Кiчiг хырлас айының 4-ҷi кӱнiнде Асхыста ӧнетiн чаа операциязында чуртастарын пир салған чааҷыларға хумартхы тас азылған

Хумартхылас митингi гимннернең пасталған: Россияның, Хакасияның паза Асхыс аймааның. Асхыс аймааның пазы Абрек Челтыгмашев чыылысхан чонзар мындағ сӧстернең айланған: «Пiс пӱӱн ӧнетiн чаа операциязында чуртастарын пир салған матырларға хумартхы тас азарға чыылысхабыс. Пастағы «200 таарлағ» килгенде, минiң сағыс тӧреен, оларға хумартхы тас турғыс пирерге. Мағаа аны чуртасха кирерге чахсы полыс пиргеннер идiнҷектер Иван Миндибеков, Владимир Астанаев паза Сталбек Мишаков. Пiс хумартхы тасты «Шагнувшим в бессмертие» тiп адап салғабыс. Чуртастарын пир салған оолларға сӧстер табарға аар! Олар чииттер, туғаннары, хонғаннары халғаннар... Пiстiң республиканың чааҷылары – сын матырлар!»

Анаң Абрек Васильевич хумартхы тасты идерге полысхан кiзiлернi алғыстаан. Олар Вячеслав Симаткин, скульптор Василий Чертыков, атаман Сергей Никифоров, казактар Михаил Никифоров, Сергей Киряев, Алексей Казаков, Василий Никифоров. Казактарның атаманы Сергей Никифоров нандырығлығ чоохта мындағ сӧстер хосхан: «Пiс, ӱр дее сағынмин, хумартхы тасты пӱдiрерiнде полысхабыс. Минiң оолғым СВО-да араласча, туғаннарым андох».

Аның соонаң чоох тутхан Хакасияның пӱдiрiг министрiнiң тоғызын толдырчатхан Виталий Пестриков. Ол iдӧк теен, прай чаалазығларда араласхан кiзiлерге мындағ хумартхы тастар турғызарға кирек, оларның аттарын ундубасха.

Асхыстағы депутаттар чӧбiнiң кнезi Александр Челтыгмашев чыылысхан чонны паза Абрек Васильевичтi мындағ хумартхы тасты пӱдiрген ӱчӱн алғыстаан. Прай CВО араласчылары хазых айланзыннар тiп хосхан ол.

Асхыс, Таштып аймахтарынҷа паза Абаза городча чааҷы комиссары Евгений Чаптыков ӧнетiн чаа операциязында араласхан оолларға паза паба-iҷелерiне кӧп чылығ сӧс тапхан.

Iҷелер адынаң чоох тутхан Ирина Кулакова. Аның оолғы Владимир Кулаков позының чуртазын чаалазығда пир салған. Ол кӧп кiзiнi арачылап халған.

Прай чоох тутхан кiзiлер оолларның чиитке ӱреп парғанына ачырғанғаннар.

Чааҷыларны хумартхылап, пiр минута сым турары чарлалған. Ол туста полиция тоғынҷылары ӱс хати мылтыхтаң атханнар. Сымзырыхта атыстар хулах туныстығ кӱзӱрееннер. Пiреезi чочып таа парған. Пiр ипчi чоохтанчатхан: «Анда мыннаң даа хорғыстығ полча полбас па».

Митинг «Турналар» сарыннаң тоозылған. Чыылысхан чон хумартхы тас тӧзiнзер чахайахтар салған. Кӧп кiзiнiң харах частары кӧрiнчеткен. Олар иң чағыннарын чiдiр салғаннар. Халған кiзiлерге хазых чуртас паза СВО тоозылары кирек полчатпас па.

Сом Анатолий Ковригинни