«Чонға кирек иң артых проект» марығ. Пу наада Таштып аймаандағы Индiркi Хурлығас аалда Илбек Ада чааҷыларын хумартхылаҷаң орын азыбысханнар. Ол Хакасияның национальнай паза территориальнай политика министерствозы иртiрген марығда утып алған ахчаа пӱдiрiлген

Öлең чазы аал чöбi пазы Олеся Петрунова, чоох тутчатханда, таныхтаан:

– Пiстiң аал чöбiнде Индiркi Хурлығас аалыҷахта ла Илбек Ада чааҷыларын хумартхылаҷаң орын чох полған, амды пiс аны пӱдiрiбiскебiс, анзы уғаа поғдархастығ.

Олох ачыхта «Курск» суғ алтында чӱс чöрҷең кимеде 2000 чылда ӱреен Вячеслав Виссарионович Майнагашевке чарыдылған скульптура турғызылған. Ол киме чардығына тööй, тимiрдең идiлген, аның хабырғазында Вячеславтың сомы хызылған. Пайрамға ӱреен талайҷының туған-чағыннарын хығырғаннар. Олар хакас оол хайдағ полғаннаңар чыылған чонға чоохтап пиргеннер. Мероприятиеде пастыхтар, орындағы чуртағҷылар араласханнар.

Прай тоғыстарға 3 миллион салковай парыбысхан, ööн ахча Хакасияның национальнай паза территориальнай политика министерствозыни, iдöк аймах паза аал чöбi ахчазы хорадылған. Проект iкi чыл чуртасха кирiлген – пылтыр паза пӱӱл.

Олох кӱнде Пыдырахта аал чöбi туразы хыринда орныхчатхан Илбек Ада чааҷыларына чарыдылған хумартхы комплекс нааҷылалған соонаң азылған. Иргi хумартхы тас алыстырылған паза наа брусчатка салылған соонаң хумартхылас ачығына наа тыныс пирiлген.

Пайрамда Хакасияның национальнай паза территориальнай политика министрi Лев Сафьянов, Таштып аймаа пазы Николай Чебодаев, Пыдырах аал чöбi пазы Семён Боргояков, школа ӱгренҷiлерi, аал чуртағҷылары араласханнар. Пыдырах аалдағы Культура туразының устағҷызы Светлана Торокова хызыҷахтарнаң чаа темазына чарыдылған теелбек тимнеп салтырлар паза пасталығ класстар ӱгренҷiлерi Илбек Ада чаада чат халған ағаларының сомнарынаң сыхханнар.

Проекттi чуртасха кирерге хабасхан кiзiлернi министерство таныхтаан, ол санда Семён Боргояковты, аал чöбi тоғынҷылары Татьяна Челтыгмашеваны, Татьяна Токоякованы. «Чонға кирек иң артых проект» марығда чиңiс тутхан ӱчӱн республика бюджедiнең 1,3 миллион салковай пирiлген, аймах устағ-пастаанаң – 150 муң салковай паза аал чöбiнең – 100 муң салковай, iдöк идiнҷектер полысханнар.

Аал чöбi хыриндағы хумартхы комплекс азылчатханда, министр Лев Сафьянов, чуртағҷыларны нааҷыласнаң алғыстап, таныхтаан:

– Пӱӱнгi кӱнге мындағ осхас хумартхы 15-ҷi орынны асчабыс, ол тоғыстарнаң пiс Илбек Ада чааның, öнетiн чаа операциязының араласчыларын хумартхылапчабыс. Прай Хакасияҷа пӱӱл андағ 31 хумартхы орын пӱдiрiлген.

Пыдырахтағы аал чöбi туразынаң чол кизiре школа орныхча, мероприятие соонаң прайзы ӱгредiг организациязы хыринзар чыылысхан. Анда хумартхы чарды азылған. Ол öнетiн чаа операциязында чат халған Аймир Ахпашевке чарыдылған, Ол Пыдырахта тöреен-öскен, ӱгретчiлернiң сағызында ол амыр, кӱстiг, хыйғаҷах оолах чiли халған. Школа соонаң Олимп резервi училищезiнде ӱгренiзiн узаратхан, иң чахсы студенттер санына кiрҷең. Ағбан городта ол сöбiре тöстирге маңнанған, «Муниципальный жилищный фонд» öмеде тоғынчатхан, хынған ипчiзiнең, оолағас öскiрiп, ынағ чуртапчатханнар.

Мобилизация пасталыбысханда, ол öнетiн чаа операциязына хығыртылған... 2023 чылның орғах айының 1-ғы кӱнiнде ол, чаа чахығларын толдырып, матыр чiли чат халған. Аймирнiң туған-чағыннары, аал чуртағҷылары амға теере аны сағысха кирчелер, чобалчалар. Чарых омалығ, иптiг пыдырахтағыларның чиит чир-суғҷызы Аймир Александрович Ахпашев пу чарыхтаң 29 частығда парыбысхан.

Сомнар авторни

Сомда: 1) Индiркi Хурлығастағы Вячеслав Майнагашевке чарыдылған хумартхы;

2) Пыдырахтағы школадағы СВО араласчызы Аймир Ахпашевке хумартхы чарды