Ахча ӱлестірерінде пірдеезі хыйыхталбас
23.08.2024
Хабарлар
Ӱлгӱ. Хакасия пазы Валентин Коновалов «Хакас Республика столицазының статузынаңар» законда хол салыбысхан
Валентин Коновалов закон проекті Хакасияның Ӧӧркі Чӧп депутаттарының кӧбізі ӱн пирген сылтаанда алылғанын таныхтаан, «пу оңдайнаң депутаттарның кӧбізі ол закон чуртасха кирілерінің салтарлары хайдағ поларын оңарча паза пос чарадии ӱчӱн нандырығлығ полча» тіп искірген ол.
Олох туста регион устағҷызы Хакасия правительствозының кӧрізі, хайзы закон проектіне тоғыр ӱндезігде кӧзіділген, алыспаанын таныхтаан:
– Амғы редакциядағы закон сын нимес паза Хакасияның пасха муниципальнай пӱдіcтерінің кирексіністерін хыза пазар. Ағбаннаң пасха прай муниципальнай пӱдістер дотацияа чуртапчалар паза республика бюджедіннең ахча пирілерінең палғалыстығ полчалар.
Городтарның, аймахтарның паза аалларның пастары ол кирекче орта сағыссырапчалар, чӧпсінминчеткенін искірчелер, миннең тоғасса паза чон алнында чоох тутса. Пірдеезіне чазыт нимес, Ағбанның иң чахсы парыстанҷаң оңдайы пар, городха республика бюджедінең ахчалығ хабазығ чылдаң чылға ӧсче. Кӧзідімге, пу чылда ла ол хабазығ сині ікі артиинаң миллиард салковайға читкен.
Хайди ол таныхтаан, муниципалитеттерге субсидиялар тиксі пирілчеткенін алза, анда Ағбанның ӱлӱзі пір ӱзінҷі чардығы полча. 2021 чылдаң пасти Хакасия правительствозы налог саларының нииктелген системазынҷа (УСН) тӧлелчеткен ахчаның 30%-ін муниципалитеттернің бюджеттеріне пирібіскен. Ағбан ол чарадығнаң утып алғаны чазыт нимес, бизнес ӧӧнінде республиканың ӧӧн городында санға алылча нооза. Ағбан УСН-ҷа чыл сай чарым миллиард салковайға теере алча.
– «Хакас Республика столицазының статузынаңар» закон хоостыра чылда хоза 300 миллион салковай позытханы, пасха муниципалитеттерні хыйыхтап, орыннарда сын нимес паза орта нимес чарадығ тіп паалапчалар, – чоохтаан Валентин Коновалов.
Хакасия правительствозы республиканың ӧӧн городын тилідеріне хаҷан даа хайығ салған: Ағбан городтағы социальнай объекттерні, чолларны тыхтирына паза пӱдіреріне, скверлерні паза парктарны иптиріне федеральнай ахча кирілче, Ағбанны аймах-пасха кӧстеглерҷе – экологияны чахсыландырардаң пасти оборудованиелер аларына теере – федеральнай паза регион программаларына кирерінҷе улуғ тоғыс апарылча.
Ідӧк Ағбанда республиканың хазых хайраллиры, ӱгредіг, культура объекттері орныхчалар. Оларны тударына, тыхтирына, нааҷылирына ахча республика бюджедінеңӧк позыдылча. Ағбанда республика правительствозының прай министерстволары паза ведомстволары орныхчалар. Республиканың учреждениелері ӧӧн городта санға алылғаннар паза налог тӧлепчелер.
– Хакасия правительствозы ікінҷілес чох Ағбанны мыннаң мындар тилідер. Че пӱӱнгі, республикаа экономика саринаң уғаа сидік оңдайларда бюджет ахчазы прай муниципальнай пӱдістер аразында тиңни паза сын ӱлестірілерге кирек.
Мындағ кирек, тізең, хаҷан «пайлар пайыпчалар, чох кізілер улам чуға чуртапчалар», – чайхалыссар чол, хайзынҷа піс парбаспыс. Мин Хакасия чуртағҷыларын ізендірчем, 2025 чылға городтар, аймахтар паза ааллар аразында ахча ӱлестірзебіс, піс сынға тудынарын, Ағбанның паза пасха муниципальнай пӱдістер аразындағы балансты айландырарбыс, – салтарлар иткен Хакасия пазы.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
