Кӧстег – табығларны иптіг иртірері
22.08.2024
Хабарлар
Табығлар-2024. Россия президентінің Сибирьдегі федеральнай округтағы полномочиеліг кізізі Анатолий Серышев Сибирь регионнарындағы табығ комиссияларына 2024 чылның ӱртӱн айының 8-ҷі кӱнінде иртер табығларға тимненеріне паза иртіреріне ӱлгӱ органнары саринаң хабазар сурығларҷа координационнай чыылығ иртірген
Анатолий Серышев пу чыл Россия политика саринаң танығлығ киректерге пай полчатханын таныхтаан. «Часхызын Россия президентіне табығлар ирткен. Оларға тимненерінде паза иртірерінде Россия чоны пірге полғанын, кӱстіг хылиин паза суверенитедібісті тыыдарға кӱстенізін кӧзіткен. Ол табығлар закон хоостыра ирткенінҷе пір дее ікінҷілес чоғыл», – теен Россия президентінің СФО-дағы полномочиеліг кізізі.
Аның чооғынаң, чағдапчатхан пірге ӱн пиріс кӱні – президент табығларының соондағы пастағы улуғ табығлар, аннаңар олар андағох пӧзік синде ирт парарға киректер. 2024 чылның ӱртӱн айында Сибирьдегі федеральнай округтың регионнарында кӧп табығлар иртер: Алтай Республиканың паза Кемеров облазының – Кузбасстың пастарына, Алтай паза Тыва республикаларның закон сығарҷаң органнарының депутаттарына, ідӧк 160 азыра представительнай органнарзар паза 150-ге чағын муниципалитет пазына. Хакас Республикада – орындағы табығларнаң хада Россияның Хазна Думазы депутадына хоза табығлар. Аннаң пасха округтың регионнарында аймах-пасха синдегі депутаттарға хоза табығлар иртірҷең 110 артиинаң кампания иртер.
Сибирьде табығлар алнындағы кирек, тиксі алза, амыр паза пілдістіг. Че хазнабыстың ыырҷылары «искірігліг чаа» апарарын узаратчалар, ӧнетін чаа операциязы парчатхан оңдайларда істіндегі политиканы сайбирға кӱстенчелер. Табығ кампаниялары мындағ оңдайларда апарылчатханын табығ комиссияларына паза оларға хабасчатхан ӱлгӱ органнарына, халыхтар институттарына ундирға чарабас», – теен Анатолий Серышев.
Чуртағҷыларның табығ праволарын чуртасха кирер ӱчӱн ведомстволар аразындағы пірге тоғысты улам чахсы идібізерге кирек», – хосхан ол.
Чыылығ араласчылары искіриинең, табығ кампаниялары Сибирьнің регионнарында закон хоостыра иртчелер. Санға алылған кандидаттар табығҷыларның ӱннері ӱчӱн кӱрезіг апарчалар, че олох туста халых чонның аразында путхалыстар сығарчатхан киректернең айғаспинчалар. Аннаңар чуртағҷыларның табығ праволарын арачылир сурығларҷа хоптар саны уғаа ас полғаны киречілепче. Че пірее чирлерде кампаниялар сала хазыр кӱрезіг оңдайларынаң пасхалалчалар. Тиксі алза, халых чон аразында кирек амыр. Пірге полғаны, ӱлгее киртініс паза ӧнетін чаа операциязына хабазығ пӧзік синде полғаны хайраллалча.
Ӱн пиріс пасталарына, хайзы аймах регионнарда пірдең ӱс кӱнге теере иртер, ікі азыра ла неделя халды. Халыхтар ӱлгӱзі органнары табығларны иртірчеткеннерге законнаң кӧрілген хабазығларны пирчелер. Амғы туста ӱн пиріске тимненістің ӧӧн чардығы толдырыл парған. Комиссияларға кирек оборудованиеліг паза хадағлығ орыннар пирер сурығлар пӧгіл парғаннар алай пу чағында пӧгіл парарлар, оларға оргтехника, палғалыс, транспорт пирілче. Ӱн пирҷең орыннар ӧрттең паза терроризм акттарынаң арачыланарына тимде полғаны сыныхталча.
Табығ комиссияларының тоғызы азых поларына паза табығ кампаниялары сын конкуренциялығ иртеріне прай оңдайлар пирілче, халыхтар саринаң сыныхтағ тоғызы тимнелче, сыныхтағҷылар корпузын тимнирінде ідӧк партиялар паза кандидаттар араласчалар.Ӧӧн хайығ табығлар араласчыларының законодательствоға тудынарына салылча, табығҷыларның правозы хыйыстырчатхан киректер полбазына, ол санда Россияның табығ системазын уйан саринаң кӧзітчеткен. Ол пӧгіннерні табығ комиссияларынаң хада чарғылар, МВД, Роскомнадзор, прокуратура, Істезіг комитеді паза Минюст толдырарға киректер. Ідӧк істіндегі киректер органнарына паза Росгвардияа хорғыс чох поларын тыыдыбызарға кирек.
Ӱзӱрігде Россияның Ӧӧн табығ комиссиязы кнезіні орынҷызы Николай Булаев, регионнарның табығ комиссияларының кнестері, регионнарның пастарының орынҷылары, чарғыларның, право хайраллаҷаң органнарның паза федеральнай толдырығлығ ӱлгӱнің округ субъектеріндегі территориальнай органнарының кізілері паза Сибирь регионнардағы ӧӧн федеральнай инспекторлар араласханнар.
Сомнар sfo.gov.ru сайттаң
Автор :
Тимнеен Альберт Толмашов
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
