Чолда сизіктіг полары – чуртасха аарлығ
18.09.2024
Хабарлар
Школа хыринда инспекторлар іҷе-пабаларға сизіндірігліг брошюралар читірчелер
Чӧрім. Чолларда хорғыс чох полар ӱчӱн, ГАИ тоғынҷылары олғаннарға паза оларның іҷе-пабаларына аймах чӧрімнер иртірчелер
Іди пу кӱннерде Харатас городтың Чайаачы паза тынағ кінінде чӧрістің чиит инспекторлары (ЮИД) отрядтарының устағҷылары пастағы чыылығ иртіргеннер. Городтағы ЮИД Лигазының координаторы Ольга Колодина ӱгретчілерні ӱгредіг чылына кӧріл парған пӧгіннернең таныстырған. Хазна автоинспекциязының улуғ инспекторы Ирина Яковенко, городта олғаннар хайдағ саайға сыбыра кірчеткенін істезіп, ӱгретчілерге іҷе-пабаларнаң ӧткін тоғынарға чӧп пирген. Чыылығда ідӧк полиция подполковнигі, чазы читкелектер киректерінҷе пӧлік пастығы Татьяна Лядова араласхан. Аның таниинаң, ЮИД отрядтарынзар профилактика учёдында турчатхан олғаннарны тартарға кирек.
Соонаң прайзы «Пристегнись, Хакасия!» чӧрімге хозылған. Ӱгретчілер искіргеннер, олар ӱгренҷілерге машинада хайди даа хурнаң хурчанарға кирек тіп ӱгреде чоохтапчалар.
Саяногорск городта ГАИ тоғынҷылары, ідӧк «Пристегнись, Хакасия!» чӧрімде аралазып, транспорт тінін тутчатхан водительлерні тохтадып, оларға олған сіреелерінең паза кӧрілген хурнаң хайди даа тузаланарға кирек тіп сизіндіріг иткеннер. Чол чӧрізі правилоларына тудынғаны саайларда кізі чуртазын ал халча. Че оларны сайбаза, саайда аар палығлат саларға алай, улам хорғыстығ, ӧл парарға даа айабас. Чӧрімнің араласчыларына искірігліг брошюралар читірілгеннер.
Пуох чӧрімге Ағбандағы 29№ школаның ӱгретчілері паза ЮИД-тың араласчылары хозылғаннар. Олар ГАИ тоғынҷыларынаң хада водительлерні олған сіреелерінең паза хурнаң тузаланарын ундутпасха хығырғаннар.
Іҷе-пабалар даа «Пристегнись, Хакасия!» чӧрімнең оортах турбинчалар. Ағбандағы 1№ школа тастында олар ӧнетін сыныхтағ иртіргеннер. Иртен палаларын школазар машиналығ ағыл килчеткен іҷе-пабаларға чолда орта чӧрердеңер тузалығ чӧптер пиргеннер. Ідӧк школа хыринда чолны саба кисчеткен ӱгренҷілерге сизіндіріг иткеннер.
Ағаа хоза, Саяногорск городтың ГАИ тоғынҷылары олғаннарның хайиин тартчаң улам хынығ оңдай таап алғаннар. Пастағы класс ӱгренҷілерін чолны сизіктіг кизерге «Бамблби» робот ӱгреткен. Аннаң пасха, кинофильмнің матыры «иб-школа-иб» хорғыс чох чолҷа орта чӧрердеңер чарытхан. Школаа парчатхан чолда хорғыстығ орыннар тӧреміл тоғас парчалар. Кӧзідімге, пірее тура кистінең машина даа сыға салча. Ідӧк ЮИД отрядының олғаннары кічіг ӱгренҷілерге харасхыда хайди даа чарыпчатхан кип-азах кис чӧрерге чӧп пиргеннер.
Таныхтирға кирек, мындағох тоғыстар Пии паза Ағбан пилтірі аймаанда ӧткін апарылчалар. ГАИ тоғынҷыларына волонтёрлар хозылчалар. Олар транспорт ээлеріне сизіндірігліг брошюралар таратчалар.
Сом Хакасиядағы чол хазна инспекциязының «ВКонтакте» соцсетьтегі страницазынаң
Автор :
Тимнеен Татьяна Тютюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
