Экспорт: хаалағларны хайраллап халарға, наа рыноктарзар кірерге
20.09.2024
Хабарлар
Чыылығ тузында
Экономика. Хакасия пазы Валентин Коновалов республика правительствозындағы экспорт тоғызын тилідерінҷе чӧптің чыылиин иртірген
Республика пазы, чӧп аралысчыларынзар айланып, Хакасияның экспорттағы чидіглерін хайраллирына, ідӧк ол кӧстегде мыннаң мындархы ӧзізіне килістіре хоза оңдайлар тӧстирге киректелчеткенін таныхтаан. Орындағы продукцияны садарына наа рыноктар тапханы – ол бизнестің тилізі ле нимес, аның салтарында регион экономиказын ӧскірче.
– Хаалағларны хайраллап халарға паза улам пӧзік синге пӧгіннер турғызарға кирек. Пістің анзына прай ниме пар. Кӧп хазна піснең тоғынарын кирексіпче, пістің продукция кирексіністе. Ол ас-тамах, ниик промышленность товарлары, аал хонииның паза пасха даа отрасльларның. Оларны пістің хырығ озариндағы арғыстарға кӧзідерге кирек, Хакасияның продукциязын сатчаң наа рыноктар тілирге паза оларзар кірерге, – теен Валентин Коновалов.
Экспортча пӱӱн Хакасия хомай нимес орыннарда: Сибирь регионнары аразында 3-ҷі орында паза Россияда 12-ҷі орында. Геополитика киреен санға алза – ол чахсы салтар, санапчалар эксперттер.
Пу чылның сигіс айына агропромышленность комплексінің продукциязын экспортха ысхан синҷе республика ирткен чылның тиксі синін амох ас парыбысхан.
Ӧӧн чирлер, хайдар экспорт парча, ол Хыдат, Узбекистан, Белоруссия, Моол чирі, Казахстан, Киргизия паза Таджикистан.
Идінҷектер товарларын піcтің регионнаң пасха хан чиріндегілерге транспортнаң апарарынҷа полызығ алчалар, анзы экспортёрларға логистикаа пос хорадығларын хызырарға оңдай пирче. Ол тиріг – иң кирексіністіг. Чыл пасталғаннаң андағ хазна полызиинаң 130-ха чағын компания тузаланған.
Тастындағы экономика хайызығларын тыыдар, пірге тоғынҷаң кӧcтеглерні алғыдар паза наа палғалыстар тӧстир кӧcтегнең Хакасиядаң делегациялар хырығ озариндағы хазналарзар бизнес-миссияларнаң чӧрчелер. Халғанҷыларның пірсі – Хыдатсар паза Узбекистанзар чорыхтар. Пасха хан чиріндегілер, тізең, нандырығ оңдайынаң піcтің республиказар ааллап килерге тимненчелер.
Экспортёр полчатхан предприятиелерібіс тее хайызығларны тилідеріне чоннар аразындағы кӧзідіглерде паза форумнарда тӧреміл араласчалар.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
