Опера сарыннарына ӱгретчелер
28.08.2024
Хабарлар
Хабарҷыларның тоғазиинда
Культура. Хакасияда пӱӱл от айының пастағы кӱнiнең сығара улуғ хырлас айының алтынҷы кӱнiне теере олғаннарның опера искусствозының фестивальы иртче
Пу чӧрiмнi Хакасияның культура министерствозының паза Хакас Республика филармониязының полызиинаң Хакасияның кӧг чайаачызын тилiтчең фонд иртiрче.
Проекттiң ӧӧн пӧгiнi – пiстiң республикадағы 11 – 17 частығ олғаннар аразында опера кӧглерiн сарнапчатхан таланттығларны, таап, ӧcкiрерi полча. Ӧӧнiнде андағ чайаачы олғаннар музыка паза искусство школаларында ӱгренчелер. Пiди опера искусствозына ӱгренген олғаннарның пiреезi соонаң саблығ ырҷы даа пол парарға айабас. Пасхазы даа опера искусствозынаң чағын танызып алар.
Пу проект Ағбан, Абаза, Саяногорск городтарда паза Асхыс, Хубачар, Шира аалларда иртiрiлче. Фестивальның тӧстегҷiлерi олғаннарны опера искусствозына теелчеткен кӧглернең, сарыннарнаң, актер ойыннарынаң паза теелбектернең таныстырчалар. Аның ӱчӱн аймах мероприятиелер иртiрчелер.
Iди ӱгредiг программазын апарарға ӧнетiн хығырғаннар Санкт-Петербургтағы Мариинскай театрның ырҷызы, Россияның саблығ артизi Татьяна Павловскаяны паза А.И.Герценнiң адынаң Россияның хазна педагогика университедiнiң аарластығ профессоры, алынҷа ырлир кафедраның устағҷызы Татьяна Смелкованы. Iдӧк Хакасияда гастрольлар чорығынаң чӧрерлер пiстiң республикадағы «Каданс» хор паза филармонияның опера кӧглерiн толдырчатхан устар.
Пӧзiк устығ профессионаллар Татьяна Павловская паза Татьяна Смелкова «Каданс» хорның араласчыларына мастер-класстар иртiрерлер. Чӧрiмнiң халғанҷызында «Олғаннар чӱректерiнiң кӧглерi» гала-концерт полар. Анда аралазарлар фестивальда постарының чайаачыларын кӧзiткен олғаннар паза Хакас Республика филармониязының симфоническай оркестрi. Гала-концерт Ағбан городта кiчiг хырлас айының 24-ҷi кӱнiнде Хакас Республика филармониязының сценазында иртер.
Проектте пiстiң культура паза вокал искусствозының саблығ кiзiлерi Артур Марлужоков, Вячеслав Инкижеков, Юлия Белогурова (Моргачева), Марина Штарк паза даа пасхазы араласчалар.
Сом Дмитрий Сунчугашевти
Автор :
Тимнеен Илья Топоев
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде