Пір ӧменең тудынып, тоғысты тӱзімніг апарарға
26.07.2024
Хабарлар
![Пір ӧменең тудынып, тоғысты тӱзімніг апарарға Пір ӧменең тудынып, тоғысты тӱзімніг апарарға](/upload/iblock/916/85qrqncrr3zv0fypay9x7u9exkv5unad.jpg)
Ӧнетін чаа операциязында араласчатханнарға гуманитарнай полызығ
Полызығ. Киҷее Хакасиядаң ӧнетін чаа операциязында араласчатхан чир-суғҷыларыбысха гуманитарнай полызығ ызылған. Пу чуртағҷылар чыған республикадаң парчатхан пастағы гуманитарнай полызығ нимес, че тӧстелген пірге кіннең сығара ызылчатхан пастағызы пол парча
Ӱр ниместе Хакасияның правительство туразында республика пазы Валентин Коноваловтың устаанынаң ӧнетін чаа операциязы зоназынзар гуманитарнай полызығ тӧстирінҷе паза аны ызарынҷа тоғысчы ӧменің пастағы чыылии ирткен. Тоғысчы ӧмезер кірчелер: толдырығлығ паза законнар сығарчатхан ӱлгӱлер, муниципалитеттер, халых организациялары, СМИ-лар, садығ, промышленность, ӱгредіг киреенің кізілері. Оларның тӱзімніг тоғызы сылтаанда, Ағбаннаң ӧнетін чаа операциязынзар пастағы чорыхха чол азылды. Чоон таарлағлар тарт чӧрҷең «фура» паза ниикке чӧрҷең автомобиль чолға сығыбысханнар.
Гуманитарнай полызығ тӧстирінде паза аны ызарында араласчатхан волонтёрлар чааҷыларға ниме ызылчатханын чарытханнар. Тиксі тимнелген таарлағның кӧдірімі 40 тонна, хайда ӧӧнінде чааҷыларға киректелчеткен транспорт паза ӧнетін техника. Транспорттаң – УАЗ «Хантер», УАЗ «Фермер», ікі «Нива» автомобиль паза ікі мотоцикл, ӧнетін техникадаң – тепловизор, бронежилет, «квадрокоптерлер», «РЭБ» паза чуртағҷылар тимнеен чӱленҷең сеткалар паза пасха даа ниме-ноо.
– Пӱӱн піс ыраххы чолға сығарбыс пір «фуралығ» паза ниикке чӧрҷең автомобильліг. Орынзар пис кӱн аразына чидіп аларға кирекпіс. Лугансксар чидіп алза, тимнелген гуманитарнай полызығны чааҷыларға читірербіс. Авдеевка, Бахмут паза даа пасха чирлерзер тарадарбыс. Чааҷыларнаң тоғазып, оларнаң хада полчатханыбысты читірербіс, анзы оларға кӱс хосча.
![](/news/DSC_0639.jpg)
Мині республикада чааҷыларға полызығ ысчаң пірге кін тӧcтелгені ӧріндірче. Амды ол гуманитарнай хабазығны ызарын хайығда тудар. Полған на волонтерның пос тимнеен нимені СВО-зар ысчаң оңдай пол килген. Пӱӱнгі кӱннең сығара Хакас Республиканың правительствозы гуманитарнай полызығны ызарында полысча. Хабазығны апарарына ікі «фура» пирілер, сағам пастағызы чорыхха парча, пір неделя пазынаң – ікінҷізі, ізенербіс, алызығлар пол парбас тіп. Пірге кін парда, волонтерларның тоғызы нииктелче тирге чарир, – чоохтаан Хакасияның Ада чир-суғ чааҷылары сӧбірелерінің комитет (КСВО) устағҷызы Надежда Узунова.
Пілдістіг, волонтерларның тоғызы ниик полбас. Чаалазығ парчатхан орыннарзар парарға хорғыстығ, че, чир-суғҷылардаңар сағыссырап, олар, посты турыстығ тудынып, кӧңнілерін кӧдірерге кӱстенчелер.
– Мин мындағ чорыхха пизінҷізін сыхчам. Иң чочыныстығ Белгород облазында, анда хатығ атыстар парча, аннаңар хай пірее чирлерзер чол чабыл парған. Ол сағам піс апарчатхан гуманитарнай полызығны пирер чирлернің иң хорғыстығ орны. Піс ЛНР, ДНР, Запорожье, Херсон паза Белгород областьтарынзар хабазығны читірербіс, – таныхтаан КСВО-ның Таштып аймаандағы пӧлиинің устағҷызы Людмила Круговых.
Хакасияда мындағ тоғысчы ӧме пастағызын на тӧстелген, че ол пістің чааҷыларға паза оларға полызарға сағынчатханнарға уғаа кирек. Аның ӧӧн пӧгіні – гуманитарнай полызығны сидіксіністер чох чааҷыларыбысха читірер оңдайлар тӧстирі. Аннаңар прай структуралар оой нимес тоғысты, хада-пірге тудынып, толдырчалар.
Сомнар Дмитрий Сунчугашевти
Автор :
Наталья Тюкпеева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде