Малларны санға турғызарға
02.08.2024
Хабарлар
Аал хонии. Асхыста Россиядағы, Хакасиядағы паза Асхыс аймаандағы эпизоотическай кирекке чарыдылған чыылығ ирткен
Ол аймах аал хонии устанызы кӱстенiзiнең иртірілген. Чыылығны аймах пазы орынҷызы Николай Асочаков апарған. Анда Хакасияның ветеринар устанызының устағҷызы Евгений Баулин, аал чӧптерiнiң пастары паза кресен-фермер хоныхтарының кiзiлерi араласханнар.
Николай Асочаков, чыылығны азып, пӱӱл хысхызын Асхыс аймаанда полған киректi сағысха кирген. Чуғынҷах узелковай дерматит ағырығ тарап сыхханнаңар, мал тутчатхан кiзiлер улуғ ӱреге кiргеннер.
Евгений Баулиннiң чооғынаң, Россия Федерациязының чирлерiнде хорғыстығ ағырығларҷа эпизоотическай кирек хомай. Сосхаларның африкадағы чумазы ағырығҷа ағырсымнығ сурығ турча. Пӱӱнгi кӱнге пу ағырығ Кемеров облазының чирлерiнде сығысхан, аннаңар пос хоныхтарында 600 пас сосха чох идiлген. Таныхтирға кирек, сосхаларның африкадағы чумазы ибiркiдегi оңдайларда хайтпинча. Амғы тусха ағырығдаң тоғыр профилактика иртірҷең оңдайлар чоғыл, аннаңар ағырығ сығыс килген орыннаң 20 километрге теере оортах прай сосхалар чох идiлчелер.
2023 чылда Ағбанның паза Харатастың садығ тураларында ағырығ сосха идiнең тимнелген полуфабрикаттар табылғаннар. Сосхаларның африкадағы чумазы тарабас ӱчӱн, регионзар сосхаларны паза мал азиин ветеринар устанызы чарадии чох ағыларға чарадылбинча. Iдӧк хоныхтарда нинҷе пас сосха парын пілер ӱчӱн ветеринар сананызын иртiрiбiзерге кирек. Ирткен чылдаң сығара наа ветеринар правилозы чуртасха кирiлген – сосхаларны артхан-халған ас-тамахнаң азырирға чарадылбинча. Евгений Баулин сизiндiрген, сосхаларны сығарарға чарадылбинча. Ағырығ хабаннардаң чух парарынаң хорғыс пар.
Ветеринар устанызының пастығы ящур ағырығдаңар чоохтаан. Ол iдӧк хорғыстығ ағырығлар санында. Ящур малдаң кiзее чух парарға айабас. Хайнатпаан сӱттi iссе алай читiре пызырылбаан иттi чiбiссе, пу ағырығны хаптырып аларынаң хорғыс пар. Олғаннар аны оой чухтырып алчалар. Пӱӱнгi кӱнге пу хорғыстығ ағырығ хонҷых регионнарда паза Монголияда тарапча.
Россия регионнарында iдӧк хазыхха улуғ ӱрег ағылчатхан хус кискегi тарапча. Хакасиязар ол ағын хустарнаң килерге айабас. Ол кiзее чух парча. Ағырығ хусты хойрал парған мойнынаң сизiнерге чарир. Пiрее ағырығ хустар азыранминыбысчалар. Пу ағырығ имнелбинче. Ибдегi хус кискекнең ағырыбысханына чiгленiс полза, ветеринар устанызынзар айланарға кирек.
Чыылығда ӱзӱрiлген сурығларның пiрci аал хонии малларын пiчiкке турғызары полған. Пӱӱл кӧрiк айында сыххан Россия правительствозы чарадии хоостыра чуртағҷыларға малларын хайди даа таңмалирға киректелче. Пӱӱнгi кӱнге иң тарап парған таңма чип турғысханы полча. Пылтыр Хакасияа пу пӧгiнге 300 муң салковай позыдылған, пӱӱл кiзiлерге малларын пос ахчазына таңмалирға чӧп пирілген. Республика бюджедiнiң ахчазына чиптер алылар, че тоғыс ӱчӱн чуртағҷылар постары тӧлирлер.
Ӱртӱн айына теере Хакасияның кресен-фермер хоныхтары iнек малларын cанға турғыс саларға киректер, 2025 чылның кӧрiк айына теере пос хоныхтары – аттарын, пӱӱл – хойларның паза ӧскiлернiң 50 %. Пiчiкке кирiлген не маллар ӱчӱн федеральнай бюджеттең мал имiн аларына субсидия пирiлер.
Сом интернеттең
Автор :
Асхыс аймаа устағ-пастааның пресс-службазы
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
