Артыхтары адалды
13.09.2024
Хабарлар
Марығ араласчызы Владислав Коков сыйых алды
Марығ. Хакасиядағы ӧрт ӱзiрҷеңнер аразында мындағ арға-мӧрiй чыл сай иртiрiлче
Пу наада Россия МЧС-ының республикадағы пӧлиинiң ӧрт ӱзiрҷеңнернiң частьтары аразында хазыр марығлар парғаннар. Анда ӱс аймах кӧрiмҷе иң артыхтары аралазарға кирек полған. Аннаңар полған на команда ағаа нандырығлығ оңдайнаң хайған, чахсы тимнен саларға харасхан. Прайзы даа чахсы пiлче, республикадағы иң артых ӧрт ӱзiрҷеңнер санына кiрiп алары оой нимес.
Пу марығны сыбыра пӧзiк синде иртiрче Хакасияның ӧрттер ӱзiрҷеңнер службазы. Арға-мӧрiйнiң араласчылары ӱс аймах кӧрiмҷе постарының устарын кӧзiтчелер: «Хадағҷыларның иң артых устағҷызы», «Отделениенiң иң артых командирi» паза «Ӧрт ӱзiрҷеңнернiң иң артығы». Че сыйыхтарнаң пастағы, iкiнҷi, ӱзiнҷi орыннар алған кiзiлер таныхталчалар. Мына хаҷан хазыр марығ пасталча.
Постарының устарын сынирға килгеннерге ӧӧн тоғыстары хоостыра 18 аймах сурығларға нандырарға килiскен. Саба нандырығ пирiлзе, кӧрiлген тусха 10 секунда хозылча. Аның соонда турникте тартынар марығ пасталған. Тартынған сай кӧрiлген тустаң 2 секунда хызырыл турған.
Хазыр суум-саам пасталыбысхан, хаҷан командалар аразында ӧрт ӱзiрҷеңнiң кип-азаан табырах кизiбiзерiнҷе, саайға кiрген кiзее пастағы полызығ пирерiнҷе, ӧнетiн тимнелген тураның iкiнҷi хадылынзар сых парыбызарынҷа паза анда пағны палғап саларынҷа, ӧрт ӱзiрҷең «рукавты» кирек орынҷа сал парыбызарынҷа марығ пар сыхханда. Полған на кӧрiмге iдӧк позының тузы пирiлче: маңнанғазың – cаннар хызырылча, соона халғазың – cаннар хозылча.
Арға-мӧрiйнiң чиңiсчiлерiн, сыйыхтығ орынға сыхханнарны нинҷе сан чыып алғаны хоостыра паалап турғаннар. Олаңай кӧрiгҷiлерге кӧмес пасхаҷыл арах таа пiлдiрген полар. Ӧӧнiнде кем прайзынаң кӧп сан чыып алған, ол чиңiсчее саналча. Мында, тiзең, иң асхынах саннығ марығ араласчызы пастағы орынға сыхча.
Iди «Хадағҷыларның иң артых устағҷызы» кӧрiмде орыннар пiди ӱлестiрiлгеннер: 1 орында – Евгений Владимиров, Боград аал, 2 орында – Олег Шикин, Пии аал, 3 орында – Владимир Осипов, Хубачар аал; «Отделениенiң иң артых командирi» кӧрiмде: 1 орында – Денис Пяткин, Боград аал, 2 орында – Сергей Третьяков, Пии аал, 3 орында – Владислав Коков, Асхыс аал; «Ӧрт ӱзiрҷеңнернiң иң артығы» кӧрiмде: 1 орында –Александр Ердеков, Хубачар аал, 2 орында – Евгений Куликов, Пии аал, 3 орында – Иван Мурза, Пӱӱр пилтiрi аал.
Кибiрге кiрген арға-мӧрiй тоозылғанда, республикадағы ӧрт ӱзiрҷеңнер службазының устағҷызының орынҷызы Аркадий Владимирович Писаренко чиңiсчiлерге паза сыйыхтығ орынға сыхханнарға дипломнар читiрген, мыннаң мындар даа оой нимес тоғыстарыңда пӧзiк чидiглерге чит турарға алғаан.
Марығда аралазып, маңат тимненiс кӧзiткен ӧрт ӱзiрҷеңнерге сала соонаң арах ахчалығ сыйых пирiлердеңер искiрiлгенде, прайзының даа сырайларында ӧрчiлiг кӱлiмзiрес чари тӱскен.
Сом Хакасияның ГО-ҷа, ЧС-ча паза ПБ-ҷа хазна комитеді пресс-службазыни
Автор :
Татьяна Кабаева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
