Полған на секунда ӱчӱн харбазығ парған
20.11.2024
Хабарлар
Иван Горбунов чиңізіне ӧрінче
Спорт. Тӧӧ пазы посёлокта саналығ чарысча Хакасияның кубогы ирткен. Спортсменнер спринтті конёк оңдайынаң чӱгӱргеннер
Тӧӧ пазы – улуғ нимес посёлок. Че чыл сай кічіг хырласта ол Россияның саналығ чарыc кініне айлан парча. Анда Россияның піріктірілген командазынзар кірчеткен спортсменнер пас меетке сыхчалар нооза. Ол санда Олимп ойыннарының чемпионнары паза призерлары. Хакасияның физическай культура паза спорт министерствозының таниинаң, амғы туста Тӧӧ пазында Россияның 36 регионының чӱгӱрікчілері спорт тимненізін иртчелер. Ідӧк оларға Белоруссияның спортсменнері хозылғаннар. Тиксі алза, пір муң кізі.
Пӱӱл пастағы марығлар 18 кічіг хырласта ирткеннер. Чӱгӱрікчілер спринтте кӱстерін сынааннар. Абахайлар 1,6 километр тобырғаннар, ир кізілер – 1,7 километр. Пічіктер хоостыра чарыста 300 кізі араластыр, 179 ирен паза 121 ипчі. Анзы пылтырғызынаң кӧп. 2023 чылда пас меетке 281 спортсмен сыххан. Ол син кізінің аразында таллағ иртібізерге оой полбаан тіп ікінҷілес чоғыл. Марығ оңдайларынҷа азах мееттің тӧртінҷі чардығына 30-ар спортсмен сыхча, чарым финалға – 12-ер кізі, азах меетке – 6-ар чӱгӱрікчі.
Марығласчатхан улустың аразында олимпиецтер чох полған. Хакасиязар Александр Большунов, Алексей Червоткин, Денис Спицов, Татьяна Сорина, Иван Якимушкин, Александр Терентьев 17 кічіг хырласта ла учух килгеннер. Итсе, чарыстар олар даа чох хазыр ирткеннер. Спортсменнер пас меетке сығарға маңнанминчалар, тӱрчедең оларны финиште удурлапчазың. Позым прай чӱреемнең Арина Кусургашеваның ӱчӱн «ағырғам». 22 частығ хыс Тағлығ Алтайдаң. Ол узун дистанциялар чӱгӱрерге кӱс. Че Хакасияның кубогында Арина финалның тӧртінҷі чардығына ирт полған. Абахай спортсмен, сағыстарынаң ӱлезіп, чоохтаан:
– Он километрдең пасти прай дистанциялар мини. Спринттерні чахсы чӱгӱр полбинчам. Пӱӱн пастағызын на азах мееттің тӧртінҷі чардығына сығып алдым. Ол мағаа улуғ чидіг. Саналығ чарыснаң толдыра кӱзімнең 2019 чылда ла айғазарға пастаам. Тренерім Юрий Петрович Гуляевке улуғ алғыс. Аның холында узымны таптап, 2022 чылда Россия первенствозында хола медаль утхам. Дистанцияның узуны 15 километр полған. Ідӧк Россия чемпионадында, 50 километрні тобырып, пизінҷі орынға сыххам. Мин конёк оңдайынаң чахсы чӱгӱрчем, лыжероллерліг – классика оңдайынаң. Пылтырғы сезонда позымны турыстыра кӧзіт полбаам. Салтарларым уйан арах полған. Санапчам, мағаа чахсы оңдайлар тӧстелген. Минің 20 пара сана пар, Тағлығ Алтайда тренировкалар Семинскай аспахта иртчелер. Андар Горно-Алтайсктаң ікі час аразына чидіп аларға чарир. Орындағы вузта 4-ҷі курста ӱгренчем. Тренерімнең хада пілізіп тоғынчабыс. Посха ла кӱстенерге кирек.
Арина Кусургашеваның пабазы шор полтыр, іҷезі алтай чонның хызы, ууҷазы, тізең, хакас. Арина кічіг полғанда, паба-іҷезі кӧп кӧс чӧрген, аннаңар ол алтай даа, шор даа тілін пілбинче. Тағлығ Алтайда спортсмен 2011 чылдаң чуртапча. Пос туста хығырарға хынчаттыр. Сизінгенде, Аринаның істі-тасты пір, ол кӧні чоохтығ кізі.
Спринтсер айланза, пӱӱл Хакасияның кубогында Екатерина Смирнова чиңіс тутхан. Катя, Арина Кусургашева чіли, узун дистанцияларда узын сынапча. Ол 1,6 километрні 3:40.79 тусха чӱгӱрібіскен. Анзы уғаа чахсы. Кӧзідімге, пылтыр Алёна Баранова прайзын ас парыбысхан. Аның тузы 4:13.88 полған. Евгения Крупицкая азах меетке ікінҷізі читкен, Наталья Крамаренко – ӱзінҷізі.
Ир кізілернің аразында финалға кӱстіг спортсменнер сыхханнар: Иван Безматерных, Денис Филимонов, Владислав Афанасьев, Егор Митрошин, Иван Горбунов, Дмитрий Пузанов. Пылтыр спринтте чиңіc тутхан Олимп ойыннарының хола призеры Александр Терентьев, Безматерных кӱмӱс медаль утхан, Горбунов – хола медаль. Пӱӱл кирек хайди парыбызар ни?
Спортсменнер азах меетке чағдап сыххандох, стадионға толдыра хысхырыстар чайылғаннар: «Табырах! Чит парир!» Иреннернің кӧңнілері кӧдіріл килген, уламох табырах чӱгӱр сыхханнар. Хазыр харбазығда Иван Горбунов утхан. Аның тузы – 3:07.79. Денис Филимоновтың кӱмӱc медаль, ол 1,7 километрні 3:08.10 минутаа чӱгӱрібіскен. Ӱзінҷі орынға сыххан Егор Митрошин. Чиңісчі Иван Горбунов Хызылчар крайынаң полтыр. Чиит кізі 2023 чылдаң Татарстан ӱчӱн турысча. Ол хабарҷыларға чоохтаан:
– Чарыс оой нимес иртті. Чиңіске прай чӱреемнең ӧрінчем. Мағаа полған на медаль аарлығ. Россияда cаналығ чӱгӱрісте кӱстіг спортсменнер кӧп. Син полған на орын ӱчӱн харбасчазың.
23 – 26 ноябрьда Тӧӧ пазында саналығ чӱгӱрісче Россия кубогының І чардығы иртер. Спорт министрі Сергей Кочан чуртағҷыларны марыға хығырған. Сергей Владимирович теен:
– Кибір хоостыра Хакасия Россия кубогының пастағы чарыстарын удурлапча. Анда иң кӱстіг спортсменнер аралазарлар. Прайзын марығлар кӧріп аларға хығырчам. Хакасия кубогынаңар чоохтаза, пістің Константин Атрощенко спринтте 54-ҷі орынға сығып алды. Пӱӱнгі кӱнде ол чидіг. Пылтыр пістің cпортсменнер пуох чарыста 69-ҷы орыннаң пӧзік кӧдіріл полбааннар.
Cом Валерия Тамбовцевани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
