Хумартхы тастарда наа аттар паза хозылбазын
18.09.2024
Хабарлар
Нааҷылалған хумартхы тас хыринда митинг ирткен
Хумартхылас. Алтай аймаандағы Новомихайловка аалда, чир-суун арачылап, чуртастарын пир салған чааҷыларға хумартхы тас нааҷылалған соонаң азылғанына чарыдылған митинг ирткен
Пӱӱл азығ айында чуртағҷылар чыылиинда аал чӧбінің пазы Пётр Лавринов Илбек Ада чаада чат халған матырларға хумартхы тасты нааҷылир пастағнаң сыххан. Кізілер аннаң чарасханнар. Часхызын аал чӧбі Хакасияның национальнай паза территориальнай политика министерствозы иртірчеткен «Чонға кирек иң артых проект» марығда чиңіс тутхан. Проектті арачылап, олар 1 миллион 450 муң салковай утып алғаннар. Аны чуртасха киреріне хоза аймах бюджедінең 750 муң салковай позыдылған, аал чӧбі бюджедінең – 330 муң салковай. Аал чуртағҷылары паза идінҷектері ідӧк ахчанаң хабасханнар.
Хумартхы таста 107 чааҷының ады-солазы пазыл парған. Нааҷылалған соонаң Илбек Ада чаадаң айланмааннарның аттарына хоза ӧнетін чаа операциязында, чаалазығ пӧгінін толдырчадып, чуртастарын пир салған ӱс оолның ады пазылған. Ідӧк хумартхы тастың сидені нааҷылалған, ибіркізі иптелген, одырчыхтар турғызылған.
Хумартхы тасты азарға Хакасияның национальнай паза территориальнай политика министрі Лев Сафьянов, Алтай аймаа пазы Ирина Войнова ӧнетін килгеннер. Ідӧк республиканың ветераннар чӧбі кнезінің орынҷызы Василий Будылин, президиумның кізілері Милентина Амзаракова, Василий Логинов, Андрей Минин кил парғаннар. Олардаң пасха, митингте Новомихайловкадағы аал чӧбінің устағ-пастаа, тоғынҷылары, школаның ӱгретчілері, ӱгренҷілері, чуртағҷылары араласханнар.
Лев Александрович Хакасияның национальнай паза территориальнай политика министерствозының алғыстастарын чуртағҷыларға кирек проектті чуртасха кирерге ӧткін полысхан идінҷектерге читірген. Олғаннарны чир-сууна хынарға ӱгредіп, чарыдығлығ тоғысты маңнаныстығ апарчатхан ӱчӱн, Новомихайловкадағы школаның директоры Галина Еременко Республиканың Ветераннар чӧбінің Аарластығ пічиинең таныхтатхан. Галина Ивановнаның кӱстенізінең школада музей тӧстелген. Анда ӱгренҷілерге матыр чир-суғҷыларынаңар, чаа тузындағы аар чуртастаңар, тылда істенген кізілердеңер кӧп чапсых, тузалығ ниме піліп аларға чарир.
Хумартхы тас нааҷылалғанына аал чуртағҷылары ӧрінчелер. Школа директорының орынҷызы Елена Кичигешева аның иптел парғанын таныхтапча. Иргі хумартхы тас ибіре тиректер полған, олар кирібіскеннер, хорбылары хайда ла полза ӧсклебіскен полғаннар тіп чоохтапча.
Елена Юрьевнаның сӧбірезінде чаа хорылыстарынаңар чахсы пілчелер. Хада хонғанының ағазы Николай Борошенко Илбек Ада чаада араласхан. 18 частығда армия службазына хабылып, чиит оол Хызыл Знамялығ Пирятин дивизиязында махачы чааластыр, разведчик полтыр.
– Ол взводтың командирі полтыр. Чоохтаҷаң полған – позы ам даа чиит, взводында, тізең, Хакасиядағы госпитальларда имнен килген 40 азыра частығ иреннер. Оларнаң командовать поларға пірее тустарда уйадыстығ пілдірҷең, таң, аннаңар, командир полза даа, разведкаа позы чӧр килҷең полтыр», – улуғ кізінің чоохтарын сағысха кирче Елена Кичигешева. Чаада Николай Савельевич нинҷе-де хати палығлаттыр, ідӧк махачызы ӱчӱн таныхтаттыр. Айланғанда, совхозта тоғынтыр. 2015 чылда, 96-ҷы чазын апарчадып, сын чирзер парыбыстыр. Новомихайловкада ол халғанҷы ветеран полтыр.
Хумартхы тасты асчатханда, чоох тутханнар анда наа аттар паза хаҷан даа хозылбазын тіп таныхтааннар. Митинг соонаң хумартхы тас тӧзінзер чахайахтар салылған.
Сом Дмитрий Сунчугашевти
Автор :
Татьяна Кыштымова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде