Хомзыныстар паза ӧріністер
11.09.2024
Хабарлар
Пуста «Саянының» паза «Кузбасстың» хоккеисттері
Меспектiг хоккей. «Саяны» команда Россия кубогында Суперлиганың иң кӱстіг ӧмелерінең ойнаан
Меспектіг хоккей – хысхы спорт кӧрімі. Че сезонны хоккеисттер орғах айында асчалар. Чайғы тустох командалар тоғазығлар иртірерге, аймах турнирлерде кӱс сынирға пастапчалар. Россия чемпионадынаңар чоохтаза, ол сезонның ӧӧн арға-мӧрійі. Кибір хоостыра марығ 1 кічіг хырластаң 31 кӧрікке теере парча.
Хакасия – меспектіг хоккейге хынчатхан республика. Кізілер «Саяны» ӧме ӱчӱн хаҷан даа «ағырарға» тимделер. Пу кӱннерде иң ӧткін кӧрігҷілер хоккеисттерібіске хабазар пӧгіннең Кемеровсар чӧргеннер. Анда «Іскеркі» ӧменің командалары Россия кубогының финалына сығар ӱчӱн ойнааннар. Пастағы матчтарның салтарлары газетаның ирткен номерінде искірілген. Пу материалда «Саянының» халғанҷы ӱс ойынынаңар чоох парар.
4 ӱртӱнде «Саяны» ӧме пус чазызында «СКА-Нефтяник» команданаң тоғасхан. Ойын хайди парар ни? Пістіңнерге хатығ чуғар тіп ікінҷілес чоғыл, че кізі чӱреенде ізеніс хаҷан даа поладыр. Оолларыбыс ойнирға тимделер. Пуста ӧткін хайынчалар. Пизінҷі минутада сан 1:0 пол парды. Хабаровсктағыларның хаалхазынзар Андрей Осипенков Василий Жаукеновтың полызиинаң меспекті кире сабыстыр. Кӧрігҷілернің ӧрінізі пу чир нимес. Турыстыра кӧрінчебіс. «СКА-Нефтяник» ӧме, пу сағыстарны ис салып, таң, атакаа пар сыххан. «Саянының» хаалхазынзар соон сӱрістіре меспектер учух сыхханнар. Тайм 2:6 саннаң тоозылды. Командаа ікінҷі санны Сергей Дёмин Виталий Шнайдернің хабазиинаң ағылған.
Iкінҷі тайм сынап хомзындырған. 45 минута аразына хабаровсктағылар «Саяныға» хоза 13 меспек кире сабысханнар. Оолларыбыстың нандыр пирерге кӱстері читтір. 54-ҷі паза 78-ҷі минуталарда Руслан Гавричков позының адына ікі меспек пас салған. Пастағы голны сабызарға ағаа Василий Жаукенов полыс пирген, ікінҷізін – Артём Варламов. Пістіңнер, 4:19 саннаң утыр салып, 2024 чылдағы Россия кубогының рекордын турғыс салғаннар тирге чарир. Командаларнаң пу «чидіге» паза пірдеезі читпиндір. Олох туста пу син меспек «Саяны» пір ойында даа кире саап полбаан.
5 ӱртӱнде тынағ кӱн полтыр. Пятницада оолларыбыс «Кузбасснаң» тоғасханнар. Хысхаҷахти чоохтаза, харбазығ ойын тооза партыр. «Саяны» 0:12 саннаң утыр салған.
Команданың халғанҷы ойыны 7 ӱртӱнде ирткен. Чир-суғҷыларыбыс «Сибсельмаш» (Новосибирск) команданаң ойнааннар. Россия чемпионады тузында ікі ӧменің тоғазығлары хынығ иртчеңнер. Хоккей командалары Ағбанда ойнаанда, «Саяны» чиңіс тутхан, Новосибирскте – «Сибсельмаш». Кемеровтағы пуста кемге оң полар ни? Таныхтирға кирек, 1 ӱртӱнде новосибирсктегілер «Байкал-Энергия» ӧмені 8:6 саннаң чиңіп алғаннар. Пістіңнернің, тізең, утырыс соонҷа утырыс.
Ойын пасталыбысханда, пілдістіг пол парған: «Сибсельмаш» клуб «Саяныны» кӱстіг «ыырҷаа» санапча, матч хазыр иртер. Итсе, ойын голларнаң нимес, сайбағларнаң азылған. 18-ҷі минутада сан 0:1 пол парды. Новосибирсктегілер алнында. «Саяны» пос салынминча. Тӱрчедең Денис Соловьёв меспекті 12 метрдең «Сибсельмаштың» хаалхазынзар кире сабысты. Сан – 1:1. Ӧрінерге чарир ба алай ирте бе? Тайм тоозылғанҷа, сан алыспады. Ойынның ікінҷі чардығы хынығ арах ирткен. 59-ҷы минутада «ыырҷының» хаалхазынзар пазох меспек учухча. Аның авторы – Чингис Хандамаев. «Саянының» хоккеисттері пик хылыхтарын кӧзітчелер. «Сибсельмашха» ідӧк чиңіс кирек. 13 минута пазынаң сан 2:3 пол парды. Утырчабыс. Спортта пик хуйахтығлар ла чиңіc тутчалар. 81-ҷі минутада Руслан Галеев Денис Петровтың полызиинаң санны тиңнестірібіскен.
Меспектіг хоккейде чиңіс ӱчӱн ӱс сан пирчелер, команда, тиңни ойнабысса, пір сан тоғынып алча, утырыс ноль санға тиңнелче. Пір сӧснең, «Саяны» команда, алты матч иртiрібізіп, пір сан тоғынып алған. Ол «Іскеркі» ӧмеде халғанҷы орында парча. «Кидеркі» ӧмедеңер чоохтаза, мында «Уральский трубник» узынаң хайхатхан. Читі команда аразында ол ӱзінҷізі полыбыстыр. Аның тӧрт чиңіс, пір утырыс, «Динамонаң» (Москва) хада первоуральсктағылар тиңни ойнабысханнар. Ирткен Россия чемпионадында «Уральский трубник» халғанҷы орында полған. Амды артыхтарның санында. Анзына киртінерге дее сидік.
Турнирнің азах меедінде «Кузбасс», «Водник», «СКА-Нефтяник», «Енисей», «Динамо», «Волга», «Уральский трубник» паза «Ак Барс-Динамо» командалар ойнирлар. Піс Россия чемпионадын сағирбыс.
Сом «Кузбасс» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
