес.
Итсе, iди поларға кирек. Хайдағ даа марығ сын оңдайнаң, алаахтырыс алай кӱҷӱрлес чох иртсе, маңат нооза. Че мында пасха ниме чапсыстығ пілдір парған. Пайаа ла пу стол хыринҷа пір дее iс кирек чох аар-пеер пастырыс чӧрчеткен оолағастар паза хызыҷағастар, хынығ марығ амох пасталар тіп чарлалғанда, сах андох ікі нанҷыны ибірібіскеннер. Че мындағ туста тың суулирға, уламох хайдағ-да чӧптер пирерге чарабас. Ольга Викторовна анзын сыбыра хайығда тутча, ус-пас чох палаларны хатығлапча.
Че хайди даа кӱстензе, кічіг частығ хығырығҷыларны саңай тымылдыр полбассың. Піреезі хайди даа суртлабысча, тыстан полбин салча. Пырозын сизініп, айаҷағынаң ахсын чаба тутча, пазын тӧбiн тӱзірче. Андағ паланы хырызарға даа тіл айланминча, неке. Аннаңар библиотека тоғынҷызы, пір дее ниме чоохтанмин, пазын на чайхабысча. Позы, тізең, ікі нанҷыдаң харах албинча. Пазллар чыыр марығ ӱр нимеске дее тохтабинча. Оолағастар ай-сым одырчалар, холлары ла табырах хайынысчалар.
Альберт, пайаа Сашаның алнында кӧмес артых чоохтанғлап салып, амды сағысха тӱзібістір. Аның холында сіліг сомның иң улуғ кизегi. Аны пірее орынзар килістiре турғызыбысса, пасха пазлларны аның ибiре салғлабызарҷых таа. Че оолағас андағ орын сомда пір дее кӧр таппинча. Ол даа сылтағнаң, пiр орында ипти одыр полбиныбысты. Марығ араласчызы чахсы оңарча, ол кизектi пірее ле чирзер cалыбызарға кирек. Алай сағам хыйа сал саларға. Тус иртче нооза.
Орта чарадығ алды, ол улуғ кизектi сала хыйа сал салды. Сала соонаң арах килістіре орын хайди даа табыларына Альберт тыңох ізенче. Аннаңар пасха пазлларны холға алды, табырах салғлап сыхты. Iди ол ікі кӱҷӱгес аар-пеер чӱгӱріс чӧрчеткен чардыхты сала даа тудығ чох толдыр тастабысхан. Анзына хайди ӧрiнмес.
Саша уғаа амыр хылыхтығ оолағас. Ол тың на маңзырабинча, столда чатчатхан кӧп саннығ пазлларны чайа-чайа салғлабысхан. Амды аның тоғызы сала айныстығ парчатханға тӧӧй. Пiрдең, позы даа чахсы оңарбин халып, нанҷызы Альберт хыйа сал салған чоон кизекке килiстiре орын табырах таап алған. Аның соонда тоғыс сынап таа айныстығ пар сыхханға тӧӧй пілдiрген, аны ӧріндірген.
Хара пасхаҷыл кирек, хачасхан чіли, ікі кӱҷӱгестің пірci хайдар-да «ойлабыстыр». Ам даа тузаланғалах пазллар аразында даа кӧрінминче. Арса, читіре хыплабин салғаннар? Iди полбасха кирек. Оларның алнында даа пу марығ иртіріл турған, пірдеезі хомзынмаан, таласпаан. Аннаңар Альберт пазох ла пазлларны хати сыныхтап пастабысхан. Кинетін ол тыыда хатхыр сыхханда, пасхалары чочып таа парғаннар, оолахсар матап ла кӧрчелер, піл полбинчалар.
Че ол пірдеезіне пір дее ниме чоохтабады, хара хустың чалбах ханады аразынаң чіткен кӱҷӱгесті сығара тартып алып, кирек орынзар ипти турғыс тастабысты. Ол хайди полчатханын кӧр салған палалар сах андох кӧгліг хатхырызыбысханнар. Альберт хайдағ алҷаас иткенін сах андох сизін салғаннар. Ольга Викторовна постарынзар кӧрібіcпеен полза, олғаннар хатхы-кӱлкiлерiн табырах тохтатпасчыхтар.
Хайдағ даа сидіктерні тобырарға килicчетсе, стол ӱстӱндегі кӧп саннығ пазллар кӧместең-кӧместең хохчырапчалар. Олох арада тӧреен чирібістің сілiг пулуңнарының пiрсі сомға суурыл парған полза, пазллардаң ол кӧрім ам даа читiре пӱткелек. Аннаңар даа кічіг частығ хығырығҷылар сым тур полбиныбысханнар, суум-саам кӧдiргеннер, удур-тӧдір ағырин-кӧӧлҷе cыбыхтазып пастабысханнар.
«Че, палалар майығыбысхан осхастар. Марығны тохтадарға кирек», – позы алынҷа чарадыбысты библиотека тоғынҷызы. Аның кӧрізінең, оолағастарның хайзы даа, тың маңзыраан сылтаанда полбас па, пірее пазлларны чарабас орыннарзар турғысхлап салған. Ол сылтағнаң кічіг частығ хығырығҷылар хаҷан даа утыс полбастар, стол кистінде тик чирге ле ӱр одыр саларлар. Олған библиотеказынзар килген оолағастарны паза хызыҷағастарны пасха даа хынығ марығлар, саблығ кізілернең чапсых тоғазығлар сағыпчалар.
– Пу хынығ паза хазыр марығ чиңicчi чох тоозылды. Че оолағастарның хайзы даа утып аларға матап кӱстенген. Аннаңар сыйых ікізіне дее читірілче, – чарлапча Ольга Викторовна, Сашанаң Альбертке олғаннарға пазылған кічиҷегес, че уғаа сiлiг кӧрімніг киндеҷектер читірчеткен туста.
Палалар, марығда араласхан ікі нанҷыны махтап, айаҷахтарына айабин, матап хол сапханнар, ӧрiнiскеннер.
Андағ сағыбаан сыйыхха прайзының артых ӧрінгеннер марығда араласхан оолағастар. Шурик тее, Альберт тее Ольга Викторовнаның холынаң алған киндеҷектерні сыныхти кӧрглеп пастааннар. Кічіг частығ хығырығҷыларның хайиин андағы аймах ӧңніг хоостар тартханнар. Аннаңар оолағастарның хайзы даа, книгаҷахты хығырып алза, аны кічіг туңмаҷахтарына пирерге чарадыбысхан. Хоостарны даа кӧрглеп алзыннар. Олар даа матап ӧрінгеннер.
Сом республиканың олған библиотеказының VK-дағы страницазынаң
Автор :
Анатолий Султреков
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде