Тоңастығларны чыыр тусха чарыдылған чыылығ ирткен
11.09.2024
Хабарлар
Аал хонии. Киҷее Россия Федерациязы президентiнiң Сибирьдегi Федеральнай округтағы полномочиелiг кiзiзi Анатолий Серышев округтың регионнарында тоңастығларны чыыр тусха чарыдылған сурыға видеоконференция палғалысча чыылығ иртiрген
Чоох парған тоңастығларны чыырынаңар паза оларны анаң хайдар садардаңар.
– Россия президентi Владимир Путин пӧгiн турғыс салған – чағынғы алты чылға аал хонии ниме-ноо сығарызын 25 % ӧскiрiбiзерге, – айланған араласчыларзар Анатолий Серышев.
Пӱӱл Сибирьде 16 азыра миллион тонна тоңастығлар чыып аларға килізер тіп кӧрген полғаннар эксперттер. 2023 чылда сибирьнiң хыраҷылары 14 миллион тонна тоңастығлар чыып алғаннар. Иң кӧп Алтай крайында – 4,5 миллион тонна, Хызылчар крайында паза Омск облазында – 2,5 миллион тонна. Округча пiр гектар чирдең ортымахти 13,7 центнер тоңастығлар сыххан. Хызылчар крайында тоңастығларның сығызы иң чахсы полған – 26,3 центнер гектардаң.
Специалисттер паалааны хоостыра, амғы туста округча тоңастығлар сығызы илееде ӧс парған – 22 центнерге теере гектардаң, ирткен чылдағызынаң 1,5 хати кӧп. Таарығ тузында наңмырлар чағаннар, сiлкер айының iкiнҷi чардығында паза хандых айы пасталғанда соохталған даа полза, от айы хуруғ паза iзiг кӱннер турған даа полза, мындағ кӧзiдiглерге чидерге килiскен. Орғах паза ӱртӱн айларында округтың кӧбiзi регионнарында, наңмырлар чаап, аал хонии техниказына тоғынарға сидiк полча.
– Турғызылған планның 45 ле процентi сабыл парған. Тоңастығларны чыыр тоғысты чапчаң арах апараға кирек, ӱртӱн паза чарыс айлары хайдағ поларын санға алза, – таныхтаан Анатолий Серышев.
Хай пiрее регионнарда – Новосибирск, Омск паза Томск областьтарында – чир тың сыхтал парғаннаңар, сағыбаан саай режимi кирiлген. Искiрiлче, мындағ оңдайнаң хыйалға кiрген хыраҷылар компенсация алып аларлар. ГСМ паазы ӧсчеткенi тоңастығларны чапчаң паза чахсы чыып аларға харығ поларынаң хорғыс пар.
– Сибирьнiң регионнарында тоңастығлар чырғалын чахсыландырар ӱчӱн, Россия Федерациязының аал хонии министерствозына хабазар наа оңдайларны кӧр саларға сурынчам, – теен хазна президентiнiң полномочиелiг кiзiзi.
Анатолий Серышевтiң чооғынаң, сидiксiнiстер дее полза, сибирьдегi хыраҷылар тоңастығларны чыыр тоғыстарны пӧзiк синде апарчалар.
– Хада тоғынчатханнар, аннаң андархы тоғысха пӧгiннер турғысса, ӱреннер паза удобрениелер аларына хайығ айландырыңар, ахча паза субсидиялар тартып алар оңдайларға хайығ салыңар. Аал хонии министерствозынаң, Сибирьдегi аал хонии науказынаң хада, Ада чир-суубыста сығарылған ӱреннер пирерiнҷе тоғысты узарадарға кирек, – таныхтаан Анатолий Серышев.
Аннаң пасха, тузаланылбинчатхан чирлернi аал хонии тузаланысха кирерге кирек. Таныхталча, андағ чирлер пар, Иркутск облазында ла 1,5 миллион гектар чирдең 0,6 миллион гектары ла тузаланылча. Полномочиелiг кiзiзiнiң чооғынаң, Сибирьдегi федеральнай округтың регионнарында тузаланылчатхан чирлернiң синiн ӧскiрерiне оңдайлар таап саларға кирек.
Сибирьде сығарылған аал хонии ас-тамаа экспорт чырғалында кирексiнiсте. Хай пiрее ӧзiмнерҷе – рапсча паза ах киндiрҷе – кирексiнiс синi садылчатханынаң асча. Сибирьдегi аал хониинаң айғасчатханнар Ӱстӱнзархы Американың паза Африканың чырғалынзар сыхчалар. Индиянаң чахсы палғалыс парча. Олар бобовайларны алар кӧңнiлiглер.
Аал хонииндағыларға хабазығ пирерiнҷе сурыға алынҷа хайығ салылған. Округтағы аал хониинаң айғасчатханнарға федеральнай бюджеттең тиксi 13 миллиард салковай позыдылған. Ол санда тоңастығларны ӧскiрерiне 1,1 миллиард салковай пирiлген, хайзылары аал хонии ниме-ноо сығарызынаң айғасчатханнарға сiлкер айының пастағы кӱнiне теере тӧлел парғаннар.
Чыылығда араласханнар: Россияның аал хонии министрiнiң орынҷызы Андрей Разин, Сибирьдегi федеральнай округча Росгидрометтiң департаментiнiң устағҷызы Александр Чернявский, Сибирь регионнарының ӱлгӱнiң толдырығлығ органнарының профильлiг устағҷылары.
Сом sfo.gov.ru сайттаң
Автор :
Тимнеен Оксана Челтыгмашева
| Пн | Вт | Ср | Чт | Пт | Сб | Вс |
| 26 | 27 | 28 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
