Хакасияда андағ предприятие паза чоғыл
20.11.2024
Хабарлар
«Таштыптағы АТП» предприятиенің устағҷызы Андрей Куюков
Пӱӱн – транспорт тоғынҷызы кӱні. 20 кічіг хырласта пістің хазнада Транспорт тоғынҷызы кӱні таныхталча. Піс «Таштыптағы АТП» муниципальнай хазна предприятие устағҷызынаң тоғазып алғабыс
Андрей Куюков автотранспорт предприятиезінең хосхар айынаң сығара устапча. Алында ол Норильск городта 10 чыл харатас чығҷаң складтың узы полып тоғын салған. Анаң, тӧреен чирінзер айланғанда, Таштыптағы автошколада инструктор полған паза ӱр нимес тус аймах устағ-пастаанда экономика пӧлиинің специализі полып істенген. Андрей Валерьевич пӧзік экономическай ӱгредігліг.
– Андрей Валерьевич, Сірер устапчатхан предприятиедеңер чоохтап пиріңер. Хакасияда андағ предприятие Таштып аймаанда ла халған тізе, орта полар ба?
– Я, пістің предприятие муниципальнай перевозкаларнаң айғасча, республикада піс ле халғабыс, кем пӧзік нимес пааларҷа чонны тарт чӧрче. Пу кӱнге ӧмеде 3 автобус водительі саналча: Геннадий Моисеевич Бутонаев, Пётр Викторович Тахтобин, Владимир Сергеевич Шулбаев. Олар илееде чыл водитель профессиязындалар, рейстерге неделяда 3 хати сыхчалар – пір, ӱс паза пис хоныхта.
– Наа ла тоғынарға пастаанда, хайдағ сидіксіністерге урунғазар?
– Тоғынарға пастаанда, счёт чабых полған, чал ахчазы 3 айҷа тӧлелбинчеткен, водительлер саназыбызар сағыстығ полғаннар. Аймах устағ-пастаа хабазығ пирерге тимде полған, че пастап налогты – 800 муң салковайны – тӧлебізерге киректелген, бюджет ахчазынаң, тізең, закон хоостыра аны чабарға чарабас. Таштып аймаа пазы Николай Чебодаев, «Ойна» алтын аныпчатхан ӧмедең ахча сурап, ол ӧдісті чабысхан. Соонаң аймах устағ-пастаанаң піске 1 миллион 200 муң паза республика бюджедінең 500 муң салковай пирілген. Постарыбысха сыданминчатхан сылтаанда, амғы туста пістің предприятие реорганизация иртче, ол прай бюджетнай пол парар, Таштып аймааның устағ-пастаа пастыра тоғынарбыс. Чуға чуртапчатханда, ол иң орта хаалағ.
Паза хайдағ сидіксіністер? Пірее водитель ағырыбысса, позыма руль кистіне одырарға килісче. Кадрлар сурии ағырсымнығ.
– Хайдағ аалларҷа чуртағҷыларны тарт чӧрчезер?
– «ГАЗельлер» Таштыптаң Мадырзар, Улуғ Арбытсар, Чоғархы Сирзер, Чоғархы Таштыпсар чӧрчелер. Ол аалларзар парчатса, чолда тоғасчатхан аалыҷахтарда тохтапчаларох. Кӧзідімге алза, Мадырзар чол Кічіг паза Улуғ Сии, Инісчул, Чоғархы Сии, Сипчул, Индіркі Мадыр аалыҷахтар хыринҷа парча, полған на аалда тохтағ пар.
– Чорых ӱчӱн нинҷе тӧлепчелер?
– 1 пассажирокилометр 1 салковай 54 ахчаа турча. Пу сан алыспаан, бензинге хоратхан ахча андар кирілбинче. Кӧзідімге алза, пістің «ГАЗельнең» Мадырдаң Таштыпха теере парыбызарға 70-ҷа салковай тур парча, Ағбаннаң чӧрчеткен автобус 100 салковайға тарт чӧрче, попуткалығ парыбызарға 150 салковай тур парар, такси хығыртса – 1500 салковай.
Піс дотационнай предприятие полчабыс. Сағыста коммерческай рейстер идерге, андада піс ахча тоғынып пастирбыс. Ідӧк чолларны ипти тударынҷа парыстарны ӧскірібізер оңдай пар, ам Наа чыл соонаң аукционнар пастал сыхса, оларда аралазарбыс. Пістің автогрейдер пар, грейдеристті таап алғам, тоғынарға пастабысса, чоллар иптеліп пастир, Арбыт, Улуғ Пор ааллар саринда.
– Устағҷы тоғызы кӧңніңерге кірче бе?
– Я, хынығ тоғыс. Кӧп чӧрерге килісче, аймах устаныстарнаң киректер апарарға. Кабинетте ле одырарға кӧңніме кірбинче, аннаңар пу орынға тудынар сағыстығбын.
Сом авторни
Автор :
Тарина Бутонаева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
