Олғаннарны спортха иртеезiн кӧнiктiрерге
13.11.2024
Хабарлар
Саблығ кӱресчі Наталья Малышева «Дашенька» олған садының иркеҷектерінең хада
Чапсых тоғазығ. Кубок-медальларны утып алар ӱчӱн, тренировкаа удаа чӧрерге паза марығларда аралазарға кирек тiп чоохтаан Ағбан городтағы «Дашенька» олған садының палаларына олаңай кӱресче Россия чемпионаттарының чиңісчізі паза призеры, чоннар аразындағы класстығ Россияның спорт узы Наталья Малышева
Пу наада «Дашенька» олған садының «Непоседы» группазының иркеҷектерiнiң физкультура занятиезi олаңай нимес ирткен. Аны иртiрерге саблығ спортсмен Наталья Малышева килген!
Олған садының спортзалынзар парар алнында аалҷынаң чахсы танызып аларға кирек. Аннаңар оолах-хызыҷахтар пурнада актовай залзар чыылысханнар. Хай син пӧзiк устығ спортсмен оларзар килгенiн олар Наталья Юрьевнаның кубок-медальларын кӧрiп, сизiн салғаннар. Наталья Малышева улуғ нимес стол ӱстӱнзер алтын кубок-медальларын кӧзiдiге сығарғанда, палаҷахтар, ачын аңыҷахтар чiли, оларны хапхлап алғаннар, «сыйых» кемге читпеен, анзыларының кӧңнiлерi тӱс парған. Палалар, сыйыхтарны алғлап, оларны ээзiне айландырарға даа хынмин сыхханнар.
– Аарлығ, олғаннар! Сiрер аймах кружок-секцияларға чӧрерге пастабысты поларзар. Арса, марығларда даа араласхазар. Мындағ кубок-медальларны утарларың килчетсе, кӧп тимненерге, тренировкаларны иртiрбеске, тренернiң чооғын истерге кирек.
Cпорт кiзее кӧп оңдай асча. Олаңай кӱреснең айғасчатхан ӱчӱн, мағаа тилекейнiң аймах хазналарында, Россияның прай даа регионнарында пол пар килерге оң полған. Сiрер андар самолеттығ алай поездтiг чидерзер, – чарытхан спорт узы.
Соонаң тоғазығның иң хынығ чардығы пасталыбысхан. Наталья Малышева спортзалда олғаннарға улуғ нимес микелер кӧзiткен. Че пастап спортсменнiң устаанынаң оолах-хызыҷахтар ит-сӧӧктерiн матап нымзатчатханнар.
Микелер иртiрчеткенде, тiзең, олғаннарның улуғ теес пол парған, олар iтклес сыхханнар, малхадыбысханнар табылғаннарох.
Хайди тоғазығ соонаң теен спорт узы, тренер Наталья Малышева, олғаннарны спортха 6 – 7 частығдаң кӧнiктiрiп пастааны – иң чахсы. Оларға спорт пастап ойын чiли пiлдiрче, тренировкалар даа ойын оңдайынҷа иртче. Че соонаң олар ағаа пасхаҷыл хай сыхчалар. Секцияа 1-2 чыл чӧрген соонаң марығларда аралазып пастапчалар. Итсе-де, пала кӱстензе, паба-iҷе хабасса, чидiглер аннаң даа ирте поларға айабастар.
Наталья Малышева, олғаннарнаң айғазарынаң пасха, марығларда аралазарын тохтатпинча. Пу чағында Иван Ярыгиннiң хумартхызына чарыдылған чоннар аразындағы турнирге тимненче. Ол Хызылчарда иртер.
«Дашенька» олған садының «Непоседы» группазының воспитательi Сарима Тюренева палаларға мындағ тоғазығлар сыбыра иртiрче. Спортсменнең тоғазығ алнында анда республиканың чайаачылары аалҷы полғаннар. Хайди чоохтапча Сарима Романовна, амғы чахығлар хоостыра олғаннарны аймах кӧстеглерҷе пiлiстерiн алғыдарға кирек, ол санда культураа, спортха кӧнiктiрерге.
Сом авторни
Автор :
Оксана Котюбеева
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
