Хазна Думазының депутады Николай Шульгинов ӧнетін чаа операциязының араласчыларына паза оларның сӧбірелеріне полысчатхан халых пірігіcтерінің устағҷыларынаң тоғазығлар иртірген. Тоғазығлар видео-конференция оңдайынаң ирткеннер.

«Жены Хакасии» ӧменің координаторы Ирина Мамонтова СВО араласчыларының ипчілері айланчатхан сурығларның аразында психологиянаң палғалыстығ сидіксініcтер парынаңар чоохтап пирген. Олар алнындағы хырығларда чааласчатхан туған-чағыннарның ӱчӱн сағыссыраснаң палғалыстығлар. Пӧзік ӱгредігліг психологтың полызиин, тізең, алып аларға оой нимес.

Николай Григорьевич Ирина Федоровнанаң чарасхан, ол кӧстег социальнай сурығларны пӧгерінең соона халбасха кирек. Чааҷыларның сӧбірелеріне паза ибзер айлан килген СВО араласчыларына андағ полызығ пирілерге кирек.

Пу сурыға профильліг министерстволар даа, халых пірігістері дее хайығ салчалар, мында прай кӱстеністерні піріктірері киректелчеткені таныхталған.

Тоғазығда ідӧк СВО араласчыларының сӧбірелері урунчатхан ибдегі сидіксіністер ӱзӱрілген,ол санда кӧп палалығ сӧбірелердегі олғаннарға наа чыл ӱлӱкӱннерінде тынанарын тимнирі.

«Золотые руки ангела» тиксі Россиядағы волонтер чӧрімінің Хакасиядағы координаторы Евгения Прусс волонтерларның тактическай аптечкаларны, тепловизорлардаң арачылапчатхан чорғаннар тігерінҷе тоғызанаңар паза тоғыстың пасха даа кӧстеглерінеңер чоохтап пирген. Ол ідӧк Хакасияда чааҷы госпитальын тӧстирге паза СВО араласчыларына имнег реабилитациязын пирҷең системаны тилідерге киректелчеткенін таныхтаан.

Паза пір сурығ – ӱгредіг заведениелерінде тактическай имнегҷе курстар иртіреріне кірексініс пары.

Андағ курстар хорғыс чох поларына паза экстремальнай оңдайларда чуртастарны ал халарына уғаа киректер, оларны иртірерге киректелчеткенінде ікінҷілес чоғыл тіп чарасхан Хазна Думазының депутады.

– Чааҷыларға паза оларның сӧбірелеріне хабазары – Хазна Думазы тоғызының ӧӧн кӧстеглерінің пірсі. Регионның паза федеральнай синде коллегаларнаң хада таныхтылған сурығларны пӧкчең оңдайларны тілирбіс, – тоғазығларның салтарын иткен Николай Шульгинов.

Сом Россияның Хазна Думазы депутады Н.Шульгиновтың полысчызыни