Пастағы медаль
07.08.2024
Хабарлар
Мирра Андреева (сол саринаң) паза Диана Шнайдер, кӱстіг ойнап, кӧрігҷілерге кӧп ӧрініс сыйлааннар
Спорт. Теннисисттер Мирра Андрееванаң Диана Шнайдер Олимп ойыннарының кӱмӱс призерлары полыбысханнар
Парижте Олимпиада хыызында парча. Арға-мӧрійнің 9-ҷы кӱнінің ӧӧн матырларына тенниснең айғасчатханнарны санирға чарир. Ир кізілернің аразында Новак Джокович чиңіс тутхан. Серб чонның саблығ оолғы тилекейнің иң улуғ мариинда 2008 чылдаң узын сынапча. Че пизінҷі Олимпиадада ла ол алтын медальны холға кирген. Амды Новак Джокович «Улуғ шлемнің» прай турнирлерін (Австралияның азых чемпионады, «Ролан Гаррос», Уимболдон, США-ның азых чемпионады) паза Олимпиаданы утхан спортсмен полча. Алында пу чидіге Андре Агасси, Штеффи Граф, Рафаэль Надаль паза Серена Уильямс читкеннер.
Ідӧк 4 орғах Россия чуртағҷыларына танығлығ. Ол кӱн Мирра Андрееванаң Диана Шнайдер ікілердең марығда алтын медаль ӱчӱн харбасханнар. Пӱӱл Олимп ойыннарында пістің хазнадаң 15 кізі араласча, олардаң 7 спортсмен – Даниил Медведев, Роман Сафиуллин, Павел Котов, Мирра Андреева, Диана Шнайдер, Екатерина Александрова, Елена Веснина – теннисте кӱзін сынаан. Россия теннисисттеріне Олимпиадада тӧреміл оң поладыр. Хазнабысха пастағы алтын медальны Евгений Кафельников 2000 чылда ағылған. Пекинде прай пьедестал пісти полған. 2008 чылда ипчілер аразындағы марығда чиңіс тутхан Елена Дементьева, Динара Сафина ікінҷі орынға сыххан, Вера Звонарёва – ӱзінҷі орынға. 2021 чылда Токиода теннисисттерібіс ӱc медаль утханнар: пір алтын паза ікі хола. Аннаңар Парижте 7 спортсменнің піреезі сыйыхтығ орынға сығар тіп ікінҷілес чох полған.
Кізілер ӧӧнінде Даниил Медведевке ізенгеннер. Пӱӱнгі кӱнде Медведев тилекейнің пизінҷі ракетказы полча нооза. Че Олимп ойыннарында кирек сағыбаан оңдайнаң парыбысхан. Саблығ спортсмен ир кізілер аразындағы марығда азах мееттің сигізінҷі чардығында утыр салтыр. Миксте Медведев кортха Мирра Андрееванаң хада сыххан. Олар пастағы хурчағда чиңдір салғаннар. Ікілердең марығда теннисист Роман Сафиуллиннең хада ойнаан. Спортсменнерібіске ідӧк оң полбаан.
Елена Веснина пӱӱл Олимпиадада пизінҷі хати араласты. 2016 чылда ол, Екатерина Макарованаң хада-пірге ойнап, чиңіс тутхан, 2021 чылда миксте Аслан Карацевнең хада Россияа кӱмӱс медаль ағылған. Парижте абахай спортсмен Екатерина Александрованаң хада ікілердең марығда узын сынаан. Хыстар прай кӧңнілерін cалып ойнааннар, че пастағыох тоғазығ утырыснаң тоозылған: 6:2, 6:7, 6:10. Ойын ӱc сеттең пӱткен, ол 1 час 45 минута парған. Медведевнең паза Сафиуллиннең тиңнестірзе, Веснинанаң Александрова кортта хай-хай турыстыра кӧрінгеннер.
Ізенген спортсменнер утырчатханда, «ағырчатхан» улус Мирра Андрееваның паза Диана Шнайдернің кирее килізер ни тіп ікінҷілеп сыххан. Ікізі дее чиит, Олимп ойыннарында пастағызын на араласча. Итсе, Хызылчарда тӧреен 17 частығ Андреева пӱӱл «Ролан Гарростың» чарым финалына читкен паза Яссыда (Румыния) ирткен турнирде чиңіс тутхан. 20 частығ Диана Шнайдер Самара облазынаң. Ол хайдағ даа чабығда – отта, хардта паза грунтта – ойнирға кӱс. 2024 чылда спортсмен ӱс марығда чиңіс тутхан. Че ӧӧні алында хада ойнабаан хыстар пастағы тустаң сығара оой пілізіп алғаны полча.
Азах меетке сығар алнында, абахайларыбыс соон сӱрістіре пис параны чиңіп алғаннар. Олар пастап Айла Томляновичнең Оливия Гадекині (Австралия) утып алғаннар, анаң – Габриэла Дабровскинең Лейла Фернандесті (Канада), Катержина Синякованаң Барбора Крейчикованы (Чехия) паза Кристина Букшинең Сара Соррибес-Тормоны (Испания). Сах андох хабар тараан: Россия спортсменнері алтынны утып алар оңдайлығлар. Финалда пістің хыстар пӧзік устығ Сара Эрранинең паза Ясмин Паолининең (Италия) тоғасханнар. Пастап Андрееванаң Шнайдер 6:2 саннаң чиңіc тутханнар. Че ікінҷі сеттең «ыырҷылар» пик хылыхтарын кӧзіткеннер, сан – 1:6. Ӱзінҷі чардых 7:10 саннаң тоозылған. Чир-суғҷыларыбыс кӱмӱc медаль утып алғаннар. Ол Россия чонына алтын чіли пызыңнапча.
Пӱӱнгі кӱнде Мирра Андреева Францияда чуртапча, Диана Шнайдер – США-да. Ікізі дее Ада чир-сууна хынча, че пістің хазнада чахсы корттар чидіспинче. Диананы пасха хазна ӱчӱн ойнирға чӧптептірлер. Ол теен:
– Cаарбах тузымнаң Россия ӱчӱн турысчам. Сағыс-кӧрізімні алыстыр полбаспын.
Мирра Андреева полған на интервьюда Хызылчар тӧреен-ӧскен городым полча тіп искірче. Россияның піріктірілген командазы Олимп ойыннарында араласхан полза, медальлар саны хай-хай кӧп поларҷых, че политика харығ пол парды. Сидік оңдайларда Мирраның паза Диананың матлама чидиине ӧрінерге халча.
Сом интернеттең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
