ИРГІ ЧАХСЫ ОНДАЙЗАР АЙЛАНЧАБЫС
17.03.2017
Хабарлар
![ИРГІ ЧАХСЫ ОНДАЙЗАР АЙЛАНЧАБЫС ИРГІ ЧАХСЫ ОНДАЙЗАР АЙЛАНЧАБЫС](/upload/iblock/ff6/ff615245d1cb8a56201d2b820d175ea7.jpg)
Хакасияның Ӧӧркі Чӧп президиумы 15 мартта теестегі чыылиин иртірген. Анда парламенттегі комитеттернің паза комиссияларның устағҷылары 7 сурығ кӧрібіскеннер. Чыылығны Хакасияның Ӧӧркі Чӧп кнезі Владимир Штыгашев апарған.
Кӧрілген сурығларның пірсі лесниктерге паза заповедник тоғынҷыларына теелген. Хайди чарытхан Ӧӧркі Чӧптің аграрнай политикаҷа, ас-тамахча паза чирнең тузаланарынҷа комитедінің кнезі Пётр Воронин, 2016 чылда Россияның Чир кодексінзер алызығлар кирілген. Ол алызығларҷа экономиканың алынҷа отрасльдағы тоғынҷыларына тоғынчатхан орында чуртирға чир участогын пирерге чарир, ол санда арығ-тайға фондындағы чирлердең паза алынҷа хайраллалчатхан чир-чайаан чирлерінең.
Федеральнай закон алыс парғанда, республиканың законынзар алызығлар кирерге киректелче. Ӧӧркі Чӧп президиумы ағас хонии тоғынҷыларына «служебнай чирлер» пирерге киректелчеткенінең чарасхан, че олох туста ол алызығлар федеральнай заповедниктернің не тоғынҷыларына теелчеткеніне хайығ салған. Сурығ турыбысхан: «Республика холындағы заповедниктернің тоғынҷылары чир алҷаң правозы чох халчалар ба?» Ол сурығның узы-пазына сығар ӱчӱн, депутаттар читіре тоғыныбызарға чарат салғаннар.
Паза пір сурығ Хакас Республикадағы идінҷектер праволарын арачылирынҷа уполномоченнайның 2016 чылдағы тоғыс салтарларынаңар сан пирізі полған. Республиканың идінҷектер праволарын арачылирынҷа уполномоченнайы Василий Кудашкин сан пирізінең хысхаҷахти таныстырған. Аның ӧӧн чардыхтары иділген тоғыстың салтарларынаң, ілезіне сығысчатхан сидіксіністердең паза ол сидіксіністерні пӧгерінҷе чӧптердең пӱтчелер. Кудашкин ідӧк пӱӱл республикада санға алылған идінҷектернің саны, 2016 чылнаң тиңнестірзе, алыспаанын таныхтаан - 26 муңҷа идінҷек.
Ӧӧркі Чӧп кнезінің орынҷызы, бюджетче комитеттің кнезі Сергей Комаров, сан пиріске чахсы паалағ пиріп, олох туста андағы чӧптерні кӧмес алғыдыбызарға киректелчеткенін таныхтаан. Кӧзідімге, «Единая Россия» партияның Хакас региональнай пӧлиинең хада тоғыныбызарға чӧп пирген. Оларның сидіксіністерні пӧгерінҷе тузалығ чӧптері парын таныхтаан.
Халғанҷы сурығларның пірсі федеральнай закон проектіне ӱндезердеңер полған. Хайди чарытхан Ӧӧркі Чӧп кнес орынҷызы, конституционнай законодательствоҷа комитеттің кнезі Светлана Могилина, Россия правительствозы «Россия Федерациязының хазна гражданскай службазынаңар» федеральнай законзар алызығлар кирер пастағнаң сыххан. Ол алызығларҷа чиновниктерге квалификацияларын кӧдірер пӧгіннең тӧреміл ӱгрен турарға килізер. Ӧӧркі Чӧп кнезі Владимир Штыгашев, ол пастағны чахсы паалап, таныхтаан:
- Піс хатап чахсы иргі оңдайзар айланчабыс.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде