Сезон пасталыбысты
06.09.2024
Хабарлар
«Саяны» паза «Енисей» ӧмелер ойын тузында
Меспектіг хоккей. Пу кӱннерде «Саяны» команда Россия Кубогында араласча
Турнирде Суперлиганың прай командалары ойнапчалар. Че марығ оңдайларынҷа оларны ікее чарыбысханнар. «Кидеркі» ӧмезер кірчелер «Динамо» (Москва), «Старт» (Нижний Новгород), «Ак Барс-Динамо» (Хазан), «СКА-Уральский трубник» (Первоуральск), «Волга» (Ульяновск), «Мурман» (Мурманск) паза «Родина» (Киров). Олар, Ульяновскта чыылызып, пуссар 30 орғахта сыхханнар. «Саяны» команда «Іскеркі» ӧмее хозылған. Хоккеисттерібіс Кемеровта «Водник» (Архангельск), «Енисей» (Хызылчар), «Кузбасс» (Кемеров), «СКА-Нефтяник» (Хабаровск), «Байкал-Энергия» (Иркутск) командаларнаң тоғазар. Турнирнің пастағы чардығы 7 ӱртӱнге теере парар. Полған на ӧменің тӧрт иң кӱстіг командазы азах меетте ойнир. Финаллар 1 – 7 чарыста иртерлер.
«Іскеркі» ӧменің пастағы ойыннары 1 ӱртӱнде полғаннар. 19.00 час иирде «Саяны» хызылчардағыларнаң тоғасхан. Пастағы таймда оолларыбыс ізестіг кӧрінгеннер. Уғаа ӧткін хайынған 20 частығ Руслан Галеев. Прайзы аны гол сабызарын сағаан. Ағбандағылар меспекті хаалхаа теере читіріп алчалар, че кире саап полбинчалар. Таймның пастағы 20 минутазы ирт парғанда, «Енисей» клуб, усхунған чіли, пістіңнерні чабыра пас сыххан. «Саянының» хаалхазынзар соон сӱрістіре меспектер учух сыхханнар. Салтарында тайм 0:5 саннаң тоозылған. Тоғазығның ікінҷі чардығында ағбандағыларның постарына пір гол пас саларға оңдай полтыр. Че Руслан Галеев, чӱрексініп, 12 метрдең чаза сабысхан. Матч 0:11 саннаң тоозылған.
2 ӱртӱнде оолларыбыс «Байкал-Энергия» команданаң тоғасханнар. Ойын хайди парар ни? «Саяны» пик хылиин кӧзідер бе? Чарғыҷы сығырғандох, хоккеисттерібіс, алындағы утырысха ӧкпелен парып, таң, атакаа пар сыхханнар. «Ыырҷы» хаалхазын чадап ла ал халды. Пістіңнер пос салынминчалар. Ойынның 10-ҷы минутазында Руслан Галеев Михаил Лисюктың полызиинаң иркутсктағыларға меспекті кире сабысты! Сан 1:0. «Саяны» алнында. Чоохтирға кирек, турнирге, спортсменнер ле нимес, «ағырчатхан» улус тимненген. Кӧрігҷілер Кемеровсар чоон барабанны хада алып алғаннар. Олар, барабан саап, хоккеисттернің кӧңнін кӧдірчелер. Кӱстеністері тикке парбады. 20-ҷі минутада сан 2:0 пол парды. Анзы Андрей Осипенковтың чидии. «Байкал-Энергия» Суперлиганың иң кӱстіг командаларының санына тӧреміл кірче. Пик хуйахтығ «ыырҷы» 4 минута пазынаң санны тиңнестірібіскен, тайм 2:3 саннаң тоозылған. Ойынның ікінҷі чардығында пус чазызы иркутсктағыларның полған тирге чарир. Итсе, «Саянының» хоза пір сан тоғынып алар кӱзі читтір. Меспекті Денис Соловьёв 12 метрдең кире сабысхан. Ағбандағылар, 3:9 саннаң утыр салған ползалар даа, пастағы кӱннең тиңнестірзе, хай-хай артых ойнааннар. Устары ӧсче.
«Іскеркі» ӧмеде Суперлиганың ӧӧн командалары чыылыс парғаннар тізе, саба полбас, неке. Кӧзідімге, 3 ӱртӱнде «Саяны» Архангельсктегі «Водникнең» ойнаан. Саблығ клуб – халғанҷы Россия чемпионадының кӱмӱс призеры. Хакасиядағы ӧме ағаа пастағы минутадаң унада саптырар тіп сағынғабыс. Чир-суғҷыларыбыс тыып парыбыстырлар. 9-ҷы минутада сан сала ла 0:2 пол парбаан, «Водниктің» капитаны Евгений Дергаев чаза сабыстыр.
«Саянының» хаалха хадағҷызы Владислав Атапинні махтирға кирек. Ол прай кӧңнін cалып хаалханы арачылапча. 20-ҷі минутада сан 1:1 пол парды. Денис Соловьёв пазох 12 метрдең меспекті кире сабысхан. Хоккеист чичең харахтығ, пик хылыхтығ. Тайм 1:3 саннаң тоозылған.
Ойынның ікінҷі чардығында «Водник» кӱс алынып алған, таң. «Саянының» хаалхазынзар хоза 6 меспек учух килген. Итсе, пістіңнер удурланғаннар. 68-ҷі минутада Руслан Галеев арғызы Матвей Воробьёвтың хабазиинаң командаа пір сан ағылған. Руслан – саблығ хоккеист Андрей Галеевтің оолғы. Пабазына кӧктеен полза, спортта кӧп чидіге чидерге кирек. «Водникнең» тоғазығ 2:9 саннаң тоозылған.
«Саянының» ӧӧн тренері Евгений Ерахтин Россияның меспектіг хоккейҷе федерациязы сайтының хабарҷыларынаң сағыстарынаң ӱлестір. Евгений Владимирович теен:
– Россия Кубогында піс иң кӱстіг ӧмелернең ойнапчабыс. Пӱӱнгі кӱнде команданың «бензині» 20 – 30 минутаа читче. Узыбыс ойыннаң ойынға ӧсчеткені ӧріндірче. Прай сағызыбыс Россия чемпионадында. Ирткен сезонда пӧгін турғызылған – халғанҷы орында халбасха, амды – 10 иң кӱстіг командаларның санына кіріп аларға. Анзы толғадаға тӧӧй.
Сом «Енисей» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
