Чахсы ӱгренерi кибiр ползын
04.09.2024
Хабарлар
Гимназия ӱгренҷілеріне наа ӱгредіг чылының пастағы саңы сыңырапча. Аны 11 «В» класстың ӱгренҷізі Никита Никитин паза 5 «В» класстағы Виктория Сагалакова сыңыратханнар
Пiлiс кӱнi. Пӱӱл, Пiлiс кӱнi позырахха килiс парғанда, ӱгренҷiлер пайрамнығ линейкаа ӱртӱн айының 2-ҷi кӱнiнде чыылысханнар
Танығлығ кӱнде иртен тигiр хара пулуттарнаң тартылых полған. Наңмыр тоолапчатхан. Линейкаа парарға тимненчеткен сӧбiрелер наңмырдаң чазынарға зонттар алғлап алғаннар. Н.Ф.Катановтың адынаң Хакас национальнай гимназияда пайрамнығ линейка кӱн ортызында ирткен. Пу тусха тигiрдегi пулуттар тарап парыбысханнар, анаң кӱн cустары сыххлап сыхханнар. Кӱн сых килгенде, олғаннарның даа кӧңнiлерi алыс парыбысхан чіли пiлдiрген.
Пайрамнығ чыылығ Россияның паза Хакасияның флагтарын сығарарынаң, хазна паза республика гимннерiн толдырарынаң пасталған. Анзы кибiрге кiр парған.
Чыылғаннарзар пастағы сӧснең гимназия директоры Лилия Ахпашева айланған:
– Аарлығ нанҷылар! Пiстiң гимназия позының iзиин 1945 чылда чарыс айының 10-ҷы кӱнiнде асхан. Ол Илбек Ада чаада чат халған паба-iҷелернiң палаларына тӧстелген. Пастағы кӱннең пасти мында олғаннарны пос чирiне хынарға, улуғларны улуғлирға ӱгредері кибiр кирiлген. Пiс аны ам даа узаратчабыс. Ағаа хоза мында чахсы ӱгренерге кӱстенер кибiр пар. Аарлығ ӱгренҷiлер, iзенчем, сiрер ӱгредiг чылы тооза гимназияда чахсы ӱгренерзер.
Аарлығ ӱгретчiлер! Сiрернiң кӱстенiзiңер сылтаанда пiстiң олғаннарыбыс хазнаның ӧӧн вузтарынзар ӱгренерге кiрглеп алчалар. Iзенчем, палаларға пӧзiк пiлiс пирерiн сiрер аннаң андар узарадарзар, – таныхтаан чооғында Лилия Олеговна.
Гимназия ӱгренҷiлерiн Пiлiс кӱнiнең Хакасия пазы Валентин Коновалов алғыстирға чыл сай кил парча. Ол iдӧк кибiр полбас па.
– Хакас гимназиязы хаҷанох пiстiң республиканың поғдархазы полча. Мында ӱгренчеткен олғаннар Россия синiнде иртчеткен олимпиадаларда сыбыра пӧзiк пiлiстер кӧзiтчелер, хазна сыныхтағларында пӧзiк баллар алчалар, салтарында вузтарзар бюджет орыннарына ӱгренерге кiрглеп алчалар. Iзенчем, мыннаң мындар ciрер iдӧк пу синнi тӱзiрбессер, – айланған олғаннарзар Хакасия пазы Валентин Олегович.
Хакасия пазы Валентин Коновалов ӱгренҷілерні паза ӱгретчілерні Піліс кӱнінең алғыстапча
Пӱӱл гимназияның сӧбiрезiне 75 наа пала хозылды. Олар пизiнҷi класс ӱгренҷiлерi. Кибiр хоостыра 11 класстағылар оларға «пiлiстер чыындызын» читiргеннер. Ол гимназияның иң кічiг ӱгренҷiлерiне ӱгредiг организациязы тархынынаң, кибiрлерiнең танызарға полызар.
Гимназияда пастағы чыл Сергей Мальчиков ӱгренер. Наа ӱгредiг орнынзар аны аға-ууҷазы ӱдес килген.
– Пархам городтағы 10 № школада ӱгренген. Хакас гимназиязынзар пирiбiзерге позы сурынған. Аның пабазы – орыс, iҷезi – хакас. Орыс тiлiн пiлчем, хакас тiлiн – чох, аннаңар минi Хакас гимназиязынзар ӱгренерге пирiңер, анда мин iҷе тiлiн ӱгренербін тiп ибiнде сайлантыр пархам. Тiгiлерi ниме ағаа тiп аларлар за? Пӱӱл гимназиязар пiчiктерiн пиргеннер, таллағ ирт парыбысханнар. Мында ол тӧреен тiлiн ӱгренерiне ӧрiнче. Итсе-де, пiс тее поғдархапчабыс пархабысха, мындағ ӧткiн ӧсчеткен ӱчӱн.
Гимназия кӱстiг ӱгредiг организациязы. Туңмаларыбыс мында хаҷан-да ӱгренгеннерӧк. Амды олар имнег киреенде iстенчелер, – чоохтапчалар Геннадий Петрович паза Нина Егоровна Токмовтар.
Олғаннардаң пасха, гимназиязар iдӧк наа ӱгретчiлер паза воспитательлер тоғынарға килгеннер. Олар ӱс ӱгретчi паза пiр воспитатель. Чиит специалисттер аразында Елизавета Криницына. Ол биология паза химия ӱгретчiзi. Гимназия алнында ол Ағбандағы 22 № школада iстенген. Пӱӱл магистратураны хызыл дипломға тоозып, наа орынзар тоғынарға килген.
– Магистр диссертациязын пасчатханда, мин Хакас гимназиязындағы «Альтаир» кiнде кӧп тоғынғам. Мында уғаа кӱстiг лаборатория пар, хайзы пасха школаларда чоғыл. «Альтаирде» диссертациям пазып, гимназия чӱрееме чағын пол парған, аннаңар, диплом алғанда, пеер килерге чаратхам.
Мағаа мында читiнҷi классты пирдiлер, оларның класс устағҷызы поларбын. Анзы минi чӱрексiтче. Палаларнаң паза паба-iҷелернең тiл алызарға кӧнiгерге кирек. Мыннаң мындар олғаннарнаң аймах проекттер пазарға сағынчам, iдӧк предмет олимпиадаларында аралазарға кӱстенербiс, – сағызынаң ӱлесче Елизавета Ивановна.
2024-2025 ӱгредiг чылында Н.Ф.Катановтың адынаң Хакас национальнай гимназияда 570 олған ӱгренче. Олғаннар республиканың аймах пулуңнарынаң чыылысханнар. Мында олар пӧзiк пiлiстiг ӱгретчiлернiң паза воспитательлернiң холында поларлар.
Танығлығ кӱнде Хакасия пазы Валентин Коновалов чӧпчiзi Николай Шульгиновнаң хада iдӧк Ағбандағы 31№ школада пол пар килген, олар прайзын Пiлiс кӱнiнең алғыстааннар.
Хайди искiрче Россияның просвещение министерствозы, пу ӱгредiг чылында хазнаның школаларында 18,5 миллионҷа пала парта кистiне одырды. Оларға 10 муң азыра школа iзиин асты, оларның 400-зi килкiм тыхтағ тоғыстары соонаң. Чоохтирға кирек, Россияның регионнарында 132 школа пӱӱл пастағызын на олғаннарны удурлады.
Сомнар Дмитрий Сунчугашевти
Автор :
Оксана Котюбеева
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде