Таңдағы сессияда ӱзӱрерлер
07.08.2024
Хабарлар
Ӧӧркі Чӧп. Хакасияның Ӧӧркі Чӧп президиумы «Хакас Республика столицазының статузынаңар» закон проектіне пір ӱннең чарадығ пирген
Закон сығарҷаң пастағның авторлары Ағбан городтың депутаттар чӧбі паза Хакасияның Ӧӧркі Чӧп кнезі Сергей Сокол полчалар. Закон проекті республика парламентінің теестегі нимес сессиязының кӱн суриина кирілген, сессия орғах айының 8-ҷі кӱнінде иртер.
Закон проекті хоостыра Ағбанның чирінде чыылған НДФЛ-ның 5%-і городтың бюджедінзер кір турар тіп кӧрілче. Ирткен чылның салтарларын алза, ол ахча 280 миллион салковайҷа полар.
«Законны албазына тӧcтеглер чоғыл. Закон проекті прай кирек чӧптезіглерні паза тоғыстарны иртібіскен. Хакасияның юстиция министерствозынаң, прокуратуразынаң, Ӧӧркі Чӧптің право пӧлиинең оңнығ паалағлар алылған. Хакасия правительствозы ла тоғыр полча. Че іди дее полза, комитет араласчылары депутаттарға законны аларға чӧп пирерге чарадығ алғаннар», – чоохтапча орындағы пос устанысча комитеттің кнезі Роман Челтыгмашев.
Ідӧк комитеттің чарадиинаң Хакасия пазының тӱзедии хыйа иділген, комитет устағҷызы искіриинең: «тӱзедігде федеральнай законодательствода чох полчатхан терминология тузаланылча».
«Правительство Ағбанға хоза ахчаны хазна программалары пастыра читір турарға чӧпнең сыхча. Олох туста НДФЛ-ҷа 5 проценттіг ахча, хайзын Ағбан бюджеді бюджеттер аразындағы трансферт чіли ал турар – ол хайди даа кір турҷаң ахча, физическай кізілернің парыстарына налог иң не чахсы чыылча паза нинҷе кірері азынада пілдістіг полча нооза», – таныхтапча Хакасияның Ӧӧркі Чӧп кнезінің пастағы орынҷызы Пётр Воронин.
Таныхтирға кирек, республиканың Конституциязында Хакасияның ӧӧн городы Ағбан полча тіп кӧзіділ парған. Че столицаның статузы регионның килістіре законынаң алыл парарға кирек, ол ниме, тізең, амғы тусха теере иділбеен.
Сергей Соколның чӧбінең пӱӱл часхызын закон проекті халыхтар ӱзӱріглерін иртібіскен. Аны алар ӱчӱн Ағбанның 75 муңа чағын чуртағҷызы ӱнін пирген.
Сом Ӧӧркі Чӧп сайтынаң
Автор :
Хакасияның Ӧӧркі Чӧбінің хабарлар пӧлии
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
