Сигіс регионны – сигіс кӱнге
18.09.2024
Хабарлар
«Сибирь мында» проект араласчыларын «Алтыр» мода театры удурлапча
Туризм. Ӱртӱн айының 9-ҷы кӱнінде Омск городтаң Сибирь регионнарынҷа «Сибирь мында» презентация туры чорыхха сыххан
Пу алғым проект Сибирьдегі федеральнай округча Россия президентінің полномочиеліг кізізі Анатолий Серышевтің хабазиинаң чуртасха кирілче.
Пастағы туристтер – ӧнетін чаа операциязы араласчыларының сӧбірелері, пенсионерлер, волонтёрлар, туроператорлар, хабарҷылар – Омск городтаң чорыхха сыхханнар. Аймах субъекттер чуртағҷылары, Сибирь регионнарында полып, танығлығ орыннарнаң танысханнар. Пір регионға чорыхха пір ле кӱн пирілген.
«Сибирь мында» проект араласчылары Россияның иң килкім город санына кірчеткен Новосибирскте пол килгеннер. Анда олар операның паза балеттің хазна академия театрында паза Р.А.Шилоның адынаң зоопаркта пол килгеннер, хайзы Уралда иң улуғ зоопарк полча.
Анаң чорыхчылар Алтай крайындағы Бийск городсар читкеннер. Пу город І Пётр чахиинаң тӧстелген. Мында проект араласчылары ікі ӧмее чарылғаннар. Пір ӧме Архиерейск подворьезінде, Алтайдағы духовнай миссия тархынының музейінде паза Василий Шукшиннің кічіг чир-суу Сростки аалда полғаннар. Ікінҷі ӧме «Легенды Алтая» этнокомплекссер парған.
Тӧртінҷі кӱнінде туристтер Томсксар читкеннер. Пу город 1604 чылда тӧстелген. Чорыхчылар Воскресенск тағда паза андағох аттығ тигірибде полғаннар, хайзында Сибирьдегі иң килкім Царь-колокол пар. Ідӧк городтың тархын музейінзер пар килгеннер, «Дом на Пушкина» этнография комплексінде улуғ песте пирогтар тимнирінҷе мастер-класста араласханнар.
Кемеров облазындағы Новокузнецк городта тур араласчылары «Кузнецкая крепость» музей-заповедникте, «Параскева Пятница» орыс культура кінінде полғаннар.
14 ӱртӱнде «Сибирь мында» проект араласчылары Ағбан городсар читкеннер. Тимір чол вокзалында оларны Хакасия пазының орынҷызы Юлия Исмагилова удурлаан.
– Хакасия пазы Валентин Олегович Коноваловтың адынаң сірерні Хакас чирінде ӧрініснең удурлапчам. Хакасия – ол уғаа чапсых регион. Аны азых тигір алтындағы музей тіп адапчалар. Республикада археология ис-пайының 30 муң азыра объекті саналча. Хакасия археологияның чир-сууна саналча. Мындағ улуғ нимес чирде климаттың пис зоназы пар, хайзы полған на 30 километрде алысча – ол чазы, арығ-чазы, тайға, тағлар. Мында чылда 300 кӱн азыра айас турча, аннаңар аны кӱнніг Хакасия адапчалар. Республикада арбуз, абрикос паза виноград ӧсчелер. Турист мында пос кӧңніне килістіре тынағ таап алар. Хысхыда – ол тағ-саналығ курорт, чайғыда – тустығ кӧллер паза пасха даа ниме.
Арғыстар, пӱӱн сірер уғаа чапсых объекттерде пол килерзер. Сірер Хакасияа хыныбызарзар паза сірернің пеер хатап айланар кӧңніңер полар тіп сағынчам. Піс сірерні Хакас Республикада хаҷан даа ӧрініснең удурлирға тимдебіс! – теен Юлия Исмагилова.
Аалҷыларны «Алтыр» мода театры паза «Кӱн сузы» ансамбль удурлааннар.
Иркутск облазындағы Усть-Илимск город чуртағҷызы Дарья Сидикова чорыхта палаларынаң араласча.
– Алтынҷы регионзар килдібіс. Пис городта полып, Томск тың кӧңніме кірген. Анда кӧп чыл мының алнында пӱдірілген туралар илееде. Алтай крайында сіліг тағларға чапсаам. Хакасияда хаҷан даа полбаам.
Піс кӱнӧрте чапсых орыннарҷа чӧрчебіс, анаң хараазын поездтіг парчабыс.
Ағбанда пісті уғаа чахсы удурладылар. Мында аалҷыларны удурлирға хынчатхан чон чуртапча. Пісті полған на регионда концертнең удурлааннар. Пу проектте араласчатханыма уғаа ӧрінчем. Нинҷе-де ле кӱнге илееде регион кӧріп алар оңдай пирілче, – теен Дарья Сидикова.
Усть-Илимск городтаң ідӧк Снежана Байден паза Галина Галиаскарова килгеннер. Снежана Байден «Ада чир-суубыс арачылағҷылары» фондтың социальнай координаторы полча. Ол чорыхха СВО-да ӱреен чааҷыларның сӧбірелерін ағылған.
– Піcтің городтаң проектте 11 кізі араласча. Сибирь городтары пос оңдайынаң пасхалалчалар. Піс полған на городта чапсых орыннар кӧріп алғабыс. Алтайда кибірлерге, Омскта уғаа чапсых музейлерге, Бийскте фольклорға чапсаабыс. Киҷее піс Новокузнецкте полғабыс. Аның тархыны уғаа пай, орамалары алғым, – сағыстарынаң ӱлескен Снежана Байден.
Анаң аалҷылар, автобустарға одырып, Хакасияның чапсых орыннарынҷа чорыхха сыхханнар. Олар Л.Р.Кызласовтың адынаң чир-суғ ӱгренҷең музейде, Сойан-Сус ГЭС-та паза Саяногорсктағы «Тортуга» тынағ паркында пол килгеннер.
Чорыхтың читінҷі кӱнінде туристтер Хызылчарзар читкеннер. Анда олар Параскева Пятницаның часовнязында, Татышевтің олтырығында, В.П.Астафьевтің национальнай кінінде паза «Красноярские Столбы» национальнай паркта пол килгеннер.
Чорыхтың халғанҷы кӱнінде проект араласчылары Иркутск облазында полғаннар. Анда олар «Тальцы» комплексті кӧріп алғаннар паза Байкал кӧлҷе пароходнаң чӧргеннер.
«Сибирь мында» регионнар аразындағы проект Сибирьдегі федеральнай округча Россия президентінің полномочиеліг кізізі Анатолий Серышевтің, «Сибирское соглашение» регионнар аразындағы ассоциацияның, «Ада чир-суубыс арачылағҷылары» хазна фонды паза федеральнай, регион турист операторлары хабазиинаң чуртасха кирілче. «РЖД Тур» ООО промотурның официальнай операторы полча. Проектте 100 кізі артиинаң араласча.
Сом Юлия Исмагилованың телеграм-каналынаң алылған
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
