Орыс алыбын сағысха киріп
13.11.2024
Хабарлар
Хакасияның физическай культура паза спорт министрі Сергей Кочан чоох тутча
Спорт. 7 кічіг хырласта спортсменнер паза ветераннар саблығ кӱресчі Иван Ярыгиннің хумартхы тазынзар чахайахтар салғаннар
Тилекейге саблығ кӱресчі Иван Ярыгиннің ады Хакасиянаң пик палғалыс парған. Мында ол олаңай кӱреснең танысхан нооза. Кӱресчінің адын ал чӧрчеткен турнир дее 1990 чылда Хакас чирінде тӧстелген. Марығның пастағҷызы – CCCР-ның cаблығ тренері Владимир Чарков. Владимир Ильичтің холында ікі хати Олимп чемпионы Иван Ярыгин харбазарға пастаан. Итсе, Ағбанда арға-мӧрій пір ле хати ирттір. 1991 чылда аны Хызылчарзар кӧзіргеннер. Амғы туста Ярыгин турнирі олаңай кӱресче иң танығлығ марығлар санына кірче.
Пір сӧснең, Хакасияда Иван Ярыгин пос кізізіне саналча. Аннаңар спортсменнің харындазы Александр Ағбанда кӱресчее хумартхы тасты турғызар пастағнаң сыхханда, ӱлгӱдегілер ағаа удур парғаннар. Хумартхы тас 22 орғахта 2013 чылда пайрамни азылған. Мероприятиеде ол туста Хакасия пазы полған Виктор Зимин, спорт министрі Валерий Денщиков, СССР-ның саблығ тренері Дмитрий Миндиашвили, ӱс хати Олимп чемпионы Бувайсар Сайтиев паза пасхазы араласханнар. Андадох хумартхы тас хыринда улуғ марығларда чиңіс тутхан спортсменнерні чеестирге чоохтас салғаннар. Че наа кибір чуртасха кирілбин парған. Сыйыхтасты пір хати иртірерге маңнанғаннар, таң.
Пӱӱл Хакасияның физическай культура паза спорт министерствозының кӱстенізінең 7 кічіг хырласта, Иван Ярыгиннің тӧреен кӱнінде, аның хумартхы тазынзар чахайахтар салылғаннар. Чӧрімнің ӧӧн пӧгіннері – саблығ кӱресчінің адын хумартхылиры, чииттерні совет спортсменінің чидіглерінең таныстырары. Мероприятиеде тренерлер, спорт ветераннары, Олимп резерві училищезінің (техникумының) студенттері араласханнар. Чыылған чонны пастап Иван Сергеевичтің чуртас чолынаң хысхаҷахти таныстырғаннар. Анаң сӧc пирілген спорт министрі Сергей Кочанға. Хайди таныхтаан Сергей Владимирович, Хакасияда Иван Ярыгин осхас паза спортсмен чоғыл. Пістің республикада улуғ хырласта аның пастағы тренері Владимир Чарковтың хумартхызына чарыдылған турнир иртче. Ол чиит кӱресчілерге кӧрілген. Спорт министерствозы пу марығны пазағы чылларда кічіг хырласта иртірерге пӧгінче. Арға-мӧрійге чыылған улус Иван Ярыгиннің хумартхы тазынзар чахайахтар салар чӧрімде аралас турар.
Сынны чоохтаза, кізілер Чарков турнирі ноға улуғ хырласта иртчеткенін чахсы оңар полбинчалар. Владимир Ильич 13 хосхарда 1937 чылда тӧреен. Марығ кічіг хырластың пастағы кӱннерінде полза, спортсменнер хакас тренерні паза аның саблығ ӱгренҷізін хумартхылирҷыхтар.
Мероприятие тузында ідӧк чоох тутханнар бобслеист, ікі Олимп ойынының араласчызы Пётр Макарчук, Республиканың аймах оңдайлығ харбазығлар школазының директор тоғызын толдырчатхан Сергей Смирнов паза пасхазы. Олар Иван Ярыгин олаңай кӱресте тирең іс артысхан, СССР-ның піріктірілген командазының ӧӧн тренері полып, чииттерге улуғ спортсар чол асхан тіп таныхтааннар.
Чоохтирға кирек, хакастардаң Олимп пьедесталына Сергей Карамчаков ла сыххан. Чир-суғҷыбыстың чидиинде Иван Ярыгиннің хозымы парох. 1988 чылда Олимпиадаа таллағ СССР-ның чемпионады тузында парған. Сеулзар пос кӧдірімiнде чиңіс тутханнар парарға кирек полғаннар. 1988 чылда, тізең, 48 кг кӧдірімде Гнел Меджлумянға оң полған. Сергей Карамчаковтың кӱмӱс медаль.
Хазыр ӱзӱріглер соонда тренерлер ӧмезі Олимпиадада чир-суғҷыбысты араластырарға чаратхан. Анзына ікі сылтағ полған. Специалисттернің таниинаң, Меджлумяннаң Карамчаков тиңни харбасчалар. Кӧзідімге, 1987 чылда СССР-ның чемпионадында хакас оол чиңіс тутхан, Меджлумян ікінҷізі полған. Ідӧк ӱзӱріг тузында Францияда ирткен чоннар аразындағы чемпионатты сағысха киргеннер. 1987 чылда 48 кг кӧдірімде сыйыхтығ орыннарға азиаттар ла сыхханнар. Сергей Карамчаков андада хола медаль утхан. Тренерлер ізенгеннер, Cеулда азиаттарнаң харбазарға киліссе, хакас спортсмен оларға маң пирбес.
Пістің оолның алнын Иван Ярыгин матап алтыр. Ол туста Иван Сергеевич олаңай кӱресче СССР-ның піріктірілген командазының ӧӧн тренері полған. Хомзынысха, ікізі дее час чазабаан. Хакас кӱресчі 31 чазын апарчадып ах чарыхтаң парыбысхан, Ярыгин 1997 чылда саайға кіріп ӱреен. Оларның аттары ундудылбас. 7 кічіг хырласта орыс алыптың хумартхы тазынзар хызыл гвоздикалар салылғаннар. Пуох айның халғанҷы кӱнінде, тізең, Олимп ойыннарының хола призеры Сергей Карамчаковтың хумартхызына чарыдылған турнир иртер.
Сом Валерия Тамбовцевани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
