Iкiнҷi Хакас гимназиязы пӱдiрiлер бе?
28.08.2024
Хабарлар
Кӧнi эфир тузында
Кӧнi эфир. Ӱгредiг чылы алнында Хакасия пазы Валентин Коновалов республиканың ӱгредiг паза наука министрi Анатолий Бутенконаң хада ӱгредiг сурығларына чарыдылған кӧнi эфир иртiрген
– Халғанҷы чылларда паза пӱӱл ӱгредiг киреенде хайдағ алызығлар полғаннар?
– Ирткен чылда Россияның просвещение министерствозы регионнарға пiрге ӱгредiг оңдай тӧстирге пӧгiн турғысхан. Ол пiрге ӱгредiг программалары, пiрге учебниктер паза даа пасхазы. Пу кӧстегнi толдырарынҷа тоғысты министерство апарча.
Ағаа хоза, федеральнай кiннiң чахиинҷа школаларда директор чӧпчiлерi кирiлгеннер. Амғы туста Хакасияның 84 школазында паза 13 техникумында мындағ специалисттер тоғынчалар.
Ирткен чылда «Разговоры о важном» занятие полған на неделяда иртiрiлген. Пӱӱл ол узарадылар. Анда 6 – 11 класстардағыларға профориентация искiрiглері кӧп полар.
Пу ӱгредiг чылынаң пасти, тiзең, ӱгредiг киреене «Iстенiс» предмет айландырылча. Iдӧк «Основы безопасности и защиты Родины» предметті иртiрiп пастирлар. Пу предметтерҷе ӱгретчiлер хоза курстар иртчелер, пiлiстерiн алғытчалар, – чарытхан ӱгредiг министрi Анатолий Бутенко.
– Хакасияда хайдағ наа школалар пӱдiрiлче, нааҷылалча?
– Республиканың тиксi ӱгредiглiг учреждениелерiн тыхтирына пӱӱл республика бюджедiнең 150 миллион азыра салковай позыдылған. Хайдар пiс аны хоратхабыс? Школаларны тыхтирына паза терроризмнең хорғыс чох поларына.
Федеральнай кiн аймах программалар тӧстепче. Хакасия оларда сыбыра аралазарға кӱстенче. Ол санда школаларны тыхтир программада. Ирткен чылда пiс пу программаҷа 10 азыра школа тыхтап алғабыс, наа оборудование паза мебель илееде алғабыс. Анзы ӱгредiгнi пӧзiк синде апарарға оңдай пирген. Пӱӱл пiс 11 школа тыхтап алғабыс.
Чағдапчатхан ӱс чылға Хакасия пазы Валентин Коноваловтың чахии хоостыра пiс 20 азыра ӱгредiг учреждениезiн тыхтирбыс.
Наа программа – ол олған садтарын тиксі тыхтиры. Пiс пу программада араласчабызох. Кирек пiчiктер ызыбысхабыс, – нандырған министр.
– Ағбанда школалар пӱдiрiлчелер, че Харатаста ноға наа ӱгредiг учреждениелерi пӱдiрiлбинче?
– Анзы муниципалитет ӧткiнiнең палғалыстығ. Харатас федеральнай программаларда араласпинчатханда, городта тилiс чоғыл. Анда, тiзең, социальнай учреждениелер пӱдiрер чирлер илееде. Хай пiрее школаларда орыннар кӧп, хайзында асхынах.
Ағбанда, тiзең, школалар чидiспинче, олғаннар iкi сменанаң ӱгренчелер. Олар пiр сменанаң ӱгренер ӱчӱн, Ағбанға 9,5 муң азыра хоза орын киректелче.
Мин федеральнай синде Харатаста школа пӱдiрердеңер сурығны кӧдiргем. Че городха, кирек пiчiктер тимнеп, чир таап саларға кирек. Пiчiктер прай тимде полза, пiс пiрее федеральнай программаа кiрербiс, – таныхтаан чооғында Валентин Коновалов.
– Пӱӱл школа тоосханнар Россияның хайдағ вузтарынзар ӱгренерге кiрглеп алдылар?
– Хакасияның чииттерi чыл сай хазнаның ӧӧн вузтарынзар бюджет орыннарына ӱгренерге кiрiп алчалар: Москвазар, Санкт-Петербургсар, Сибирьдегi вузтарзар. Кӧзiдiмге Катановтың адынаң Хакас национальнай гимназияның ӱгренҷiлерiн алып алза, тӧрт ле пала ахча тӧлеп ӱгренерге кiрiп алған. Пасхазы тикке. Олар чыл сай МГИМО-зар кiрчелер. Iзенчем, ӱгренген соонаң чииттер ибзер айланарлар, – чарытча Валентин Коновалов.
– Ӱгредiг киреене саннығ технологиялар хайди кирiлчелер?
– Россияның просвещение министерствозының чахиинҷа амды ӱгретчiлер, iҷе-пабалар паза олғаннар «Сферум» платформада чоох алысчалар. Ол пiстiң, Россияның, мессенджерi полча. Андар кӱҷӱрлер кiр полбинчалар. Амды пу платформада «Электронная школа» тилiпче. Ол «ГИС. Моя школа» тiп адалча. Анда конференциялар иртiрiл турарлар, ӱгретчiлер олғаннарға ибдегi тоғыс пир турарлар паза даа пасхазы. Пу система амды прай хазнаҷа тарапча.
Наа оборудованиедеңер чоохтаза, 2019 чылдаң пасти республиканың школаларында 200-ке чағын компьютер клазы азылған. Пу чылда iдӧк хоза азыларлар. Оборудование прай федеральнай бюджет ахчазына алылған, кабинеттернi тыхтирына республика ахча позытхан. Пiр ле кабинеттi тимнебiзер ӱчӱн ортымахти 800 муң салковай киректелген, – нандырған Анатолий Бутенко.
– Колледж-техникумнарзар ӱгренерге кiргеннер илееде. Чииттер хайдағ специальностьтар таллапчалар?
– Халғанҷы чылларда чииттер ортын профессиональнай ӱгредiг специальностьтарын таллапчалар. Абитуриенттернiң хайиин инженер паза компьютер технологияларынаң палғалыстығ кӧстеглер тартча. Пӱӱл пiр бюджет орнына ортымахти 27 сурыныс пiчии полған, хазых хайраллирында – 24, ӱгредiгде – 7. Iдӧк тимiр хабыстырҷаң, автомеханик, пӱдiрiгҷi, ас-тамах узы поларға сағынчатханнар илееде.
Ортын профессиональнай ӱгредiг учреждениелерiн алып алза, чииттернiң кӧбiзi Хакасияның политехническай колледжiнзер ӱгренерге кiрерге сағынча. Iдӧк оларның хайиин Хакасияның кӧп профильлiг колледжi, коммунальнай хоных паза сервис техникумы тартча.
2019 чылдаң пiс СПО-ларның материально-техническай базаларын нааҷылап пастабысхабыс. Узанҷаң орыннарны иптирiне паза оборудование аларына 170 миллион салковай позыдылған. СПО-ларда ӱгредiг синi кӧдiрiлчеткенде, андар пӧзiк баллығ чииттер кӧп килче, – чооғын узаратхан регион устағҷызы.
Хоза таныхтирға сағынчам, ирткен чылда пiс «Профессионалитет» федеральнай программаның «Педагогика» кластерiне кiрiп алғабыс. Анзы пiске регионда таңдағы ӱгретчiлернi тимнирге оңдай пирче, – хосхан ӱгредiг министрi Анатолий Бутенко.
– Сорығ городта пiрее ортын профессиональнай ӱгредiг учреждениезін пӱдiрерi кӧрiлче бе?
– Пiс пу сурығны хаҷан-да кӧдiргебiзӧк. Анда пiрее СПО-ның филиалын азарға пӧгiнчебiс. Пу сурығҷа орындағы ГОК устағ-пастаанаң хада-пiрге тоғыныбызарға сағынчабыс, – нандырған Валентин Коновалов.
– Городта паза аалларда чуртапчатхан ӱгретчiлерге хайдағ социальнай полызығлар кӧрiл парған?
– Городтағы школазар алай ба олған садынзар тоғынарға килген чиит специалистке пастағы ӱс чылда пӧзiк чал ахчазы тӧлелче. Аның хызыл диплом полза, чал ахчазы синi улам кӧдiре. Аалзар тоғынарға парған чииттерге чуртнаң полызығ идiлче. Аннаң пасха, ӱгретчiлерге федеральнай паза республика синiнде ахчалығ сыйыхтар кӧрiл парғаннар.
«Земскай ӱгретчi» программаның араласчылары пiрер миллион салковайдаң алчалар. Амды регионда андағ читi ӱгретчi тоғынча, – теен министр.
– Хакас национальнай гимназия кӱстiг ӱгредiг организациязына саналча, хайзында олғаннарны хакас тiлiне ӱгретчелер. Iкiнҷi андағ гимназия пӱдiрiлген полза, чахсы поларҷых.
– Я, сiрер орта таныхтапчазар. Гимназия пик пiлiстiг олғаннар тимнепче. Пiс ӱгредiг министерствозының паза гимназияның устағ-пастаанаң хада аның iкiнҷi корпузын пӱдiрер пiчiктер тимнепчебiс. Федеральнай кiн пiске хабас пирерге молҷаан. Наа корпус Ағбандағы, Асхыстағы паза Хубачардағы школалар проектiнҷе пӱдiрiлерi кӧрiлче. Ол iдӧк пiр муң орыннығ полар. Iзенчем, ол тимде полза, анда олғаннарны хакас тiлiне ӱгредер оңдай алғыдыл парар, – кӧнi эфирнiң халғанҷы суриина нандырған Хакасия пазы Валентин Коновалов.
Сом кӧзiдiгдең алылған
Автор :
Оксана Котюбеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде