Тоғазығ. 6 кічіг хырласта Россия президентінің Cибирьдегі федеральнай округтағы полномочиеліг кізізі Анатолий Серышев регионнар аразындағы араға паза тамкы чырғалларын сыныхтаанҷа уcтаныс пастығы Светлана Романованаң тоғасты

Тоғазығда устаныстың араға паза тамкы ниме-ноо сығарызындағы паза айланызындағы тоғыс ӱзӱрілген, хайзы чуртағҷыларның хазиин арачылирына, кӧзіділген ниме-нооның хорғыс чох поларын тӧстиріне, Россия экономиказының алнын аларына кӧстелген. Араға чырғалының тӱзімніг тоғызын тӧстиріне, хайди даа толдырҷаң кирексініcтернің сайбағлар санының ӧзерге пирбезіне, араға паза тамкы ниме-ноозының закон хыйыстыра айланызын хызырарына кӧстелген чарадығлар тирең чарыдылғаннар.

– Чоныбыс хазиин хайраллиры – ол хазнаның ӧӧн пӧгіні, хайзына алынҷа хайығны айландырча Россия президенті Владимир Путин. Тиксі тоғыс полызиинаң пістің хазнада хазых чуртас апарары уламох чахсы сабланча – чуртағҷылар физическай культуранаң паза спортнаң айғасчалар, хомай нимелерге тартылчатханын хызырчалар. Ол чахсы алызығларны мыннаң мындар уламох тыыдып одырарға кирек, хада­пірге кӱс салып, – таныхтаан полпред.

Светлана Романованың искіриинең, пӱӱл 10 ай аразына устаныс 18 сыныхтағ иртірген, ол санда пічіктернің азынада кӧрілбеен 12 сыныхтағны паза алты чорыхтағы сыныхтағны. Салтарында сайбағларны чох идерінҷе тӧрт сизіндіріг пирілген, административнай право сайбағларынаңар 33 кирек азылған, закон хыйыстыра садыға сығарылған 140 муң азыра литр араға пылалған. Ведомство специалисттері право хайраллаҷаң органнар кізілерінең хада-пірге 21 сыныхтағ иртіргеннер, салтарында закон хыйыстыра садыға сығарылған 600 муң азыра литр араға табылған паза пылалған. 2023 чылда хада-пірге 14 сыныхтағ иртірілген.

Устаныс пастығының сӧстерінең, закон хыйыстыра садыға сығарылған арағаның ӧӧн чардығы, мының алындағы чіли, пиво паза пиволығ ісчең суғлар полған, олар, ЕГАИС-та санға алылбин, закон хоостыра сығарылғанын паза садылчатханын киречілепчеткен пічіктер чох, «Честный знак» маркировканы иртпин, садыға сығарылғаннар. Тиксі 10 ай аразына «Росспиртпром» АО закон хыйыстыра тимнелген 1,2 миллион литр арағаны хайраллирға паза чох идерге сығара тартхан. Полномочиеліг кізінің кӧрізінең, закон хыйыстыра садыға сығарылған арағаны, ілезіне сығарып, садығдаң суурчатса, ідӧк чуртағҷыларға андағ арағаны іскені хорғыстығ полчатханын, аны хайди ілезіне сығарарын паза андағ арағадаңар хайдар искірерін чарыдарға киректелче.

Ирткен чылда кічіг хырлас айынаң пасти Росалкогольтабакконтрольға ідӧк тамкының сығарызын паза айланызын сыныхтирынҷа тоғынары пирілген. Араға чырғалын сыныхтағда тударынҷа чыылған опыт наа кӧстегҷе тӱзімніг тоғынарға полысча. 2024 чылның ирткен тузына право хайраллаҷаң органнарнаң хада-пірге алты сыныхтағ иртірілген сылтаанда, закон хыйыстыра апарылған айланыстаң 88,6 муң пачка тамкы паза 3,1 муң упаковка никотинніг ниме-ноо садығдаң хыйа алылған. Мыннаң мындар хайраллирға паза чох идерге 19 муң азыра килограмм контрафакт тамкы паза никотинніг ниме-ноо пирілген.

Анатолий Серышев, араға паза тамкы чырғалын закон хоостыра тоғындырар ӱчӱн, ведомстволарның хада-пірге тоғызының тузазын таныхтаан. Росалкогольтабакконтроль устаныстарының, право хайраллаҷаң паза сыныхтағ органнарының чӧптіг пірге тоғызы сыныхтағның тӱзімін кӧдірерге, садығ кирексіністерiне килісчеткен ниме-нооны сығарарға паза сыныхтағдағы акцизтіг ниме-нооның закон хыйыстыра садиинаң бюджет ӱреглерін хызырарға полызар.

Сом авторни