Школаа парарын чидiкпин сахтапчалар
30.08.2024
Хабарлар
Пастағы классха парчатхан олғаннар Каролина Пахтаева паза Аяс Толмашов
Пiлiс кӱнiне удур. Пу iкi паланы iҷе-пабалары уғаа сiлiг аттарнаң адап салғаннар. Оолахтың ады – Аяс. Фамилиязы – Толмашов. Хызыҷағас – Каролина Пахтаева. Олар пӱӱл 1-ғы классха парчалар, пiр школада ӱгренерлер – Ағбандағы 22№
Аяс кiчiг дее полза, сағызы тирең, чооғы иптiг. Пӧзiк сыннығ оолахтың кӧрiзi дее улуғларни осхас.
– Мин «Алёнка» олған садына чӧргем. Пiр группаа чӧрген хай пiрее олғаннарнаң хада амды пiр школаа чӧрербiс. Школаҷаамзар iҷемнең чӧргебiс, ол улуғ паза сiлiг. Минiң кӧңнiме кiрген. Андар парарын чидiкпин сахтапчам. Уроктарға чӧрiп, наа пiлiстер аларым килче, – сағызынаң ӱлесче Аяс.
Аяс Толмашов чӱсчең секцияа хаҷаннаң чӧрче. Хайди ол тiпче, ӱзінҷі-тӧртінҷi занятиедӧк чӱзерге ӱгренiп алған. Амды кiзi полызии чох чӱс чӧрче.
Каролина пастағы кӧрiснең кiчиҷегес кӧрiнче. Ӱнiҷее дее нiске. Че ол школаа прай саринаң тимде: алфавиттi прай ӱгрен салтыр, 100-тең азыра санап полча. Аны iҷезi паза улуғ харындастары школаа тимнеп салтырлар.
– Минiң iкi улуғ харындазым пар: Ярослав паза Тимур. Олар iдӧк 22 № школада ӱгренчелер. Харындастарым чахсы ӱгренчелер, iдӧк олар спортсменнер. Минi iдӧк чахсы паалағлар аларға кӧнiктiрчелер, аннаңар миннең ибде айғасчалар. Пос тус полза, теестезiп, миннең хада тасхар чӧрчелер, чалғысхан артыспинчалар. Школада даа олар минi хайығ чох артыспаспыс тееннер. Тимур ӱдес турар, Ярослав, тiзең, удурлир паза уроктар аразында минзер кил турар.
Школада чахсы ӱгренерге сағынчам, ӱгретчiм паза сӧбiрем мағаа поғдархир ӱчӱн. Ӱр ниместе ӱгретчiм iҷеме пiчiк ысхан. Анда пiди пазылған: «Изен, аарлығ Каролина! Минiң адым Дарья Андреевна. Мин синiң ӱгретчiң полчам. Школада син чахсы ӱгренерзiң. Пiс сағаа поғдархирбыс. Школада син iдӧк наа нанҷылар таап аларзың. Оларнаң ынағлазарзың. Мин синi школада пайрамнығ линейкаа сахтапчам!» Пу пiчiктi мағаа харындастарым хығырарға полыс пиргеннер. Мин андағы сӧстернi сағын салғам. Школаа парарын чидiкпин сахтапчам! – ӧрiнiзiн чазырбинча абахай хызыҷах Каролина.
Хайди искiрче Хакасияның ӱгредiг паза наука министерствозы, пӱӱл республиканың школаларында 70 муң азыра олған ӱгренер, 1-ғы классха 8 муң азыра пала парча. Иң кӧп ӱгренҷi Ағбанда.
Сом Дмитрий Сунчугашевти
Автор :
Оксана Котюбеева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде