Транспорт чолы олғаннарға хорғыс ағылбазын
13.09.2024
Хабарлар
Ӱгренҷілер водительлерге памяткалар ӱлееннер
Чӧрiм. Пу кӱннерде Ағбандағы 1 № школаның чӧрiстiң чиит инспекторлары «Пристегнись, Хакасия!» акцияда араласханнар
5-ҷi класстың ӱгренҷiлерi «Чӧрiстiң чиит инспекторлары» ӱгренҷiлер пiрiгiзiнiң араласчылары полчалар. Олғаннар класстарда, школада иртiрiлчеткен чолда хорғыс чох чӧрерiне, саайлар полдыртпазына, чолларны орта кизерiне паза пасха даа посты орта тудынар сурығларға чарыдылған мероприятиелерде ӧткiн араласчалар. Уламох ӱгредiг чылы наа ла пасталыбысхан туста олар арғыстарына, ӧӧнiнде пастағы классха килген ӱгренҷiлерге, орамаларҷа орта чӧрерiнеңер хатап чоохтапчалар, ПДД правилоларынҷа чарыдығлығ чоохтазығлар иртiрчелер.
«Пристегнись, Хакасия!» акцияда олар хазна чол инспекциязының Ағбанҷа пӧлиинiң тоғынҷыларынаң хада Щетинкин орамазында, автомобильлернi тохтадып, водительлерге арачылағ хурынаң хурчанарға, палаларны ӧнетiн креслоларда тарт чӧрерге кирек полчатханнаңар чоохтааннар паза искiрiглiг памяткалар ӱлееннер.
Акция пасталар алнында, аның тузында палаларға хайди орта тудынардаңар ГАИ-ның Ағбандағы пӧлиинiң чолдағы чӧрiстi хорғыс чох идерiнҷе чарыдығлығ тоғысты апарчатхан инспекторы, полицияның улуғ лейтенанты Инна Роговая паза ДПС инспекторы, полиция лейтенанты Александр Маськин чоохтап пиргеннер.
Iдӧк ГАИ тоғынҷылары Ағбандағы «Капитошка» олған садында мастер-класс иртiргеннер. Олар ӧнетiн плёнка ағыл килгеннер. Аның полызиинаң палаҷахтар кип-азахха алай ба рюкзактарға чапсырҷаң харасхы туста автомобильлер фаралары чараанына чалтырапчатхан наклейкалар тимнееннер. Олғаннар плёнкадаң чылтызахтар, тоғылағастар паза пасха даа фигуралар хыплааннар.
Аннаң пасха, полиция тоғынҷылары «Капитошка» олған садының иркеҷектерiне чолда посты тудынар правилоларны чоохтап пиргеннер. Чолда паза аның хыринда ойнирға чарабас, чолны ӧнетiн орыннарда кизерге, светофорда ноған ӧң чарыпчатса даа, чолны кизер алнында автомобильлер чазағ чӧрчеткеннерге иртер оңдай пирчеткеннерiн кӧрiп аларға кирек тiп искiргеннер.
Хазна инспекциязының тоғынҷыларына iдӧк олғаннарның iҷе-пабалары ӧткiн полысчалар. «Iҷе-пабалар патрульы» халых пiрiгiзi саайларны, хорғысты полдыртпазына кӧстеглiг тоғысты апарчалар. Оларның ӧӧн пӧгiнi – кiчiглернi чолдағы хорғыстаң арачылап халары паза пасха iҷе-пабаларны постарының кӧзiдiмiнең палаларын чолда, транспортта орта тудынар правилоларға ӱгредерге чӧптирi. Iди Ағбандағы 1 паза 4 №№ школаларның ӱгренҷiлерінiң iҷе-пабалары иртенгi туста водительлернең, палаларны тарт чӧрчетсе, хайди даа ӧнетiн олған одыртчаң креслонаң тузаланарға кирек полчатханынаңар чоохтааннар. Iдӧк палаларына чолны орта кизер правилоларны тӧремiл искiр турарға чӧп пиргеннер.
Таныхтирға кирек, мындағ мастер-класстар паза акциялар тиксi Хакасияның олған садтарында паза школаларында иртчелер.
Сом Дмитрий Сунчугашевти
Автор :
Татьяна Кыштымова
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде