Кем Хакасиядағы тӧллiг малларны садысча?
02.08.2024
Хабарлар
Симментал тӧлліг малларны сӱтке дее, итке дее тударға чарир
Аал хонии. Алтай аймаандағы Хойбал аалда орныхчатхан «Алтай» ООО он чыл азыра симментал тӧллег маллар ӧскiрерiнең айғасча
Хакасияның паза хонҷых регионнарның фермерлерi аразында сӱт-ит кӧстеглiг час туур паза хазыралар кирексiнiсте. Амды предприятиеде маң чох тус: саалчатхан iнектер чазыда оттапчатхан туста, тоғынҷылар хазааларны иптепчелер, мал азиин пилетепчелер паза пызоларны ӧскiрчелер – посха ла нимес, че iдӧк садыға.
«Алтай» ООО-ның фермазында прай 960 пас iнек саналча. Саалчатханнарның саны – 400 пас. Зоотехник Татьяна Куригешеваның чооғынаң, пiр чылға саалчатхан пiр iнектең ортымахти 5040 килограмм сӱт саап алчалар.
– Чыл сай тiзi малларның 10 процентiн садыбысчабыс. Ол 30 – 40 тӧллiг хазыра. Садысчатханнарның санында Хакасия ла нимес, че iдӧк Тува, Иркутск облазы, Кыргызстан паза Казахстан. Симменталлар – уғаа чахсы маллар, кӧп сӱт пирчелер, итке дее тударға чарир, аннаңар оларны аал хонии предприятиелерi дее, фермерлер дее хынып тутчалар.
Таныхтирға кирек, симментал тӧллiг iнектер сӱдiнiң кiзiгi ортымахти 4 процент асча. Оларның пызолары килкiм тӧрiпчелер паза табырах ӧсчелер. Пiр частығ пуғаҷахтарның кӧдiрiмi 300-че килограммға читче.
Чайғы тооза «Алтай» ООО-ның маллары чазыларда чӧрчелер. Ол туста фермада хыстаға тимненчелер. Хазаалар тыхтал парғаннар. Пызолар ӧскiрерi – алынҷа тоғыс. Оларны посха ла нимес, че iдӧк садыға ӧскiрчелер. Амды предприятие 50 час туур паза 56 хазыра садыбызарға тимде.
Хазна президентi чарадии хоостыра 2030 чылға Россияда аал хонии ниме-ноо сығарызы 25 процентке ӧс парарға кирек, аал хонииндағыларға хабазығлар пирiлче, ол санда сӱт сығарызы паза аны сатхан ӱчӱн субсидиялар. Республиканың читi аал хонии предприятиезi паза 15 кресен-фермер хонии андағ хабазығны алча. Iдӧк iнектер сағҷаң оборудование, тӧллiг маллар паза мал азиин пилетеҷең техника садызарына хазна хабазии пирiлче.
Сом r-19.ru сайттаң
Автор :
Хакасияның аал хонии паза ас-тамах министерствозының пресс-службазы
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
