Ниик паанаң тузалан халыңар
18.09.2024
Хабарлар
Владимир Федотов, Максим Виноградов, Наталья Михайленко паза Алексей Аверченко хабарҷылар сурығларына нандырчалар
Брифинг. Хакасия правительствозы паза чарытхы читірчеткен компаниялар чарыс айының 6-ҷы кӱніне теере алынҷа турада чарытхы кӱзін ӧскірерінҷе айланыстарны ниик пааға толдырарға чӧптес салғаннар
Ӱртӱн айы пасталарына республика чуртағҷыларын алынҷа турада чарытхы ус парчатханы сағыссыратхан. Тасхар сӧрӧн полыбысхан сылтаанда, кӧбізі хоза чылынҷаң тиріглерні тоғындырып пастаан. Салтарында кем-де чӧптезігде кӧрілген чарытхы кӱзін аза халчатхан, аның ӱчӱн чарытхы позы алынҷа ус парчатхан. Сылтағ, тізең, чарытхыны читірчеткен ӧӧн компанияның наа политиказында. Регионда чарытхы ізестіг читірілер ӱчӱн «Россети» ПАО аны чӧптезігде кӧрілген синінҷе тузаландырар оңдай кирген. Иң пастағызын ол алынҷа тураларға теелче. Че идінҷектер, кічіг паза ортын пос кирее дее ол оңдайға кирілгеннер. Аның ӱчӱн алынҷа тураларда, промышленность предприятиелерінде «хыйға» тиріглер турғызылған. Ол чарытхыны кӧрілген синҷе тузаланарын хайығда тутча. Ол синні аза халзох, турада чарытхы ус парча.
Пу сурығ ӧӧнінде иргі тура, дачадағы тура ээлеріне теелген. Андағ чурт ээлерінің чарытхы тартарына иргі чӧптезіглер полтыр. Ол туста пір тураа 5 кВт даа читкіҷе полҷаң. Амды, тізең, кӧбізінің ибде амғы тусха килістіре техника турча. Тура істінзер суғ тартылған полза, ол тиріглер саны уламох хозыл парча. Салтарында кізінің ибде пір саңай кухнядағы техника тоғынча: холодильник, плита, чайник, микроволновка; ағаа хоза, суғ пирчеткен, чылытчатхан тиріглер: насос, бойлер, кип-азах чуғҷаң машинка... Тиксі ол тиріг пір саңай тоғынза, пілдістіг, чарытхы кӱзі пілдірте хозыл парча. Мында 5 кВт пір дее читпес. Че, чоохтарны искенде, піреезі ол син чарытхы кӱзіне ідӧк турада чылығ поллар идіп алчаттыр. Алында анзы пір дее санға алылбаан полза, амды чурт ээлерін чӧптезігдегі чарытхы кӱзіне тудынарға кӧстепчелер.
Хакасияның ЖКХ паза энергетика министрінің тоғызын толдырчатхан Максим Виноградовтың таниинаң, чарыс айының 6-ҷы кӱніне теере чуртағҷыларның чарытхы кӱзін 15 киловаттха теере ӧскіріп алар оңдай пар. Аның ӱчӱн оларға 4000-ҷа салковай ла тӧлирге килізер: ол санда техническай оңдайлар паазы – 2621 салковай паза тимдезінеңер сағба – 1201 салковай. Чарытхы читірчеткен компания хай пірее полызығларны тикке читірерге тимде, ол санда кізі сурыныс пічиинең позы айланған полза. Чарыс айының 6-ҷы кӱні соонаң даа андағ сурыныснаң чарытхы читірчеткен компаниязар айланарға чарир, че компания олох полызығлар ӱчӱн 5000 салковай алып пастир. Пу ахчаны интернет пастыра айланғаннар тӧлебинчелер.
– Хакасия правительствозы сылтаанда чуртағҷыларның чарыс айының 6-ҷы кӱніне теере 4000 салковайға ла чарытхы кӱзін 15 киловаттха читіре ӧскіріп алар оңдай пар, че пу паа тура істіндегі чарытхы хорадығларын санға алчатхан тиріглерні алыстырарға киректелбинчетсе ле полар. Иргі эмектер тартылған полза, оларны наа кӱске килістіре алыстырарға киректелер, пір фазалығ счетчиктерні, тізең, ӱс фазалығ счетчиктерге. Полғаны ла нинҷее тур парары алынҷа саналча, – чарытхан Хакасияның пааларны хайығда тутчаң хазна комитедінің устағҷы тоғызын толдырчатхан Наталья Михайленко. – Чурт ээзі пастағызын на чарытхы тартырчатса, ағаа полған на киловатт ӱчӱн тӧлирге килізер. Хакасияда турғызылған пааларҷа – 5570 салковай, льготалығ чуртағҷыларға – 1114 салковай.
Хай син киловатт киректелче? Аны санирын чарыт пирген «Россети Сибирь» – «Хакасэнерго» ПАО пӧлиинің устағҷы орынҷызы Алексей Аверченко. Аның таниинаң, чурт ээзіне пір саңай тузаланылчатхан прай техниканың паза тиріглернің кӱзін хозыбызарға киректелче. Тура чарытхы кӱзінең чылыдылчатса, анзына улуғ хайығ айландырарға. Чылығ читірчеткен тирігнің кӱзі тура улиинаң палғалыстығ. Ол ідӧк гаражха паза пасха хоза пӱдіріглерге кӧрілген полза, анзын прай санға аларға киректелче. Анаң тиксі киректелчеткен чарытхы кӱзін чӧптезігдегі чарытхы кӱзінең тиңнестірерге. Чидіспинчетсе, чарытхы читірчеткен компаниязар айланарға.
– Сурыныс пічіктері амды полған на городта паза аймах кінінде РЭС-тарда алылча, ідӧк чуртағҷыларнаң тоғынҷаң кінде пу адресче: Ағбан город, Советскай орама, 172. Чоохтирға кирек, пу орыннарзар чарыс айының 6-ҷы кӱніне теере айланған чуртағҷыларға 4000 салковай ла тӧлир оңдай пар, че ӱстӱнде адалған кирексіністер толдырылза. Пу кӱн соонаң сурыныс пічиин пазарға полысхан ӱчӱн тӧлег алылар. Ол 5000 салковайға тиңнелче. Ідӧк чуртағҷыларның интернет пастыра айланҷаң оңдай пар. Сурыныс пічіктері «Россети» компанияның чарытхы сеть полызығларының порталында алылча: портал-тп.рф. Андада полызығ ӱчӱн тӧлирге киліспес, – таныхтаан Алексей Владимирович.
Сурыныс пічии кірген соонаң чарытхы читірчеткен компания техническай оңдайлар парын сыныхтапча паза кирек пічіктерні тимнепче. Анзына иң кӧп 15 кӱн пирілче. Чарыс айының 6-ҷы кӱніне теере айланған чуртағҷыларға тоғыстарны толдырарға 30 кӱн позыдылар. Ол чӧптезіг иділген кӱннең сығара саналар. Пасха туста тоғыстар толдырылар тус техническай оңдайларнаң палғалыстығ: 30 кӱннең пасти чарым чылға теере.
Алексей Аверченконың искіриинең, тузаланылчатхан чарытхы кӱзін сыныхтағда тударынҷа алызығлар кирілчеткеннеңер искіріг пӱӱл кӱрген айынаң пасти тарадыл сыххан. Искіріг видеода, айланыстарда паза памяткаларда тимнелген. Орғах айының 30-ҷы кӱнінде ле, хаҷан кинетін сӧрӧн пол килген, кирек пазы пілдістіг пол парған. Чарым ай аразына чарытхы читірчеткен компаниязар сурыныснаң 1300 чуртағҷы айланған, ол санда 740 кізі – чарытхы кӱзін ӧскір пирерінҷе. Пу тусха «хыйға» тиріг 6000 азыра турада турғызылған. Ол тоғыс мыннаң мындар узарадылар. Сурығларнаң компанияның пірге «ізіг линия» номерінҷе айланарға чарир: 8-800-220-0-220.
Алынҷа тураларда счетчиктерні «Россети Сибирь» – «Хакасэнерго» ПАО алыстырчатса паза турғысчатса, кӧп квартиралығ тураларда ол кирекнең «АтомЭнергоСбыт» айғасча. Директор орынҷызы Владимир Федотов брифингте араласханох. Олар чуртағҷыларға ідӧк полысчалар. Кӧзідімге, турада чӧптезіг 15 киловаттха полза, че аның чарытхы кӱзі аннаң тӧбін турғызылған полза, пу компанияда алҷаасты хыйа идерге полыс пирчелер. Че Владимир Михайлович, чарытхы кӱзін ӧскірерге киректелзе, «Хакасэнергозар» кӧні айланарға чӧптепче.
Тиксі пу тоғыс республикада чарытхы ізестіг читірілер ӱчӱн иділче. Энергетиктер іди алында артых тузаланылған чарытхы кӱзін позыдып аларына ізенчелер, салтарында сетьтерде дее саайлар саны хызырылар, уламох Ағбан-Харатас агломерациязында.
Сом Дмитрий Сунчугашевти
Автор :
Наталья Сюптерекова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде