Россия чиңiсчiлерi
02.08.2024
Хабарлар
Боксча Россияның чоннар аразындағы спорт узы Сергей Слободян
Арға-мӧрiйлер. Чылығ туста спорттың аймах-пасха кӧрiмнерiнҷе марығлар тӧремiл иртедiрлер. Анда пiстiң чир-суғҷыларыбыс аралазыбохчалар, маңат тимненiс кӧзiтчелер, ибзер медальлығ айланчалар
Москва хыриндағы Иванов городта тиксi Россия синiндегi ӱгренҷiлер аразында чыл сай иртiрiлчеткен «Тууп меспек» марығның азах мееттегi тоғазығлары хазыр оңдайнаң тоозылдылар. Анда 2011-2012 чылларда тӧреен хызыҷахтарның командалары араласханнар.
Пiстiң республика ӱчӱн мындағ улуғ арға-мӧрiйде Абазадағы «Металлург-АСШ» команданың хызыҷахтары ойнааннар. Чир-суғҷыларыбыс азах меетке сығып алар таллағлығ ойыннар тузында маңат тимненiс кӧзiткеннер, чиңiс соонаң чиңiс тут турғаннар. Iди азах меетке читкеннер. Анда даа маңат тимненiс кӧзiт турғаннар.
Пастағы орын ӱчӱн Абазадағы хызыҷағастарға Самарадаң килген «Кристалл» команданаң ойнирға килiскен. Пiстiңнер 3:1 саннаң чиңiс тутханнар, Россия чемпионы полыбысханнар. Махтағлығ чидiг. Пу марығда ӱзiнҷi орынны Ставропольенiң командазы холға кирген.
– Пiстiң хызыҷахтарны мындағ чидiгнең алғыстапчам. Iдӧк оларның тренерлерiн Никита Евгеньевич Кащицтi паза Евгений Брониславович Кащицтi алғыстапчам, наа чидiглер алғапчам, – cоцсетьтегi позының страницазында пас салған Хакасияның пазы Валентин Коновалов.
Алтын паза кӱмӱс медальлар
Чебоксары городта кинек спортсменнер аразында ниик атлетикаҷа Россия чемпионады ирткен. Анда Хакасиядаң 3 кiзi араласхан: Аян Идимешев, Даниил Кашин паза Иван Кулаженков. Хазнабыстың 54 регионынаң 386 кiзi чыылысханы искiрiлген.
Чир-суғҷыбыс Даниил Кашин, 800 м чӱгӱрiп, алтын медаль утхан, 1500 м чӱгӱрiп, кӱмӱс медаль холға кирген. Пiстiң спортсменнернi марығларға тимнепче тренер Михаил Хоботов. Чир-суғҷыларыбыс ниик атлетикаҷа Россияның пiрiктiрiлген командазына кiрчелер.
Ӱзiнҷi орында
Уфадағы Р.А.Баталованың адынаң спорт ӧргезiнде грек-рим кӱрезiнҷе тиксi Россия синiндегi чайғыдағы IХ Универсиада ирткен. Мындағ улуғ арға-мӧрiйде Хакасиядағы Н.Ф.Катановтың адынаң Хакас хазна университедiнiң студентi Руслан Палтушев позының узын сынаан.
Руслан Уфада 55 кг кӧдiрiмде харбасхан. Сыйыхтығ орынға сығып алар ӱчӱн, чир-суғҷыбысха чарым финалда харбазарға килiскен, чиңiс тутхан, ибзер хола медальлығ айланған. ХГУ-зар кiрер алнында чиит оол Ағбандағы Олимп резервi училищезiн (техникумын) тоосхан.
Руслан Палтушевтi марығларға аның тренерлерi Александр Худяков паза Валентин Кольчиков тимнепчелер.
Сергейнiң ӧрiнiзi
Улуғ спортсар пастағы хаалағларны Саяногорск городта иткен Сергей Слободян «Боксча Россияның чоннар аразындағы спорт узы» аарластығ атха турысханын улуғ ӧрiнiсте удурлады. Пу чидiг позы ла килбеен. Аннаңар боксер оол пастағы тренерi Виктор Семёнович Кочелоровнаң ӧрiнiзiнең ӱлезерге маңзыраан.
В.С.Кочелоров ӱгренҷiзiн андағ пӧзiк атха турысханынаң чылығ алғыстаан, мыннаңох артых чидiглерге чит турарға алғаан. Виктор Семёновичтiң сӧcтерiнең, Сергей школада ӱгренчеткендӧк аймах марығларда аралас турған, чиңiстер тутчаң. Аның пик сындырлығ хылии, сыбыра чиңiске кӧстеглiг полчатханы андадох харахха матап тасталчатхан.
Амды Сергей Слободян Россияның саблығ тренерi Николай Дружининнiң холында марығларға тимненче. Николай Фёдорович Хакасияда кӧп чахсы боксёр ӧскiр салған. Мында иң пастап чоннар аразындағы класстығ спорт узы Саяна Казыгашеваны адирға чарир. Аның илееде ӱгренҷiлерi Россияның спорт устары полыбысханнар, аймах-пасха марығларда сыйыхха турысчалар.
Пӱӱнгi кӱнде Сергей Слободян 92 кг кӧдiрiмде марығласча. Россия паза чоннар аразындағы синде иртчеткен арға-мӧрiйлерде узын сынап, чир-суғҷыбыс удаа сыйыхтығ орыннарға сығып алча. Аның узы тӧремiл ӧсчеткенiн ол марығлар тузында тилекей чемпионнарын даа утып алчатханы маңат киречiлепче. Сергей Хакасияны ам даа ӱр тус махтаға сығар турарына iзенербiстер.
Нард паза дартс
Хакасияның нардча федерациязы 2023 чылның кӧрiк айында ла тӧстелген. Пу наада, тiзең, пiстiң спортсменнерiбiс пастағызын на Сибирь паза Ыраххы Восток регионнары аразындағы марығда араласты. Арға-мӧрiй Хызылчарда ирткен. Анда 15 регионнаң 120 кiзi араласхан.
Улан-Удэ городта ирткен чоннар аразындағы дартсча марығда, тізең, Вячеслав Доценко кӱмӱс медаль утып алған. Россия синiндегi арға-мӧрiйде узын сынап, хола медаль холға кирген. Хомай нимес кӧзідім тіп паалирға чарир.
Аның тренерi Роман Лежнин, Чита городта ирткен «Забайкалье Кубогы» регионнар аразындағы арға-мӧрiйде аралазып, ибзер алтын медальлығ айланған.
Сом интернеттең
Автор :
Тимнеен Анатолий Султреков
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
