ЧИҢІС ПІСТИ ПОЛДЫ
18.05.2018
Хабарлар
Хабарӌылар пайрамы. «Хабар» газета Хакасиядағы СМИ-лар аразында чыл сай иртірілчеткен «Хакасия, алнынзар!» марығда пастағызын на чиңіс тутты.
ХАБАРҶЫЛАР ПАЙРАМЫНДА ХАКАСИЯНЫҢ ПАЗЫ ВИКТОР ЗИМИН ХАЙДИ ДАА АРАЛАЗАДЫР. РЕГИОНДАҒЫ СМИ ТОҒЫНҶЫЛАРЫН ӰЛӰКӰННЕҢ АЛҒЫСТАП, ТУРЫСТЫҒЛАРЫНА СЫЙЫХТАР ЧИТІРЧЕ, РЕСПУБЛИКА АЛНЫНДА ТУРЧАТХАН НАНДЫРЫҒЛЫҒ ПӦГІННЕРНЕҢ ТАНЫСТЫРЧА, ХАДА-ПІРГЕ ТУДЫНЫП, ОЛАРНЫ ЧУРТАСХА КИРЕР ОҢДАЙЛАРДАҢАР ЧАРЫДА ЧООХТАП ПИРЧЕ. МЫНДА ПІСТІҢ, ХАБАРҶЫЛАРНЫҢ, ТОҒЫЗЫБЫСТЫ, ПОЛЫЗИИБЫСТЫ ПӦЗІК ПААЛАПЧАТХАНЫН ИСТЕРГЕ ӦРІНІСТІГ.
- ЧОННЫҢ КИРЕКСІНІСТЕРІНЕҢЕР, САҒЫССЫРАСТАРЫНАҢАР ПІС ХАЙ ПІРЕЕ ТУСТА СМИ-лар ПАСТЫРА ПІЛІП АЛЧАБЫС, КИРЕК ЧАРАДЫҒЛАР АЛЧАБЫС. МЫНА СІРЕРГЕ УЛУҒ КИРТІНІС ПАЗА ІЗЕНІС. АНЗЫ УҒАА ААРЛЫҒА ПААЛАЛЧА. МЫННАҢ МЫНДАР ДАА АҒАА ТУРЫСТЫҒ ТОҒЫН ТУРЫҢАР, - АЛҒААН ВИКТОР МИХАЙЛОВИЧ.
![ЧИҢІС ПІСТИ ПОЛДЫ ЧИҢІС ПІСТИ ПОЛДЫ](/upload/iblock/50f/50f977ed968b0fa2935c276dd5607d40.jpg)
Хакасиядағы СМИ-лар аразындағы марығның чиңіс сыйии «Хабар» газетаның ӧӧн редакторы
Радион СУНЧУГАШЕВТӀҢ холында.
Анаң иң артыхтарына сыйыхтар читірген. Іди РТС тоғынчызы Татьяна Дубровина паза «Хакасия» газетанын ӧӧн редакторының пастағы орынчызы Юрий Абумов «Хакасия культуразының саблығ тоғынчызы» аарластығ атха турысханнар. Хакасия пазының Аарластығ таниина турысханнар «Сельская правда» газетаның ӧӧн редакторы Галина Кузьмина, «Ағбан» телевидениенің ӧӧн редакторы Лилия Федотко паза хакас телевидениезінін режиссеры Светлана Султрекова. Хакасия пазының алғыстас пічиин алғаннар: Максим Ахпашев - «Хабар» газетаның сомчызы, Михаил Куприянов - Саяногорсктағы телевидениенің директоры, Константин Кравцов - ГТРК-ның хабарчызы, Валерия Агафонова - «Рен-ТВ «Саяны» пункттың редакторы, Наталья Курцева - ТВ-7-ның телеоператоры, Вера Даниленко - «Хакасия Информ» хабарлар агентствозының редакторы.
Губернаторның соонда сӧс пирілген Хакасияның Ӧӧркі Чӧп кнезі Владимир Штыгашевке. Владимир Николаевич, Виктор Михайловичтің сӧстерін узаратхан чіли, хабарчыларнын тоғызы нандырығлығ, олох арада пӧзік киртіністіг полчатханын таныхтаан. Анаң СМИ-лар пайрамына чыылысхан улуссар айланған: чуртаста орта полчатхан чахсы киректерні хара сырнаң кӧзідерге харасчатхан хай пірее хабарҷыларға тӧӧй полбасха, Хакасияның чидіглерін, чоннар аразындағы хайызығ-ынархасты орта чарыдарға, хығырығҷыларға таңдағы кӱнге ізеніс пирерге.
Анаң, кӧңні-чӱреен асчатхан чіли, Владимир Николаевич позының чуртазынаңар, тоғызынаңар пірее хати килістіре нимес искіріглер сығарылчатханына хомзынызын чазырбаан. Позы ікі пиҷезіне паза хыс туңмазына полысчатханынаңар чоохтап пирген. Оларның хайзы даа пенсия асхынах алча. Улуғ частығ чир-суғҷыбыстың пу прай арығ сағыстығларға пірігерге, хайдағ даа сидіксіністер алнында тӧдір пазынмасха, чуртаста орта полчатхан турыстығ кӧзідімнерні табарға, оларны алғым чарыдарға хығырғаны тиирге чарир.
![](/upload/2018-05-18_112455.jpg)
(Юрий Абумов)
Чооғын тоосчадып, Ӧӧркі Чӧп кнезі Владимир Штыгашев Матыр-город Севастополь парламентінің Аарластығ пічиин ГТРК тоғынчыларына читірген - город чуртазын, чидіглерін, ӧзіс чолын Хакасия чуртағҷыларына тӧреміл чарытчатхан ӱчӱн. Аның соонаң Россияның Журналисттер пірігізінің Хакасиядағы пӧлиинің кнезі Ольга Ширковец прай хабарҷыларны пайрамнаң чылығ алғыстаан, наа чидіглерге алғаан. «Хакасия» газетаның ӧӧн редакторының пастағы орынчызы Юрий Абумов паза сомҷы Александр Колбасов Россияның Журналисттер пірігізінің иң аарлығ сыйиинаң таныхталғаннар. Анаң, Хакасиядағы СМИ-лар аразында чарлалған «Хакасия, алнынзар!» марығда аралазып, чиңістер тутхан хабарҷылар сыйыхтар алғаннар.
- Хабарҷыларның чайаачы узы чылдаң чылға ӧсчеткені кӧріндіре. Пірее номинацияларда пір тиң пӧзік синде пазылған онарлап материаллар полған. Мына хайда жюри араласчыларына талазарға даа киліс турған, - чазырбинча Ольга Ширковец.
![](/upload/2018-05-18_112416.jpg)
Республиканың Ӧӧркі чарғы кнезі Виктор НОСОВ
Анатолий СУЛТРЕКОВХА сыйых читірче.
Анаң сыйыхтар читірері пасталған. Номинациялар саны асхынах нимес. Алынча устағчылар даа постарының сыйыхтарын тимнеп килтірлер. Аннаңар прайзын таныхтир оңдай чоғыл. Мында иң ӧӧннерін не адағлап пирим: «Илбек Чиңіс» номинацияда «Ағбан» газетаның хабарчызы Татьяна Зыкова сыйых алған, «Минің Хакасиям» номинацияда Марина Алехина чиңіс тутхан, «Аал хонии» номинацияда «Земля таштыпская» газетаның хабарҷызы Ольга Канюк сыйыхха турысхан. «Сағыс» номинацияда сыйых мағаа пирілген. «Чиит хабарҷы» номинацияда «Ағбан» радионың тоғынчызы Владислав Лимбах сыйыхнаң таныхталған. «Чыл журнализі» атха турысхан «Хакасия» газетаның ӧӧн редакторының орынҷызы Александр Дубровин.
![](/upload/2018-05-18_112431.jpg)
«Чыл хабарчызы» Александр ДУБРОВИН
Че халғанҷы тусха теере чазытта тутханнар 2017 чылның иң чахсы СМИ ӧмезін. Тӧлкеленістер аймах-пасха полған. Хакасияның иң артых СМИ-зын сыйыхтирға, алғыстирға Ольга Ширковец чон алнынзар сыххан. Хакасияда СМИ-лар саны асхынах нимес. Хайзын на адабызар ни?
- «Чыл СМИ-зы» марығда чиңіс тутхан «Хабар» газета! - тыыда чарлапча Ольга Ширковец.
Сах андох айа сабызы тыҷыри тӱскен. Пістің ӧрінізібіс оңнығ нимес. Мына пос тілінең сыхчатхан газетаның хабарҷыларының чайаачы тоғыстарының салтары. Пу аарлығ сыйыхха газетабыс пастағызын на турысты. Чыл даа сай аны утып аларға Хакасиядағы прай СМИ-лар хатығ харбазығ апарчалар. Пӱӱл чиңіс пісти полды! Ағаа турызар ӱчӱн, прайзына матап тоғынарға, тӧреен чирібістің чуртазын алғым чарыдарға, наа чидіглернең таныстырарға киліс турған. Турыстығ тоғызыбыс турыстығ паалалды.
Анзын таныхтаан паза учредительлерібіске алғызын читірген ӧӧн редактор Радион Сунчугашев. Пу сыйых пістің хабарҷыларның алнында наа, толдыр полар нандырығлығ пӧгіннер турғысча теен ол.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде