Хазыр тоғазығлар сағыпчалар
31.07.2024
Хабарлар
Команданың ӧӧн тренері Евгений Ерахтин тренировка пастабысты
Спорт. Пу наада меспектіг хоккейҷе Россия чемпионадының суперлигазында ойнапчатхан «Саяны» команда позының теестегі тренировказын иртірді
Пу олаңай ла тренировка полбаан. Аны кӧріп аларға, хоккеисттернең тоғазарға СМИ тоғынҷылары хығыртылғаннар. Меспектіг хоккейҷе Россия чемпионадының суперлигазындағы наа сезон азылар алнында мындағ тоғазығ иртірері хаҷанох кибірге кір парған. «Саяны» команданың ӧӧн тренері Евгений Ерахтин постарының пӧгіннерінеңер чоохтап пирче, командаа алылған наа хоккеисттернең таныстырча, тренировканы кӧріп аларға хығырча. Хабарҷыларның піреезі командаа алылған наа спортсменнернең тоғазып, чоохтазып аларға сағынчатса, аны хығыр пирче.
Евгений Николаевич Ерахтиннің сӧстерінең, пістің команданың ӧӧн пӧгіні 2024-2025 чыллар сезонында меспектіг хоккейҷе Россия чемпионадының суперлигазында ойнапчатхан иң кӱстіг 10 команда санына кіріп алары полча. Пістің командаа суперлигазар сығып аларға Хакасия правительствозы маңат хабасхан. Мыннаң мындар даа полызар полча. Аннаңар хоккеисттер андағ киртініске турыстығ ойнирға парчан кӱстерін паза устарын саларға тимделер.
«Саяны» команданың ӧӧн тренерінің искірии хоостыра, пістіңнерге пӱӱл пис наа кізі хозылтыр. Итсе, оларның пірсі Василий Жаукенов «Саяныда» меспектіг хоккей ойнап пастаптыр. Мыннаң сығара аны Хызылчардағы «Енисей» командазар хығырып алтырлар. Анда ол суперлигада ойнаптыр. «Енисейдең» сығара Иркутсктағы «Байкал-Энергиязар» парыбыстыр. Анда ідӧк суперлигада ойнаптыр. Амды ибзер нандыра айланды.
Андрей Осипенков Хызылчардағы «Енисейдең» піссер килібістір. Ол даа аймах-пасха командаларда узын сынирға маңнантыр, сыбыра суперлигада ойнаҷаң осхас. Аннаңар даа пістіңнер пу улуғ опыттығ хоккеист командабыстың арачыланҷаң кӱзін тыыдарға, пасхаларына маңат кӧзідім поларға кирек тіп матабох ізенчелер. Итсе, Андрей Осипенков кӧп чоохтанмас кізі полтыр. Хабарҷыларның сурығларына хысхаҷахти ла нандыр салчатхан. Мин пеер позым позымны махтирға килбеем, маңат ойын кӧзідерге сағынчам теен сӧcтері прайзыбыстың кӧңнібіске кірген. Іди поларға кирек.
Саңай пасха хылыхтығ кізі полтыр Егор Егорычев. Ол «Саянызар» Мурманск городтаң килтір. Итсе, пу аның тӧреен чирі ле. Пасха хоккеисттер чіли, Егор ідӧк аймах командаларда ойнирға маңнантыр. Пістің команданың ӧӧн тренері аны пеер Хызылчардағы «Енисейдең» сығара чӧптеп алтыр.
Чоохчыл оол хабарҷыларның сурығларына алғым, толдыразынаң нандыр пирерге кӱстенген. Чоохтазығ аразында ол килістіре хаңалҷостаныбыс турчатхан. Алай саблығ спортсменнернің чуртастарынаң килістіре тиңнестіріглер, пасха даа чапсых кӧзідімнер ағыл турған. Андағ кізінең хынығ чоох-чаахнаң нинҷе дее турчадарға чарир. Ол даа сылтағнаң Мурмансктаң килген хоккеист пістің хыринда прайзынаң ӱр тудылған.
– «Саяны» хомай команда полған полза, суперлигазар хаҷан даа сых полбасчых. Хайди удурлааннар ба? Мин мындағы оолларны прайзын даа чахсы таныпчам. Марығлар тузында сыбыра тоғасчабыс нооза. Аннаңар мында позымны пасха кізее санабинчам, ибдегі чіли тудынчам, – чалахай кӱлімзірепче пістің командаа хозылған наа хоккеист.
«Саянының» хайдағ ӧӧн читпес сариларын таныхтирҷыхсар тіп сурығ пирілгенде, Егор Егорычев кӧмес сағысха тӱскен. Анаң пістіңнер иң пастап суперлигада ойнирға чахсы кӧніккелектер теен. Анзы ойыннар тузында, тоғыртын кӧріп одырчатса, харахха матап тасталчатхан осхас. Ол сылтағнаң тоғазығ парчатса, хоккеисттер маңзырапчатханнарын сизінерге чарир тіп паалапча командаа наа хозылған оол.
«Саяны» олған спорт школазынзар чӧрген, аның ӱчӱн тиң частығлар аразында аймах марығларда турысхан ікі оолны Евгений Николаевич сыныхтағ оңдайынаң «Саяны» команданың ӧӧн составына кирерге чарадығ алыбысхан. Андрей Воробьевха даа, Руслан Галеевке дее андағ тимненіс туза ағыларын прайзы даа чахсы пілче. Аннаңар суперлигада ойнапчатхан ӧӧн командаа алылған чииттернің хайзы даа хатығ сыныхтағ иртерге килізерінең тиңнестірчелер. Андрей дее, Руслан даа, тиң частығлар санында меспектіг хоккей ойнап, махтаға сыхчаңнар.
– Пабам Андрей Галеев 1980 – 1990 чылларда, «Саяны» командада ойнап, матап сабланҷаң. Улуғ частығ кізілер аны ам даа ундутпинчалар. Мині тохтадып алып, пабаңа турыстығ ойнирға кирексің тіп кӧӧктірчелер. Андағ хайығ мағаа наа кӱc хосчатханға тӧӧй, – чоохтапча чиит хоккеист.
«Мин Андрей Галеевті ле кӧріп алар ӱчӱн стадионзар килдім... Прайзы іди чахсы ойнаҷаң полза, піcтіңнер хаҷанох СССР чемпионы поларҷыхтар», – 1980 чылларда чоохтас турҷаңнар «Саяны» стадионзар чыылысхан кӧрігҷілер, теестегі тоғазығ тузында Андрей Галеев нинҷе-де гол кирібіскен соонда.
«Саяны» команданың ӧӧн пӧгіннері хоостыра, хоккеисттер 10 орғахха теере Ағбандағы стадионда теестегі тренировкаларны кӱнде ікі хати иртір турарлар. Анаң Хызылчарзар парарлар. Анда арған пустығ чабых стадионда тренировкалар 1 ӱртӱнге теере иртерлер. Мында хоккеисттер, ӧӧнінде физическай упражнениелер ле толдырып, удур-тӧдір футбол ойназарлар, Хызылчардағы чабых стадионда пуста чыларға, хоккей ойнирға кӧнігерлер. 1 ӱртӱнде, тізең, Кемеровта меспектіг хоккейҷе Россия Кубогы ӱчӱн арға-мӧрій пасталар. Анда чыл сай даа кӧп команда араласча.
– Меспектіг хоккейҷе Россия чемпионадының пӧзік лигазындағы командалар даа анда устарын сынир ондайлығлар. Піске пастағы тоғазығда Хызылчардағы «Енисей» команданаң ойнирға килісче. Пу марығда оолларыбыстың тимненізі кӧрін парар. Олох арға-мӧрій тузында команданың алҷаастары ілезіне сығар, – ӱлесче хабарҷыларнаң позының сағыстарынаң ӧӧн тренер.
Анаң кемге-де холын пулахтат сыххан. Кемнең іди матап изеннесче тіп, андар хылчаңнапчабыс. Хара пасхаҷыл кирек, хоккеиcттер теестегі тренировка иртірчеткен арған футбол чазызының ізігі хыринда кізі илееде чыыл партыр. Ырах арах таа полза, Евгений Николаевич Ерахтин хабарҷыларға ниме чоохтапчатханын ситкіп тыңнапчалар. Оларның аразында «Саяны» пазылған футболкалар кис салған саарбахтар кӧрінчелер. Улуғ частығлар аразында таныстар даа пар.
Аннаңар хабарҷыларнаң тоғазығ тоозылғанда, сала даа ікінҷілес чох улуғларзар пастырғабыс. Спорт ветераннары аразында турғлапчатхан таныстарнаң пістің команданың таңдағызынаңар хайди чоохтазып албас. Піс прай сурығларны олаңай кӧрігҷілер хараанаң паалапчабыс нооза. Постары хазыр марығларда араласхан, чир-суғҷыларыбысты маңат ойыннаң ӧріндір турған улус, пӱӱнгі кӱндегі чииттерзер кӧріп, ирткен чылларны сағысха кирче полар. Аннаңар оларның аразында даа чоох-чаах ӱзілбинчеткен.
– Валера, син «Саяны» суперлигада ойнапчатханда, марығларға хада чӧр турғазың ма? – сурча Евгений Баженов, Евгений Ерахтиннің пастағы орынҷызы полып ӱр чыллар тоғынған хоккеист.
– Чӧрбин зе. Ікі чыл изере, – сах андох ӱндесче «Саяны» командада ойнаан Валерий Аршанов, спорт ветераны.
«Саяны» команданың хоккеисттері, тізең, ол туста теестегі тренировканы узарадып, хазыр тоғазығларға тимненчеткеннер.
Сом Дмитрий Сунчугашевти
Автор :
Анатолий Султреков
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
