Шлагбаум хыринда улуғ нимес наа тура пӱдіріл партыр, ол частьсар сыныхтап иртірҷең пункт (КПП) полча. Азынада чоохтаза, пу часть полк полған, ам аның статузы алыс партыр - ол бригада полча, андар ікі дивизион кірче. Пір дивизионы Дивногорскта орныхча, Хызылчарны хадағда тутча.

КПП хыринда журналисттерні бригаданың командирі, полковник Иван Сибиряков паза аның орынҷызы, подполковник Владимир Кизима удурлапчалар. Олар КПП хыриндағы стендте хоосталған схемаларда хайдағ объекттер пӱдіріл парғанынаңар паза ам даа пӱдірілчеткенінеңер чоохтааннар. Офицерлернің чооғынаң, пӱдіріглернің хазна заказчигі Россияның арачыланыс министерствозы полча. Бригадада прай пӱдіріг тоғыстарын «Ағбанның пӱдіріг компаниязы» ООО апарча. График хоостыра прай тоғыстарны пӱӱл 1 июньға тоос саларға киректер.

150 чааҷаа казарма пӱдіріл парған, комнаталарда алтылар чааҷы чуртир, анда атчаң тиріглерні хайраллаҷаң ікі комната пар. Истіг чуртирға, служба апарарға прай оңдайлар пар. Ідӧк столовай пӱдірілче, ікінҷі турада бригаданың штабы полар. Владимир Кизиманың чооғынаң, ол пеер Новосибирсктең килген, анда часть азых чазыда турча, Хакасиядағы бригаданаң тиңнестірерге сидік. Мында чуртаҷаң, служба апарҷаң оңдайларны Россияда иң артыхха санирға чарир, прайзына ол кӧзідім полар.

Ікі радиолокация станциязынаңар (РЛС) чоохтаза, оларның пірсі пӧзік нимес, пір километрҷе, учухчатхан объекттерні (вертолеттарны, пилот чох аппараттарны, ханаттығ ракеталарны, дроннарны) кӧрче. Ікінҷі РЛС 40 километрге теере пӧзік учухчатхан объекттерні кӧрче. Олар ибіре 300 километрдегі кииде учухчатхан прай нимелерні кӧрчелер.

Бригада Россия президентінің указынаң, Арачыланыс министерствозының директивазынаң, Ӧӧн штабтың чахиинҷа пылтыр 1 декабрьда тӧстелген.

Ағаа в/ч 79222 номер пирілген, ол ам 24-ҷі зенитно-ракетнай бригада полча. Бригада Центральнай чаа округының 14-ҷі ВВС паза ПВО армиязына кірче, армияның штабы Новосибирскте. Центральнай чаа округы уғаа улуғ, ол Волга суғдаң Байкал кӧлге теере тартылча, аннаң андар - Іскеркі чаа округы. Европа саринда Кидеркі паза Ӱстӱнзархы чаа округтары пар.

Бригаданың тиріглерінеңер ідӧк Владимир Кизима искірген. Аның чооғынаң, бригадада С-300 ракеталығ комплекстер турчалар, оларны тӱрчедең наа С-400 «Триумф» комплекстерге алыстырарлар. Олар 75 километрге теере учухчатхан объекттерні атчалар. Ракеталарны кӱстіг машиналар тарт чӧрчелер. «Тревога» сағба полза, олар, кирек орынзар табырах парып, анда дежурстваа турыбысчалар.

Хакасияда олар хазнаа уғаа кирек объекттерні киидең арачылапчалар. Андағ объекттерге Сойан-Сус ГЭС, Саяногорсктағы ікі алюминий заводы, Ағбандағы молат хайылдырҷаң, опытно-механическай, экспериментально-механическай, контейнерлер сығарҷаң заводтар паза пасха даа предприятиелер саналчалар.

Дежурстводағы нимес чааҷылар Ағбандағы чааҷылар городогында чуртапчалар. Анда тынанарға прай кирек оңдайлар пар: пус ареназы, бассейн, спортплощадка, столовай, казармалар. Олаңай чуртағҷылар даа ол социальнай объекттерзер позыдылчалар. Ол киректерні ам тимір чол бригадазының устаа холда тутча.

Хакасияның пазы Виктор Зимин бригадазар килгенде, комбриг Иван Сибиряков аны прай объекттернең таныстырған, хаҷан пӱдіріг тоғыстары тоозылардаңар, график хоостыра олар хайди апарылчатханнаңар искірген. Анаң ӱгредіг оңдайынаң «Тревога» сағба чарлалған. Чааҷылар, С-300 комплекстерзер чӱгӱріп, оларны, тоғындырып, чорыхха сыхчаң колоннаа турғызыбысханнар. Чох, ракеталар позытпааннар. Стройға турыбысхан чааҷылар алнында Хакасияның пазы хысха чоох тутхан:

- Халғанҷы 15 - 20 чыл пістің республика киидең арачыланыс чох полған. Амды сірернің службаңар сылтаанда республика ізестіг хадағда полар. Піс сірерге службаны турыстыра апарарға киректелчеткен прай оңдайлар пирерге полызарбыс... Служба ӱчӱн алғыс сірерге! Ідӧк алғыс сӧстерін читірерге сағынчам бригаданы мында турғызарға хабасхан Ӧӧркі ӧӧн командующай Владимир Путинге паза арачыланыс министрі Сергей Шойгуға...

Виктор Михайлович службада чахсы чидіглер кӧзітчеткен чааҷыларға правительствоның алғыстас пічіктерін читірген. Ідӧк Хакасияның пазына ракеталарны позытчаң пультты кӧзіткеннер.

Сыннаң даа, бригаданың тиріглерін кӧрген соонда, Россияның Тирігліг кӱстері ӱчӱн поғдархас кізі кӧңніне кірче. Пу даа кізее оой нимес службаны хараа-кӱнӧрте апарчатхан чааҷыларны алғыстирға ла халча.