Тӱзiмніг тоғынчатханнарға – сыйыхтар
09.08.2024
Хабарлар
Хакасия пазының орынҷызы Михаил Побызаков паза тренер Пётр Чезыбаев
Спорт. Хакасия правительствозында пӧзік чидіглерге читкен тренерлерні паза спорт киреенде тоғынчатханнарны чеестееннер
Пістің хазнада орғах айы ӱлӱкӱннерге пай. Оларның пірcі спортнаң айғасчатханнарға чарыдылған. Физкультурник кӱні – чыл чӧрчеткен пайрам, пӱӱл аны 10 орғахта таныхтирлар. Ӱлӱкӱнге удур Хакасия правительствозында сыйыхтас ирткен.
Мероприятиені асхан республика пазының орынҷызы Михаил Побызаков. Хайди таныхтаан Михаил Анатольевич, Хакасияның спорт сферазында істенчеткеннер улуғ тоғыс итчелер. Олар чонны хазых чуртасха тартчалар. Спортменнер пӧзік чидіглерінең Хакас чирін ырахха сабландырчалар. Итсе, политика спорт тилізіне харығ полча. Пу кӱннерде прайзы Олимпиадада Наталья Малышева ӱчӱн «ағырарға» пӧгінген. Олимп лицензиязын утхан чир-суғҷыбыс турыстыра харбазарҷых тіп ікінҷілес чоғыл. Че спортсменнердең тоғыр кирілген хатығластар сағынған cағызыбысты сайбабысты.
Халғанҷы чылларда Хакасияда спорт сферазы хомай нимес тиліпче. Нацпроекттер хабазиинаң республикада наа спорт пӱдіріглерi саны пілдірте хозыл парған. Хазых чуртасха тартылчатханнарның саны ӧсче. Пу чидіглерде тренерлернің, спортсменнернің, физкультура ӱгретчілерінің, специалисттернің хозымы улуғ. Ӱлгӱдегілер оларға хаҷан даа хабазарға тимделер.
Алғыстастарға Хакасияның cпорт министрі Сергей Кочан хозылған. Сергей Владимирович, чыылған чонзар айланып, теен:
– Правительство спорт сферазын хайығда тутча. Амды пӧзік чидіглерге читкен спортсменнерге чурт аларға полызарлар. Піс Россия спорт министерствозынаң пик палғалыс тутчабыс. Анзы республикаа 2030 чылға теере кӧрілген тиліс программазынзар кіріп алар оңдай пирген. Наталья Малышеваның чидии киречілепче: Хакасияда олимпиецтерні тимнирге оңдайлығлар. Спорт пос салынмасха ӱгретче, аннаңар тӧдір пазынмаспыс. Прайзын ӱлӱкӱннең алғыстапчам.
Чылығ сӧстер сыйыхтаснаң узарадылған. Боксча саблығ тренер Николай Дружининге Россияның спорт министрінің алғыстазын читіргеннер. Николай Фёдорович кӧп оол-хысха спортсар чол асхан. Ӱгренҷілерінің санында чоннар аразындағы класстығ устар Саяна Казыгашеваны паза Сергей Слободянны адирға кирек. «Хакасияның физическай культураның паза спортының cаблығ тоғынҷызы» аарластығ атха турысханнар тренерлер Денис Лесков (дзюдо), Валентина Куш (ниик атлетика), Ирина Мордакина (стол теннизі), Н.Г.Булакиннің адынаң спорткомплекстің директоры Дмитрий Кремзуков. Хакасияның Аарластығ пічиин Пётр Чезыбаев (грек-рим кӱрезі), Олег Грушин (аар атлетика) паза Владимир Малецкий (шахмат) алғаннар. Он кізее Хакасия пазының алғыстазы читірілген. Сыйыхха турысханнарның санында спортсменнер Наталья Малышева паза Сергей Слободян, тренерлер Леонид паза Владимир Чучуновтар, Денис Карамчаков (олаңай кӱрес) паза Ибрагим Кильчичаков (бокс).
Наталья Малышеванаң чоохтасханда, ол пу Физкультурник кӱнін пасха оңдайнаң таныхтирбын тіп сағынғам теен. Киліспин парды. Абахай чир-суғҷыбыс – пик хуйахтығ кізі. Наташа аннаң андар кӱрезерге пӧгінче.
Пётр Чезыбаев тренер тоғызына 30 чыл пир салған. Ол Ағбанның аймах оңдайлығ харбазығлар спорт школазында істенче. Пӱӱнгі кӱнде Пётр Григорьевичтің холында 50 артиинаң пала узын сынапча. Ӱгренҷілердең Денис Черновты алынҷа таныхтирға кирек. Чиит кізі – Олимп резерві училищезінің (техникумының) cтуденті. Пӱӱл 3-ҷі курсха парар. Пылтыр Чернов, Россия кубогында турыстыра харбазыбызып, хазнаның чииттернің піріктірілген ӧмезінзер таллағ иртiбіскен. Пӱӱл кӱресчее турнирлерде оң полбиндыр, аны командадаң сығарыбысханнар. Спортсмен пос салынминча, ол ӱртӱн айында Хазанда иртер марыға тимненче. Тренернің чооғынаң, кирек килізерге кирек.
Ирина Мордакина хазии уйан улусты спортнаң айғазарға кӧӧктірче. Аның ӱгренҷілері стол теннизінҷе аймах-пасха синде иртчеткен марығларда тӧреміл сыйыхтығ орынға сыхчалар. 2021 чылда Ирина Александровна Токиода ирткен Паралимпиадада тренер чіли араласхан. Ол таныхтаан:
– Аарластығ атха турысханыма ӧрінчем. Аның ӱчӱн спорт министерствозына, паралимп резерві спорт школазының устағ-пастаана паза ӱгренҷілеріме алғызым читірчем. Прай тоғыс ӧменең иділче. Амды сағызыбыс Паралимпиадада. Пістің хазнадаң таллағны пис кізі иртiбіскен. Олар чӱрексіпчелер. Сынны чоохтаза, гимн паза флаг чох марығлазарға оой нимес. Анзын, Токиода полғанда, чахсы сизінгем. Іди дее полза, прайзы пістің cпортсменнер хайдағ хазна ӱчӱн турысчатханын пілче. Хакасиядаң таллағны Григорий Исаковнаң Александр Соколов ирткеннер, че оларға оң полбады. Паралимпиадада Саратов облазының, Крымның, Санкт-Петербургтың, Челябинск облазының паза Башкортостанның теннисисттері аралазарлар. Хазии уйан спортсменнерібіc, арға-мӧрійде араласса, ӱсче медаль утарға киректер. Оларның ӱчӱн «ағырарға» тимненчебіс.
Сом Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
