Россия президентiнiң Сибирьдегi федеральнай округтағы полномочиеліг кiзiзi Анатолий Серышевтiң чахиинаң аның орынҷызы Александр Орехов Хызылчарда кiчiг хырлас айының 6-7 кӱннерiнде ирткен ХV Сибирьдегi муниципальнай форумның тоғызының iкiнҷi кӱнiнде араласхан. Полномочиеліг кiзiнiң орынҷызы мероприятие араласчыларына Анатолий Серышевтiң алғыстас сӧстерiн читiрген. Анатолий Анатольевич чыл сай иртчеткен форумның регионның наука чуртазында уғаа танығлығ кирек полчатханын паза аның орындағы пос устаныс органнарының тилiзiне хабасчатханын таныхтаан.

– Тоғынып пастаанаң форум регионнар аразындағы хайызығларны тилiдер ачых пол парған. Россия субъекттерiнiң учёнайлары паза практиканаң айғасчатханнар мында ағырсымнығ сурығларны ӱзӱрчелер, муниципальнай устаныстың сидiксiнiстерiн пӧгер оңдайлар тiлепчелер, – чоохтанған ол. ХV Сибирьдегi муниципальнай форумда муниципалитеттерге право полызиин паза чарғы арачыланызын пирерi ӱзӱрiлген. Iкi кӱн аразына орындағы пос устаныс органнарының правозын хайраллирынаң, оларның чарғынаң палғалыстығ сидiксiнiстерiн пӧгер оңдайларнаң паза муниципальнай кадрларның правонаң палғалыстығ пiлiстерiн кӧдiрерiнең палғалыстығ сурығлар кӧдiрiлген.

– Орындағы пос устаныс органнарының, пӧзiк салтарлар ағылып, тӱзiмнiг тоғынғаны, чуртағҷыларыбыстың праволарын чуртасха киргенi паза кiзiлернiң чуртас синiн чахсыландырғаны прайзыбысха туза ағылар, – таныхтаан Александр Орехов.

Форумның тоғызында Россияның 5 федеральнай округынаң 25 регион араласхан. Аның ачыхтарының тоғызынаң устаан паза чоох тутхан кiзiлер санына муниципальнай устаныс киреендегi эксперттер, пӧзiк ӱгредiг заведениелерінiң тоғынҷылары, регионнардағы ӱлгӱ органнарының паза орындағы пос устаныс органнарының кiзiлерi кирiлгеннер. Хакасиядаң форумда республиканың национальнай паза территориальнай политика министрiнiң пастағы орынҷызы Виталий Кунучаков, министрнiң орынҷызы Марина Сорокина, министерствоның организационно-правовой тоғыс паза хазна хабазығларын чуртасха кирер пӧлиинiң устағҷызы Екатерина Бушкина, Шира аймаандағы Тойым аал чӧбiнiң пазы Евгений Кулешов араласханнар.