500 муң салковайға ниме-ноо садыл парған
20.11.2024
Хабарлар
Полызығлығ аукционның араласчылары
Хабазығ. «Ағбан» гостиницаның конференц-залында ӧнетін чаа операциязында араласчатхан чааҷылар хабазиина аукцион ирткен
Ол Хакасияның министерстволары, спонсорлар паза полызар кӧңніліг кізілер хабазиинаң иртірілген.
Аукционда пістің республика чуртағҷыларының 32 чайаачы тоғызы садылған. Оларның полғаны ла пос алынҷа оңдайлығ тоғыс, хайзын чайаачы оңдайлығ кізілер тикке пирібіскеннер. Хай пірее чайаачы тоғыстарны олғаннар чайааннар.
Хакасия пазы Валентин Коновалов аукционны асхан:
– Аукционға сығарылған полған на лот – ол фронтта пістің чир-суғҷыларыбысха кирек ниме-ноо паза оборудование пирері. Ол фронтха хабазығ, хайзы чиңісті чағыннадар паза Хакасиядағы чааҷыларға иблерінзер, туған-чағыннарынзар табырах айланарға полызар.
Иң пастағы нимелер 5 муң салковайдаң пасти садылғаннар. Пиидегі олған искусствозы школазының ӱгренҷілері тимнеен ӱс хоосха ойнаҷахтар пір саңай садылғаннар. Оларны алар кізі илееде полған. Ойнаҷахтарның пастағы паазы пис муң салковай полған, анаң 20 муң салковайға теере ӧс парған. Пу ӱс хоосха пір минутаа садыл парған. Хозан ойнаҷах 7 муң салковайға садыл парған. Евгения Медведкина чайаан хар кізілер ойнаҷахтарны 17 муң салковайға алып алғаннар, ала парыс-джентльмен ойнаҷахты – 38 муң салковайға. Аукционда садылған ойнаҷахтарны чон уғаа чапчаң садызып алған.
Анаң хоостар садылғаннар. Іди хызыҷах Виктория Марткачакованың нинҷе-де хоозы садыға сығарылған.
Аукционда ідӧк Татьяна Сутылинаның, Лариса Баканованың, Валентина Имайкинаның хоостары, Николай Зотовтың хузух ағазынаң чайаан паннолары 15 муң салковайдаң сығара садылғаннар.
Аукционда прай нимелер тиксі 501 муң салковайға садыл парғаннар. Андар килген чон ідӧк «ОПОРА» республика фондынзар ахча пирген. Пу фонд ӧнетін чаа операциязы иртчеткен орынзар полызығлығ таарлағларны апарарынаң айғасча. Пу ахча ӧнетін чаа операциязы араласчыларына кирек ниме-ноо паза техника аларына хорадылар.
Cомнар Дмитрий Сунчугашевти
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
