Чааҷы службазы. Республиканың чааҷы комиссариадында кӱскӱдегi хығыртығҷа призывниктернің пастағы командазын служба иртер орынзар пайрамни ӱдескеннер

Чыл сай пістің хазнада срочнай чааҷы службазына часхыда паза кӱскӱде хығыртығ кампаниялары иртче. Иртер тус алыспаан – iдӧк пір чыл. Призывниктернi, чааҷы комиссариадында чааҷы кип-азаана тонандырып, прай кирек ниме-ноо пиріп, войсколарзар ызарға тимнепчелер. Пӱӱл дее пастағы команданы служба иртер орынзар ызарға чахсы тимнеп салтырлар.

Чааҷы комиссариады алнында призывниктерні ӱдезерге оларның туған-чағыннары илееде чыылыс парғаннар. Анда хакас сӧбiренең чоох алысхабыс. Ол туста тимір хаалхалығ сиден озаринда призывниктернiң тренировка иртчеткені истілген. Пу чоохтасхан кізілер 19 частығ Игорь Сагалаковты чааҷы службазына ӱдезерге килгеннер. Танысчабыс.

Призывниктің пиҷезi Валерия Тинникова Ағбанда чуртапча. Амды ибде паланаң одырчам тіпче. Игорьның iҷезі Лариса Сагалакова Кiчiг Нонып аалда чуртапча, андағы садығ туразында садығҷы полып тоғынча. Iдӧк хости пасха даа туғаннары турғаннар. Призывник Игорьдаңар олар піди чоохтааннар: ол Пии аймаандағы Кічіг Нонып аалда тӧреен, ӧскен, анда пасталығ класстарда ӱгреніп, анаң Н.Ф.Катановтың адынаң Хакас национальнай гимназия-интернатта ӱгредиин узаратхан. Игорь, анда 9 классты тоозып, Ағбандағы коммунальнай хоных паза сервис техникумында тимір хабыстырҷаңа ӱгреніп алған.

Тузы читкенде, ағаа чааҷы службазына парарға повестка килген. Оол армияа парарға тимде, чааҷы службазын иртібізерге ол позы сағынған. Прай иреннер армияны иртерге киректер тіпче ол.

Тимір сиденнің ізии азылды, туған-чағыннарын призывниктерзер позытчалар. Андағы плацта олар ікі шеренгалығ стройда турғаннар. Подполковник Волков, строевой хаалағнаң пастырып, республиканың чааҷы комиссары Николай Видяйкинге рапортнаң искірче: «Призывниктернiң командазы войсколарзар ызыларға стройда турыбысхан!» Подполковник Николай Видяйкин, оларнаң изеннезiп, хысха алғыстас чооғын тутхан:

– Призывник арғыстар! Сiрер ам чааҷы службазына парчазар. Сiрерге улуғ аарластығ ӱлӱс тӱстi – пастағы командада войсколарзар парарға. Мин сiрерге Хакасиядаң парған чааҷы адын турыстыра апарарға алғапчам! Чааҷы службазын чахсы иртiп, пiр чыл пазынаң ибзер айланарзар. Войсколарда сiрернi чааҷы киреене ӱгрет саларлар, анаң пик хылыхтығ ирен полып килерзер. Ада чир-суубысты арачылирға тимде поларзар. Службаңар иптiг иртсiн, хазыхтарың пик ползын! Сiрернi ибде туған-чағыннарың сағыпчатханын ундубаңар.

Чааҷы комиссарының соонда чоох тутханнар Хакасияның iстенiс паза социальнай арачыланыс министрiнiң орынҷызы Наталья Волкова паза Ағбандағы епархияның протоиерейi Олег. Наталья Волкова Хакасия пазы Валентин Коноваловтың адынаң алғыстас сӧстерiн читiрген. Протоиерей Олег, iдӧк алғыстас сӧстерiн чоохтап, молитва хығырған, призывниктернi службаны чахсы иртерге кiрӧстеен.

Мыннаң пайрамнығ митинг тоозылған, призывниктернi туған-чағыннарынзар позытханнар. Пу командадағы призывниктер связист поларлар, анда 20 кiзi саналча. Олар Алтынзархы Осетиязар, Владикавказ город хыриндағы Спутник посёлокта орныхчатхан чааҷы частьынзар ызылчалар. Службаны чахсы иртiбiзер алғыстастарға хозылчабыс.

Сом Дмитрий Сунчугашевти

Сомда: Призывник Игорь Сагалаков ӱдесчеткен туғаннарынаң хада