Кізінің иң аарлығ ис-пайы
20.11.2024
Хабарлар
«Сӧбіре чылында – сӧбіре сомы». Пу сомны Тросин ӱлӱкӱн (Потхы кӱні) тіп адапчабыс. Пу ӱлӱкӱн хас-хаҷаннаң пеер кибірге кір парған
Илимор родының тӧлі Чахсы-Хоных аалда Тросин ӱлӱкӱнге чыылысча. Иң кічіг харындастары Сергей позының сӧбірезінең Илимор ағазының туразында чуртапча. Ол тураа пӱӱнгі кӱнде, ууҷабыстың чооғынаң, 200 чӱс чыл артиинаң. Иң улуғ ууҷабыс Таисия Самсоновнаа пӱӱл 86 час тол парды. Саблығ тахпахчаа саналча. Е.П.Тыгдымаеваның туңмазы полча. Айтыс марығларында чиңістіг орыннар алча. Таисия Самсоновна паза Василий Романович 1958 чылда хоных тӧстееннер. Пис оол паза ікі хыс чон аразына кир салғаннар. Василий Романович 1981 чылда пу ах чарыхтаң чабал ағырығдаң сын чирзер парыбысхан. Иң улуғ хыстары Наталья «Чон узы», тахпахчы, «Хағба» ансамбльның тӧстегҷізі полча. Натальяның палалары ідӧк музыканаң айғасчалар. Иң улуғ оолғы Тимур «Кӱн сузы» ӧменің араласчызы полча.
Эдуард чуртас чолын милиция профессиязына чарытхан. Пабазы чіли иртӧк пу ах чарыхтаң парыбысхан. Чукотка саринда чуртаан, андох сӧбіре тӧстеен. Капиталина хонғанынаң ікі хыс паза оол чон аразына кир салғаннар. Леонид аалда чуртапча, Раиса хонғанынаң хада ікі оол паза ікі хыс ӧскір парчалар. Виссарион ідӧк Чахсы-Хоных аалда Фатима ипчізінең чуртапча. Оларның ікі оол паза пір хыс. Ариана паза Рустам, имҷілер профессиязын алып, Ағбанда іcтенчелер. Удаа телевидение пастыра кӧрчебіс.
Владимир Ӱс чул аалда чуртаан. Иринанаң хада ікі оол паза ікі хыс ӧскір салғаннар. Прайзына пӧзік ӱгредіг пиргеннер. Гульнара аалда чуртапча, ікі хыс паза ікі оол ӧскір парча. Иван оолғы СВО-да араласча, мобилизацияа хабылып, парыбысхан.
Сергей Чахсы-Хоных аалда Алиса хонғанынаң хада ікі хыс паза пір оол ӧскірчелер. Илимор ағабыстың туразын иптіг тут парчалар. Пӱӱл Асхыс аймааның 100 чыллығ пайрамында Сӧбіре мариинда 1-ғы орын алғаннар, анаң республика синіндегі Ӱртӱн тойында Асхыс аймаанаң Боргояковтар родын «Пик сӧбіре – кӱстіг чон» марығда кӧзіткеннер, 3-ҷі орын алғаннар. Сергей паза Алиса аймах сӧбіре марығларында араласчалар. 1995 чылда хоных тӧстееннер. Улуғ хыстары Алина Чахсы-Хоных аалда клуб устағҷызы полча. Ортын хыстары Элеонора Асхыста медсестра полып тоғынча. Кічіг ооллары Тагир сигізінҷі класста ӱгренче. Тагир аттарнаң кічігдең cығара айғасча. Ол, Асхыс аймаанда аттар чарыстарында аралазып, пастағы орыннар ал турча. Сергейнің сӧбірезі пасхазына кӧзідім полча.
Прай кӧзідіглерні санға алза, пу кӱнде Таисияның паза Василийнің сӧбірезі улуғ тархыннығ сӧбірее саналча. Парха-кӧргенектері 50-е чит парды. Уғаа поғдархапчабыс.
Автор :
Алиса Боргоякова, Ӱс чул аал
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
