Хазнабыстың таңдағызын ӧскiрчелер
28.08.2024
Хабарлар
Руслан Кулемеев, Анастасия Кулумаева, Артём Топоев ӱгретчілер конференциязында пӧзік сыйыхтарға турысханнар
Ӱгредiг кирее. 26-27 орғахта Ағбанда ӱгретчiлернiң орғах айындағы республика синiндегi конференциязы кибiрли ӱгредiг чылы пасталар алнында ирттi
Конференция iкi кӱн ирткен. Пу тус аразына аның тоғызында 3 муң азыра ӱгретчi араласхан. Пӱӱл ол хазнабыста чарлалған Сӧбiре чылына чарыдылған. Конференцияда пiрге ӱгредiг оңдайлары кирiлгеннең ӱгредiгнi паза ӱгредiглiг тоғысты чахсыландырары, амғы тустағы кирексiнiстерге килiстiре тимнирi ӱзӱрiлген. Iдӧк анда пӱӱл ӱртӱн айының 1-ғы кӱнiнең кирiлчеткен «Істеніс» (технология) паза «Основы безопасности и защиты Родины» ӱгредiг предметтерiне, оларны апарарына хайығ айландырылған.
Конференцияның тоғызы сигіс улуғ ачыхта ирткен, оларда 29 аймах секция полған. Iкi секцияның тоғызы онлайн апарылған, анда полған на ӱгретчее аралазар оңдай полған. Кӧзiдiмге, город тастындағы лагерьде ӱгретчiлер паза iҷе-пабалар олғаннарнаң ӱгредiглiг тоғысты орта апарарын, пу кӧстегҷе хада-пiрге тоғынар оңдайларны ӱзӱргеннер. Пасха ачыхтарда «Пастағылар чӧрiмiнiң» тоғызынаңар, аның наа проектiнеңер, чыл пасталчатханда, тӧстелген iҷе-пабаларның национальнай пiрiгiзiнеңер паза пасха даа сурығлардаңар чоох парған. Таныхтирға кирек, ирткен чылда тӧреен хакас тiлi паза тӧреен хакас литературазы предметтерҷе тоғысчы программалар федеральнай синде экспертиза иртiбiскеннер, анаң 2023-2024 ӱгредiг чылында школаларда апарылғаннар. «Тӧреен тiл. Чуртасха кирерiнiң амғы тустағы оңдайлары» ачыхта пу тоғыстың пастағы салтарларынаңар, сығысхан сидiкciнiстердеңер искiргеннер.
Ӱгретчiлер чыылииның пайрамнығ чардығы киҷее Ағбандағы 31 № школада ирткен. Ӱгредiг кирее тоғынҷыларын Хакасия пазының тоғызын толдырчатхан Татьяна Курбатова, республика Ӧӧркi Чӧбiнiң кнезi Сергей Сокол, ӱгредiг паза наука министрi Анатолий Бутенко, тиксi Россияның ӱгредiг кирее тоғынҷылары профсоюзының республикадағы пӧлиинiң устағҷызы Любовь Барабанова удурлааннар.
– Хакасияның ӱгредiг кирее хазна политиказының ӧӧн кӧстеглерiнҷе тилiпче. Пӱӱнгi кӱнде алныбыста пiрге ӱгредiг оңдайларын тӧстир пӧгiн турча. Андар пiрге ӱгредiг программаларын тимнирi, олғаннарның пiлiстерi, кӧнiгiстерi синiне пiрге кирексiнiстер кирерi, прай предметтерҷе федеральнай синде тимнелчеткен пiрге учебниктернең тузаланары кiрче. Алызығлардаңар чоохтаза, федеральнай синде полған на ӱгредiг чылына ӱгредiг кирее тилiзiнiң ӧӧн кӧстеглерi салылча. Пiс анаң оларҷа тоғынчабыс, – теен ол.
Татьяна Курбатова ӱгретчiлерге паза ӱгредiг учреждениелерi устағҷыларына республиканың ӱгредiг киреенде кӧп чыл iстен салғаннары, ағаа улуғ хозым иткеннерi паза пӧзiк устары ӱчӱн «Хакасияның ӱгредiг киреенiң саблығ тоғынҷызы» аттарны, Хакасияның Аарластығ пiчиин паза регион пазының алғыстазын читiрген.
Алғыстас пiчиин алғаннарның санында Ис пилтiрiндегi школаның технология ӱгретчiзi Артём Топоев полған. Ӱгредiг киреенде ол 2003 чылдаң тоғын парир. Школада ӱгренчеткенде, ол хоостирға хынҷаң, аннаңар модельерге ӱгренерге кiрiбiскен. Ӱгредиин тоосханда, тӧреен аалынзар айланған – школада технология ӱгретчiзi киректелчеткен. Тоғынчадып, ол ХГУ-да чайаачы специальностьча пiлiстерiн алғытхан. Артём Владимирович, школазар тоғынарға килгенде, «Айра» мода театрын тӧстеп алған. Анда олғаннар тiгерге, кип-азах пызарға, аны чазирға паза пасха даа кӧп тузалығ нимее ӱгренчелер. Олар республика паза тиксi хазна синiнде иртчеткен аймах марығларда тӧремiл араласчалар. Хакас гимназиязында иртчеткен «Ынархас чоллары» фестивальның ӧткiн араласчылары полчалар. Пӱӱл олар анда пастағы орынға турысханнар. Iдӧк палалар чоннар аразындағы марығларда аралазарға кӱстенчелер. Амғы туста видеолар, суурып, ысчаң оңдай пар нооза. Iди 2022 чылда «Айра» Чебоксары городта ирткен «Территория стиля» марығда чиңiстi холға кирген. Айғасчатхан киреенде пӧзiк чидiглерге чидер ӱчӱн, ӱгретчi иң пурун позының тоғызына паза палаларға хынарға кирек тiп санапча.
Пӱӱл республиканың илееде ӱгредiг организациязы пайрамнығ чылын таныхтапча. Iди 70 чылын таныхтапчалар: Хакасияның политехническай колледжi, Таштып аймааның Чоғархы Таштып аалындағы школа, Орджоникидзе аймааның Майрастардағы школа. 75 чыл тоғын парир Асхыс посёлоктағы школа. 80 чылын таныхтапча Хакасияның ӱгредiг тилiзiнiң паза квалификация кӧдiрерiнiң институды, 85 чылын – Асхыс аймааның Катанов аалындағы школа, 90 чылын – Ағбандағы 11 № школа, Харатастағы Cовет Союзы Матыры П.А.Рубановтың адынаң 7 № школа, Пиидегi школа-интернат, 95 чылын – Ағбан пилтiрi аймааның Сапогов аалындағы, Шира аймааның Тоғызаас аалындағы 8 №, Тойым аалындағы 3 №, Пии аймааның Киндiрлiг пилтiрi аалындағы, Таштып аймааның В.Г.Карповтың адынаң Пыдырах аалындағы школалар. Пайрамнығ 100 чылынаң алғыстастар алчалар Орджоникидзе аймааның Сыралығ Ӱӱстегi, Ӱӱстегi, Асхыс аймааның Ӧӧк пилтiрiндегi, Боград аймааның Боградтағы паза Троицкайдағы школалар, 110 чылынаң – Асхыс аймааның Казановтағы школазы, 140 чылынаң – Таштып аймааның Cовет Союзы Матыры Г.Т.Зориннiң адынаң Мадырдағы школа, 155 чылынаң – М.И.Чебодаевтiң адынаң Асхыстағы лицей-интернат. Оларның ӧмелерiн пайрамнарынаң паза ӱгредiг киреенҷе, ӱгредiглiг тоғысча хазна политиказын чуртасха кирерiнҷе хада-пiрге тоғыста турыстығ чидiглерi ӱчӱн Сергей Сокол алғыстаан, Хакасияның Ӧӧркi Чӧбiнiң алғыстас пiчiктерiн читiрген.
Пыдырах аалдағы школаның директоры Анастасия Кулумаева полча. Ол 28 чыл школада тоғын парир, устағҷы полып – 12 чыл. Специальнозы хоостыра пасталығ класстар, физкультура ӱгретчiзi полча. Амғы туста школада 80-ҷа пала ӱгренче, 18 ӱгретчi iстенче. Iдӧк анда олған сады пар, иркеҷектернең iкi воспитатель тоғынча. Саблығ хакас ученайның адын ал чӧрчеткен школа пайрамын кичкер-кiчiг хырлас айларында таныхтирға кӧстенче.
Хакасияның ӱгредiг паза наука министрi Анатолий Бутенко тӱзiмнiг тоғыстары паза ӱгредiг киреендегi чахсы чидiглерi ӱчӱн ӱгретчiлерге «Россия ӱгредiг киреенiң аарластығ тоғынҷызы» аттарны, «За верность профессии» кӧксiне хаптырҷаң танығларны, Россияның просвещение министерствозының Аарластығ пiчiктерiн читiрген.
Пӧзiк сыйых алғаннарның санында Казанов аалдағы школаның директоры Руслан Кулемеев полған. Ағаа Аарластығ пiчiк читiрiлген. Руслан Владимирович ӱгредiг киреенде 30 чыл iстен парир. 23 чыл школанаң устап парча. Хада хонғаны Нина Борисовна iдӧк школада iстенче. Хызы Юлия iҷе-пабазының чолын пасхан. Ол Тӧӧ пазындағы школада информатика ӱгретчiзi полча.
Таныхтирға кирек, Казановтағы школа пайрамнығ чылын таныхтапча. Амғы туста школада 25 ӱгренҷi саналча. Чылдаң чылға ӱгренҷiлернiң саны хызырылча тiп хомзынча устағҷы. Олғаннарнаң 11 ӱгретчi тоғынча. Наа ӱгредiг чылына математика ӱгретчiзi киректелче тiп таныхтапча Руслан Владимирович.
Конференцияның пайрамнығ чардығы сыйыхтастарнаң тоозылған, аның тоғызы аймах чыылығларнаң, тоғазығларнаң, мастер-класстарнаң узарадылған.
Сом Дмитрий Сунчугашевти
Автор :
Татьяна Кыштымова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде