Пастағы чиңізі соонаң олаңай кӱреске улам хыныбысхан
18.09.2024
Статья
Милана Сагалакова
Кӱн матыры
Ӱр ниместе Хызылда оолах-хызыҷахтар аразында олаңай кӱресче тиксі Россия синіндегі марығлар ирткеннер. Анда 195 спортсмен араласхан. Олар Хакас, Тыва республикалардаң, Кемеров облазынаң паза Хызылчар крайынаң полғаннар. Анда Ағбандағы 22 № школаның 9 класс ӱгренҷізі Милана Сагалакова пастағы орын алған. Ол 46 килограммға теере кӧдірімде харбасхан. Ідӧк чапчаң хыc, иң артых техникалығ кӱресчі чіли саналып, алынҷа сыйыхнаң таныхталған. Мындағ ӧткін спортсменнеңер піс чоохтап пирербіс.
Милана Евгений Владимирович Сагалаковтың паза Валентина Васильевна Чебодаеваның тун хызы полча. Ол спортсар хайди килгеннеңер іҷезі чарыт пирген.
– Милананың туңмазы Эльдар 1 класста ӱгренчеткенде, мин аны олаңай кӱреске пас салғам. Че оолағым чалғызан чӧрбезін тіп, Милананы хадох чӧптеп алғам. Ол туңмазын ӱдес чӧрзін тіп. Хызым позы андада 4 класста ӱгренчеткен. Ол туста Ағбандағы 22 № школазар олаңай кӱрес наа ла кирілген. Палаларымның тренері Денис Семёнович Домогашев полча, – чоохтапча Валентина Васильевна.
Спорт секциязына пір ай чӧр салып, тренер Денис Семёнович Милананы Таштып аймаандағы Мадыр аалзар марыға апарған. Марығлар хайди иртчеткенін кӧріп алзын теен ол іҷе-пабазына. Че хызыҷах, андар парып, мирген харбазыбызып, ӱзінҷі орынға сығып алған. Іди Милана олаңай кӱреске улам хыныбысхан.
Спортсмен хыстың сағызында Смоленскте ирткен тиксі Россия синіндегі марығ тирең сиип парған. Ол ікі чыл мының алнында полған. Прай хазнадаң илееде сыырах оолах-хызыҷахтар чыылыс парғаннар. Че Милана тӧдір пазынмаан. Позының кӧдірімінде хызыҷахтарнаң кибіске пір пірге сығып, оларны чапчаң силібіс турған. Че пір кӱресчінің кӱзі паза чапчаңы артых ла пол парған. Ол улуғ марығда Милана кӱмӱс медаль холға кирген.
Милана Сагалакова спортча тиксі Россияны ибір парир. Ол марығларға Новосибирск, Кемеров, Иркутск, Улан-Удэ, Хызылчар, Раменское городтарзар чӧрген. Ағбанда иртірілчеткен марығларда тӧреміл араласча. Чиит хыстың ибінде саны чох медаль-кубоктар хайраллалча. Спортта улуғ чидіге читчеткен ӱчӱн Милана стипендия алча. Ағаа хоза, полған на чайғы каникулларында ол спорт лагерьінзер тынанарға чӧрче. Эльдар туңмазы пиҷезінең халбасха кӱстенче. Ідӧк, марығларға чӧріп, чиңістіг орыннар алча.
Милана кічігдең сығара кӱлӱк. Школаның чуртазында ӧткін араласча, прай даа предметтерҷе маңнаныстығ ӱгренче. Амғы туста чиит хыстар ахча тоғынар ӱчӱн кірбіктер ӧскірерге, ӧнетін аппаратнаң тырғахтар сырлирға ӱгреніп алчалар. Милана андағ модадаң халбинохча. Тренировкалары кӱннің сай даа полза, ол арғын кірбіктер идерге ӱгреніп алған. Амды оларны ӧӧрелеріне ит пирче.
Ибінде ол іҷезіне чахсы полысча. Аның ӱс туңмаҷах пар, прайзы оолахтар. Эльдар 5-ҷі класста ӱгренче, Мирослав олған садына чӧрче, Аймир пір частығ. Милана, іҷезіне пик чӧлег полып, туңмаларын кӧрче. Эльдарға уроктар идерге полыс пирче, кічіглерінің ойнаҷахтарын чыы тартыбысча, кухняда ідіс-хамыс чуубысча. Валентина Васильевна хызын пицца идерге ӱгрет салған. Амды Милана пиццаны оолахтарға сыбыра пызыр пирче.
– Чайғызын піс сӧбіренең Асхыста, Хамыстығ станцияда паза Таштып пилтірінде чуртапчатхан туған-чағыннарыбыссар ааллап чӧрчебіс. Іди парзабыс, арығзар сығыбысчабыс. Милана ағас чистегін, чир чистегін, хызылғат, харағат теерерге чахсы полысча. Анаң ибде хада варенье хайнатчабыс. Ӱгӱрсӱ, миске тустазам, хызым хости ла полча, – тіпче іҷезі.
Милана позына ӧӧрелер чапчаң таап алча. Ӧӧнінде спорт киреенде ӧӧрелері кӧп. Чиит хыстың хынған сағызы – школаны чидігліг тоозыбызып, имнег киреенҷе профессия алып алары. Іҷе-пабазы хызының спорттағы пӧзік чидіглері ӱчӱн тренер Денис Семёнович Домогашевке улуғ алғызын читірчелер.
Спорт ол чуртас тіпче Милана. Ол кізіні нандырығлығ поларға ӱгретче, пӧгіннерні толдырарға кӱстепче. Спортнаң айғасчатхан кізі позын ізестіг тудынча, хазии даа пик полча. Хаҷан-да олаңай кӱреснең айғазарға пастаанын орта хаалағ полған тіпче чиит хыс. Ол пис чыл мының алнында чахсы піліс пирчеткен тренер Денис Домогашевтің холына кір парғанына ӧрінче. Денис Семёнович олғаннарға микелерні хайди орта толдырарға киректелчеткенін пілдістіг иде чарыт пирче. Милананың пабазы Евгений Владимирович хызының чидіглеріне морсынча, чалғыс «чахайағына» поғдархапча, че олох туста оолахтары спортта мындағох чахсы салтарлар кӧзідерлеріне пик ізенче.
Сом Валентина Чебодаевани
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
