Чара чачырастар тузындағы чайаачы тоғыс
15.11.2024
Хабарлар
«Под звуки канонады» ойынның «Балеринка» чардығы
Культура. Хакасияда «Тепло родного дома» федеральнай проект хоостыра аймах культура мероприятиелері ирткеннер
Ол мероприятиелер кічіг хырлас айының 12 – 14 кӱннерінде В.Г.Чаптыковтың адынаң Хакас филармониязында, М.Ю.Лермонтовтың адынаң орыс драма театрында паза креатив индустриялары школазында полғаннар. Оларны Россияның культура министерствозы пастаанаң кӧг театрларының ассоциациязы иртірген.
Проектте олғаннарны чир-сууна хынарға ӱгретчеткен педагогтар, студенттер, ідӧк чииттернің халых пірігістерінің оол-хыстары паза культура учреждениелерінің тоғынҷылары араласханнар.
Чоохтирға кирек, пу проект хоостыра «Ӱлгер» фольклор ӧмезі паза «Кӱн сузы» хакас теелбек ӧмезі ӱр ниместе Дагестан чирінде пол килгеннер. Анда олар «Кӧчег» ойынны кӧзіткеннер.
«Тепло родного дома» федеральнай проект пӱӱл чарыс айының 14 кӱнінде Калмык Республикада пасталған. 2024 чыл тоозылғанҷа пу проекттің мероприятиелері прай сигіс регионда ирт парарға киректер. Полған на регионда ӱс кӱн аразына кӧрігҷілерге темалар хоостыра ойыннар турғызыларлар, анаң театроведтернең хада оларны ӱзӱрерлер.
Проекттің халғанҷы кӱнінде креатив индустриялары школазында лекциялар хығырғаннар Хакасияның культура министрі Светлана Окольникова, Москвадағы ГИТИС доценті, Россия культуразының саблығ тоғынҷызы Юлия Большакова паза ГИТИС доценті, искусствоведение кандидады Екатерина Морозова.
Че аның алнында Ағбанда М.Ю.Лермонтовтың адынаң орыс драма театрының улуғ залында Донецктегі академическай кӧклӧ театры «Под звуки канонады» патриотическай концерт-спектакль кӧзіткен. Ойын пасталар алнында театрның директоры паза хоос устағҷызы, ДНР искусствозының саблығ деятельі Ольга Арутинова Донецктеңер паза театрның чуртазынаңар хабарҷыларға чоохтап пирген.
Піс прайзыбыс пілчебіс, хайди украин националисттері 2014 чылдаң сығара Донбасстағы аал-городтарны аймах снарядтарнаң чаалап турғаннар. Ол тустаң сығара он чылҷа ирт парған, че анда чаа ам даа тохтабаан. Чаа пастал сыхханда, Донецктегі иреннернің кӧбізі чир-суун арачылирға парған. Оларның санында театрларның тоғынҷылары. Прайзы ла нандыра айланмаан.
Сағам Донецкте амыр арах полыбысхан. Чаалазығлар городтаң ырабысхан. Аннаңар снарядтар чит полбинчалар. Пастағы тустарда кӧклӧ театрына истіг тоғынар оңдайлар чох полған. Аннаңар артисттер Россия городтарынҷа гастрольларнаң удаа полҷаңнар. Амды театр городта тоғынча. Пірее кинен пол парбас ӱчӱн, театрзар 150-ҷе ле кізіні кирчелер. Пір орында кӧп кізі полбасха кирек. Пір кӱнде ікілер ойын турғысчалар – олғаннарға паза улуғларға. Пірее туста кізілерге ойынны тикке кӧзітчелер. Кізілернің ахчалары чох полҷаң нооза. Россияҷа чӧрзе, ойын ӱчӱн чыып алған ахчаны СВО чааҷыларына ызыбысчалар.
Ағбан городсар пу театрның 14 артизі килген. Чоохтирға кирек, Донецктегі театр пылтыр Хакасиядағы «Чир Чайаан» фестивальда араласханох. Хакасия прайзының кӧңніне кірген. Аннаңар пеер пӱӱл хынып килгеннер. Олар «Под звуки канонады» концерт-спектакльны ағылғаннар. Анда Донбасстың амғы чуртазынаңар, городтың махачы чуртағҷыларынаңар паза снарядтарға ӧдірткен олғаннардаңар кӧзіділче. Артисттер кӧклӧлерні ойнатчалар, кибелістер хығырчалар паза сарыннар сарнапчалар.
Ойын пасталар алнында Хакасия пазы Валентин Коновалов, сценаа сығып, чыылысхан чонны театрзар килген ӱчӱн алғыстаан. Донецктегі кӧклӧ театрының артисттеріне Донбасс чирінде амыр хоных паза кӧп чайаачы тоғыстар ползын тіп алғаан.
Сом Илона Каковани
Автор :
Илья Топоев
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
