Хазыхтарын пиктееннер
18.09.2024
Хабарлар
Людмила Чанкова пағлығ пасхысча парир
Чӧрім. Тынағ кӱннерде Ағбанда Хазых кӱні ирткен. Чӧрімде муниципалитеттің тоғысчы ӧмелері араласханнар
Хакасияның ӧӧн городында 1990 чылларда чахсы кибір салылған – кӱскӱ сай Хазых кӱнін таныхтиры. Анда городтың тоғысчы ӧмелері, ӱгретчілер, олғаннар араласчалар. Кӧзідімге, 2022 чылда мероприятиее олған садынзар чӧрчеткен иркеҷектердең ала cығарғаннар. Палалар, прай кӱстерін салып, ГТО нормативтерін толдырчатханнар. Пӱӱл программа нинҷе-нинҷе марығдаң пӱткен. Читі муниципальнай учреждение Спартакиадада кӱс сынаптыр. Ӱгретчілерге паза олғаннарға турист маршруды тимнелген. Чітіг сағыстығлар паза чапчаңнар «Лабиринт» адалчатхан марығда аралас кӧргеннер. Ол астыхпин чӧрерге хынчатханнарға кӧрілтір. Ағаа хоза, кізілернің грипптең тоғыр вакцина турғыстырып алар оңдай полған.
Ӱлӱкӱн 12.00 часта пайрамни азылған. Чыылған чонзар айланған Ағбан пазының орынҷызы Татьяна Карташова. Татьяна Евгеньевна теен:
– Ағбанда хазых чуртасха тартылчатхан улус. Пӱӱн дее чӧрімге илееде тоғысчы ӧме хозылды. Спорт чонны піріктірче. Прайзына наа арғыстар таап аларға, чахсы тынанып аларға алғапчам.
Ідӧк чылығ сӧстер читірген Ағбанның культураҷа, чииттер киреенҷе паза спортча устаныс пастығының орынҷызы Сергей Филимонов. Пастыхтарның чоохтары сыйыхтаснаң узарадылған. Спартакиадада сыйыхтығ орынға сыххан ӧмелерні чеестееннер. Командалар асхынах полғаннаңар, марығ табырах ирт парыбысхан. Пос оңдайлығ спортсменнер эстафетада, чайғыдағы кёрлингте устарын кӧзіткеннер. Ідӧк олар орыннаң узунға сегіргеннер, азахтарын хаптыр салып, постарын кӧдіргеннер. Прайзын Ағбанның культураҷа, чииттер киреенҷе паза спортча устанызы ас парыбысхан. Н.Г.Булакиннің адынаң спорткомплекстің ӧмезі ікінҷі орынға сыххан. «Абакан» медиахолдингтің хабарҷылары хола медальлар холға киргеннер.
Школа ӧмелері ӧӧнінде туризмге чарыдылған марығда кӱстерін сынааннар. Ол ікі чардыхтаң пӱткен. Араласчыларға бивакты тимнеп саларға паза турист маршрудын иртібізерге киректелген. Пас меетке сыхханнарның пірсі – чир-суғҷыбыс Людмила Чанкова. Чиит ипчі ӱгредіг киреенде 2010 чылдаң іcтен парир. Ол илееде тус Ағбанның 24 № школазында социальнай педагог полып тоғынған. Халғанҷы ӱс чыл городтың 2 № школазында директор орынҷызы полча. Людмила Сергеевнаның таниинаң, хаҷан-да ол спорт туризмінҷе марығларда узын сынаан. Опыды полыс пирерге кирек.
Марығ оңдайларынҷа 2 № школаның командазында алты кізі полған: ікі ирен паза тӧрт ипчі. Пӧгін – алты чардыхтаң пӱткен маршрутты табырах иртібізері. Анзы оой полбиндыр. Пастап пос оңдайлығ спортсменнер чардыҷахтаң чардыҷахха сегір парыбысханнар. Анаң, кимее одырып, искілер полызиинаң кӧрілген орынға теере чӱскеннер. «Маятник» алай «Тарзанка» иң сидік чардых полтыр. Людмила Чанкова ӧӧрезінең хада аны пір дее ирт полбаан. «Тарзанка» полызиинаң суғны кискен ползалар, ікізі дее суға тӱзерҷік. Хайди таныхтаан чир-суғҷыбыс, холларына кӱс читпинче. Ӧмедегілер, пағлығ пасхысча сығып, пір дее сидіксінмееннер. Салтарында команда маршрутты 9 минута 31 секунда аразына иртібіскен. Анзы тың на чахсы нимес. Школаның алнын ідӧк 7-ҷі паза 9-ҷы класстарның ӱгренҷілері алғаннар. Оларға алынҷа маршрут тимнелген.
Хазых кӱні тузында бивактар тимнирі хаҷаннаң кибірге кір парған. Палаткалар турғызылған орынны таап аларға оой. Ол саринаң татхыннығ чиистің чызы сабылча. Полған на бивакта пластмасс бутылкадаң иділген хол чуғҷаң ідістер пар, газтығ плиткада чей хайнапча, столда бутербродтар, варенье паза пасха ниме-ноо. Пір сӧснең, чорыхха сыхсалар, астабастар.
Тиксі алза, ӱлӱкӱн хомай нимес ирткен. Итсе, сӧрӧн кӱн кізілернің кӧңнін тӱзірген. 21 ӱртӱнде спортха хынчатханнарны «Нацияның крозы» чӧрімге хозыларға хығырчалар. Ӧӧн пас меет 11.00 часта Ағбанның тынағ паркында иртер. 3 – 9 частығлар 1000 метр чӱгӱрерлер, 10 частығлардаң пасти 4000 алай 6000 метрні тобырарға чарадылча.
Сом авторни
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
