Хумартхылас. Ағбанның устағ-пастаа туразында город пазы Алексей Лёмин öнетiн чаа операциязында чуртастарын пир салған чааҷыларның сыйыхтарын оларның туғаннарына читiрген

Ағбан городтың устағ-пастаа туразының чыылығлар иртiрҷең кiчiг залында чон толдыра полған. Олар – öнетiн чаа операциязында чуртастарын пир салған матырларның туған-чағыннары. Городтың чааҷы комиссары Николай Францевич, столда орден-медальлығ коробкаларны салып, оларны чыылған чонға читiрерге тимнепчеткен. Прай алты сыйых тимнелген.

Ағбан пазы Алексей Лёмин залдағы кiзiлерзер хысха чоохнаң айланған:

– Городтың аарлығ чуртағҷылары! Украинада иртiрiлчеткен öнетiн чаа операциязы, хомзынысха, иң артыхтарны, иң махачыларны апарыбысча. Чуртастарын анда пир салған пiстiң прай оолларыбыс пiр дее iкiнҷiлес чох матыр полчалар. Олар Ада чир-суубыс, пiстiң пос тiлiнең чоохтазар правобыс, прайзыбыстың алнындағы чахсы чуртазыбыс ӱчӱн чат халғаннар. Пӱӱн оларны сыйыхтаан орден-медальларны читiрербiс, сiрер оларны хайраллирзар, матырлардаңар хумартхылас сiрернең хада хаҷанға даа халар. Хайраллаңар оларны, оолларың, пабаларың, харындастарың ӱчӱн поғдархас полар сiрерге. Сабланыс паза хумартхылас матырларға хаҷанға даа!

Чооғын тоозып, город устағҷызы СВО-да чуртастарын пир салған матыр чир-суғҷыларыбыстың сыйыхтарын оларның туғаннарына читiрген. Сыйыхтар алчатханнарның аразында ӱс хакас сöбiре полған. Чуртазын пир салған 36 частығ Анатолий Сергеевич Сунчугашевтiң Мужество орденiн алған аның хада хонғаны Ирина Алексеевна. Iдöк СВО-да махачы чаалазып, чуртазын пир салған Андрей Валерьевич Тортумашевтiң Мужество орденi аның ипчiзi полған Людмила Валерьевна Байдошеваа читiрiлген. СВО-да пӱӱл сiлкер айында чуртазын пир салған Марат Валерьевич Челтыгмашевтiң Мужество орденi олох айда сöбiрезiне читiрiлтiр, че удостоверениезi пирiлбиндiр, ам аны сағыпчалар. Пӱӱн, тiзең, аның «За храбрость» медальын чааҷының iҷезi Галина Васильевнаа читiргеннер.

Мероприятие тоозылғанда, Россия президентi Указынаң Мужество орденiнең сыйыхтатхан Андрей Тортумашевтiң iҷезi Наталья Тихоновнанаң чоох алысхабыс. Итсе, пiс аннаң хаҷаннаң таныспыс, ол Таштып аймаандағы Чыланнығ аалдаң. Наталья Тортумашева «Хакасияның саблығ пӱдiрiгҷiзi» аарластығ атха турысхан, Хызылчардағы политехническай институтты тоозып, инженер-пӱдiрiгҷi специальность алып, ол прай чуртазын Ағбандағы тимiр-бетон плиталарын сығарчатхан комбинатта iстен парча. Ол сығарған плиталардаң городта кöп тура пӱдiрiл парған.

Оолғы Андрей чардыхти мобилизацияҷа öнетiн чаа операциязынзар парыбысхан. Чаалазарға парар алнында ол туризм киреенең айғасхан, уғаа чалахай, аллығ чӱректiг кiзiнi хада тоғынған арғыстары пöзiк паалаҷаңнар, ағаа тың хынҷаңнар. Аның сырайында сыбыра кӱлiмзiрес полҷаң, хости кiзiлерге Андрей сыбыра полызарға тимде полған. Позы чир-чайаанға уғаа хынҷаң, ыраххы чорыхтарға удаа сыхчаң. Прай категориязы пар водительнi хайда даа тың кирексiҷеңнер.

Хайди чоохтаан Наталья Тихоновна, Андрей СВО-да, iдöк водитель полып, иң хазыр чаалазығларда араласхан. Пылтыр хандых айында чааҷы палығлат салған, госпитальда имненген соонаң пазох позының частьынзар айланған. Че пылтыр 5 чарыста Андрей чаалазығда аар палығлатхан, аны Москвадағы госпитальзар апарғаннар. 15 чарыста чиит оолның чӱрее тохтап парған.

Амды аның паба-iҷезi паза Арина хызыҷаа öкiс хала пардылар. Хыс туңмазы Ольга Ағбанда имҷi полып тоғынча.

Сом Абакан.рф.сайттаң

Сомда: CВО-да чуртазын пир салған Андрей Тортумашевтiң öкiс халған сöбiрезi