Пос киреенеңер пастағы пілістер
25.10.2024
Хабарлар
«Бизнес по-взрослому» форум араласчылары
Форум. Чарыс айы республиканың 14 – 17 частығ ӱгренҷілеріне «Бизнес по-взрослому» чииттер форумынаң танығлығ полған
Хайди пос сағызын бизнеске айландырып аларға? Мына пу сурыға ӧӧн нандырығны паза пастағы пілістерні пирерге кӱстенгеннер Хакасиядағы «Минің пос киреем» кіннің специалисттері, «Бизнес по-взрослому» чииттер форумын иртіріп.
– Пірсінде хараазын минің сағыс тӧреен – чииттерге форум иртірібізерге. Ол сағыснаң мин хада тоғынчатхан арғыс-ӧӧрелерімнең ӱлескем. Салтарында «Бизнес по-взрослому» форум пӱт парған. Хазнада андағ форумнар иртче дее полар, че Хакасияда пу 14 – 17 частығ чииттерге кӧрілген пастағы форум, хайзы прай муниципалитеттернің школа паза ортын профессия ӱгредии учреждениелерінің ӱгренҷілерін піріктірче, – ӱлескен піснең «Минің пос киреем» кіндегі пос кирее хабазии кіннің устағҷызы Екатерина Эклер.
Ағбанзар тиксі республикадаң 130-ча ӱгренҷі килген. Олар Хакасия пазы Валентин Коноваловнаң тоғасханнар паза ағаа аймах сурығлар пиргеннер, ол санда аның устағҷы тоғызынаң палғалыстығ. Чоохтазығда ідӧк Хакасияның тиліс чыындызының устағҷызы Александр Мяхар паза Пос кирее хабазии кіннің устағҷызы Екатерина Эклер араласханнар. Иртен пастыхтарнаң чоох алысхан соонаң, пос сағызын чуртасха кирер оңдайларнаң танызарға тимде оол-хыстарға тренинг иртірілген. Оларнаң хада тоғынған Дмитрий Суханов. Обед соонаң, тізең, чииттерге иң хынығ чардых пасталған: ойын пастыра пілістерні тыыдары.
– Ойында прай араласчылар ікі ӧмее чарылғаннар. Пірдең, піс оларны муниципальнай пӱдістерҷе чарбаабыс. Кем хайда турған, іди изеріске турыбысхан, анаң пірсі оң саринзар парған, ікінҷі-ӱзінҷі араласчы – сол саринзар. Салтарында ікі ӧме тӧстел парған. Оларның алнында тӧӧй оңдайларда пір кӧстегҷе тоғынчатхан (бутербродтар сығарчатхан) компания тӧстеп аларға киректелген: ниме-ноо сағын таап, аны садарға паза инвестордаң ахча алып аларға, – ойын оңдайларын чарыт пирген Екатерина Эклер.
Полған на компания пӧліктер тӧстепче: сығарыс цеғын, садығ, маркетинг пӧліктерін. Ойында ідӧк садығ туразы пар, хайда сығарысха кирек ниме-ноо садылча. Аннаң пасха, тимде ниме-нооны иптеп салҷаң материаллар садылча. Ідӧк «Минің пос киреем» кін тоғынча, хайда компанияларның реклама хабазиинаң тузаланар оңдай пар: анда садығда чох иптеп салҷаң материал тикке пирілче.
«Компанияларда», тізең, тоғыс хайнапча: оол-хыстар, пӧліктерге чарылып, пӧгіннерін чуртасха кирерінҷе тоғынғаннар. Ікі стол кистінде бутерброд тимнепчеткеннері кӧрінче. Одырчыхтарны ибіре турғызып, паза пір ӧме тоғынча, сизінгенде, ол садығ пӧлии. Иртен таныс таа полбаан чииттер амды наа сағыстарын ӱзӱр парчалар.
– Пу улуғ нетворкинг, хайда олғаннар удур-тӧдір танызарға, чоох алызарға ӱгренчелер. Тиксі форумда аралазарға 300 азыра сурыныс пічии кірген, олар прайзы постарының город-аймахтарында араласханнар, че Ағбанзар 130 азыра ла кізі читкен, – чарыт пирген Екатерина Эклер.
Ойында «инвестор» полған спикер пос кирее пілістерінҷе менеджер Дмитрий Суханов. Дмитрий Анатольевич Хакасияда тоғыс чорығынаң полған. Ол Москвадаң пістің республиказар ӧнетін кил парған. Дмитрий Суханов «Чиит профессионаллар» чемпионаттың «Пос кирее» компетенциязынҷа тоғынча. Олох кӱн Хакасияда улуғ ӱгредіг ирткен: 38 регионнаң 75 эксперт ӱгренерге килген. Дмитрий Суханов ӱс ӱгретчінің пірсі полған. Пӧзік пілістіг эксперт олғаннарнаң хада посты ӱгренерге, пілістер аларға кӧӧктірерінҷе чоох апарған. Піліс аларға тартылғаны пос сағызын чуртасха кирерінде туза ағылча. Кізінің чахсы-хомай сарилары полған на киректе позының ізін, хозымын пирче.
– Аннаңар пӧзік чидіглерге чидер ӱчӱн, хайдағ даа кізі иң пастағызын нимее чидінерге хынчатханын пілерге кирек, – таныхтапча Дмитрий Анатольевич.– Пірдең, ол пір ле полбасха кирек, ікі, ӱс алай пис. Піс олғаннарнаң хада ідӧк сағысты чуртасха кирҷең оңдайларнаң танысхабыс. Ол пос киреенең дее, тоғыс ӧзізінең дее палғалыстығ ползын. Пасхазы чоғыл. Ол кізінің кӧңнінең палғалыстығ поларға кирек: мин ол кирекке хынчам, ағаа ӱгреніп аларға сағынчам, мин ниме паза хайди идерге пілчем паза пасхазы. Аны чуртасха кирерге ниме полысча? Пілістер, идерге пілчеткені, ахча, хазна хабазии. Ідӧк сағысты чуртасха кирерінде идінҷек оңдайынаң танысхабыс. Мин оларны искірігні табырах чыыпчатхан тирігнең таныстырғам. Ол пілче ол-пу кирекнең кем айғасчатханын, ол ниме-нооға пааны, наа сығарыстарны паза пасхазын, ол кӧстегҷе апарылчатхан страницаларны паза искіріглернің пирілчеткенін паза пасхазын.
Чоохтирға кирек, ойынның пӧгіні пу ікі ӧменің артыхтарын таап алары нимес. Ӧӧн сағыс – чииттерге пос сағызы полызиинаң парыстанып алар оңдай парын кӧзіт пирері. Ноға ол кирек? Хазнада пос киреен тӧстирге аймах-пасха хабазығлар кӧріл парғаннар, олар чииттерге пос киреен пастирынҷа пастағы хаалағны идерге полыс пирерлер. Форумда олар пос сағызынаң проект тимнирге ӱгренгеннер. Пу неделядаң, тізең, Хакасияда «Бизнес-Юниор» проект тоғынып пастапча, хайда олар ол сағыстарын чуртасха кирер хоза пілістерні аларлар. Проектте маңнаныстығ тоғынчатхан идінҷектер араласча, олар опыттарынаң, пілістерінең ӱлезерлер.
Екатерина Эклер пу форумны иртірерге полысхан муниципальнай пӱдістернің устағ-пастағларына алғызын читірче. Оларның полызиинаң республиканың город-аалларындағы оол-хыстарның пос сағыстарын чуртасха кирер оңдайларнаң танысчаң оңдай полған.
– Пу форумда араласхан олғаннарның сағыстары алыс парған, кӧрістері алғыдылған. Оларға уғаа хынығ пос сағызын бизнеске айландырарға, парыстанарға. Пӱӱнгі олғаннар тузазы чох кирекке тус хорадарға хынминчалар. Кем, тізең, Ағбанзар килерге чаратхан, олох Копьёвтаң, я, ағаа пу форум хынығ паза тузалығ полған сағынчам, – салтарлаан форум пастағҷызы.
Сом Хакасия пазының паза Хакасия правительствозының пресс-службазыни
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 29 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
