Он пис спортсмен, пір медаль
14.08.2024
Хабарлар
Каноэисттер Захар Петров (сол саринаң) паза Алексей Коровашков марығ тузында
Спорт. Парижтегі Олимп ойыннары тархынға кір парғаннар. Пістің оол-хыстарыбыс cидік оңдайларда марығласханнар
0,09 секунда читпеен
Теннисист хыстар Мирра Андрееванаң Диана Шнайдер ікінҷі орынға сыхханда, кӧрігҷілернің чӱреенде хомзыныс полған: «Алтын медальға кӧмес ле читпеді». Андада пірдеезі пілбеен: каноэнең чӱзерінде пісті драма сағир.
Россиядаң Олимп ойыннарында Алексей Коровашковнаң Захар Петров паза Олеся Ромасенко араласханнар. Пастағы спортсменнер ікілердең марығда 500 метр чӱскеннер. Захар Петров ідӧк 1000 метрде кӱзін сынаан, Олеся Ромасенко – 200 метрде. 32 частығ Коровашков – пӧзік устығ каноэист. Ол 2012 чылдағы Олимпиаданың хола призеры, тилекей чемпионадында пис хати чиңіc тутхан. Анализтерінде допинг табылған соонда ағаа ікі Олимп ойынын иртірібізерге киліcкен. Спортсмен пос салынмаан. Коровашков арғызы Иван Штыльнаң хада олимп лицензиязын утып алғаннар. Салтарында, Алексейге ле арға-мӧрійде аралазарға чаратханнар. Аннаңар тренерлер ікілердең марығда Коровашковнаң хада 22 частығ Захар Петровты турғыс салғаннар. Оңдайлар алыс парғанда, каноэисттерге пір ай аразына хада-пірге чӱзерге ӱгренерге киліскен. Ағаа хоза, Олимпиадада оолларыбысха пос кимезінең тузаланарға чаратпааннаңар, олар пасха кимее одырғаннар.
Таныхтирға кирек, каноэде тін чоғыл. Пу кимеде спортсменнер, пір тізекке турып, искілер полызиинаң чӱсчелер. Ікілердең марығда пірсі оң саринаң искіні тартча, ікінҷізі – сол саринаң. Коровашковнаң Петров ікізі дее искіні cол саринаң тартчаттыр. Специалисттер спортсменнерге ол читпес харығ пол парар тіп ухаанҷылааннар. Итсе, прайзы медаль хайди даа полар тіп ізенген. Анзы тиктең нимес. Квалификацияда оолларыбыс, олимп рекордын турғызыбызып, чарым финалға ирт парыбысханнар. «Ағырчатхан» улустың чӱреенде – ӧрініс паза поғдархас. Чарым финалда азах меетке олар прайзынаң пурун читкеннер. Че азах меет кӧрігҷілернің кӧңнін тӱзірген. Дистанция тооза ікінҷі орында парарға, халғанҷы метрлерде медаль чох халарға. Фотофиниш кӧзіткен: Коровашковнаң Петровха ӱзінҷі орынға 0,09 секунда читпиндір. Хайди таныхтаан Алексей, чил оң саринаң саапча, олар ікӧлең сол саринаң искілерін тартчалар. Пістің спортсменнер 500 метрні 1 минута 41,27 секунда аразына чӱзібіскеннер, олар суғҷа учухханнар тирге чарир. «Советский спорт» газета каноэисттерібістің утырызына чарыдылған материалны «Не по весло» тіп адап салған.
9 орғахта Захар Петров пазох пас меетке сыххан. Аны тренерлер 1000 метрде кӱмӱс медальны утып алар оңдайлығ тіп санааннар. Чиит оол 950 метрде сынап ікінҷізі парған. Соонаң харбазыға Исакиас Кейрос (Бразилия) паза Сергей Тарновский (Молдова) хозылғаннар. Петров медаль чох халған. Ол 0,06 секундаа утыр салтыр. Ачырғастығ. Олеся Ромасенкодаңар чоохтаза, ол марығның тӧртінҷі чардығында харбазығдаң сығыбысхан.
Россияа медальны Мирра Андрееванаң Диана Шнайдер ле ағылғаннар. Белорустарны махтирға кирек. 17 кізідең 4 спортсмен сыйыхтығ орынға сыххан. Батутта сегірісте Иван Литвинович чиңіс тутхан, Виолетта Бордиловскаяның кӱмӱc медаль. Ідӧк кӱмӱс призер полыбысхан Евгений Золотой (академическай гребля), штангист Евгений Тихонцов, тізең, 102 кг кӧдірімде хола медаль утхан.
Легионерлер
Пӱӱл Олимп ойыннарында Россиядаң сыххан 60 артиинаң спортсмен араласхан. Олар 17 медаль холға киргеннер: 6 алтын, 2 кӱмӱс паза 9 хола. Кӧбізі спорт гражданствозын пістің хазнадаң тоғыр хатығластар кирілген соонда алыстырған. Че піреезінің пасха сылтағ. Россияда кӱстіг кӱресчі илееде, аннаңар улуғ марығларға таллағны иртібізерге оой нимес. Кӧзідімге, пӱӱнгі кӱнде тилекейдегі олаңай кӱресте 74 кг кӧдірімде пастағы номерге Заурбек Сидаков саналча, 97 кг кӧдірімде – Абдулрашид Садулаев. Хатығластар полбаан полза, олар Россия ӱчӱн турызарҷыхтар. Пасхазына ниме идерге? Парижте 74 кг кӧдірімде Россия чемпионадының финалы ирткен тізе, саба полбас, неке. Медальлар ӱчӱн харбасханнардаң Разамбек Жамаловнаң Магомедхабиб Кадимагомедов Дагестанда тӧрееннер, Таймураз Салказановнаң Чермен Валиев – Алтынзархы Осетияда, Виктор Рассадин – якут чонның оолғы.
Легионерлернің чидіглері киречілепче: пістің хазнада пӧзік чидігліг спорт хомай нимес тиліпче, таланттығ чииттер кӧп. Че Россияның олимп комитеді, дипломаттар спортсменнерге хабазарға киректер. Оларның алнын албаза, паба-іҷелер палаларының спорттағы таңдағызына киртінерлер бе? Спортта чуртас хысхаҷах. Пір Олимпиадада араласханы улуғ чидіге саналча. Аннаңар 2026 чылда Италияда иртер хысхы Олимп ойыннарына спортсменнерге ле нимес, политиктерге тимненерге кирек. Хоза пір танығ. Тилекейнің иң улуғ марығларын кӧзітпеені – улуғ алҷаас. Малхадып, спортты тиліт полбассың.
Сом интернеттең алылған
Автор :
Майя Кильчичакова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
